ദക്ഷിണ കൊറിയന്‍ വാഹന നിര്‍മ്മാതാക്കളായ കിയയുടെ സ്റ്റിംഗര്‍ എന്ന സെഡാന്‍ ജന്മദേശത്തും വടക്കേ അമേരിക്കയിലുമെല്ലാം വളരെ ജനപ്രിയമായ മോഡലാണ്. വാഹനത്തിന്‍റെ പുതുക്കിയ മോഡലിനെ നിരത്തിലെത്തിക്കാനുള്ള നീക്കത്തിലാണ് കമ്പനി. പരിഷ്‍കരിച്ച വാഹനത്തിന്റെ ചിത്രങ്ങള്‍ അടുത്തിടെ കമ്പനി പുറത്തുവിട്ടിരുന്നു.

3.3 ലിറ്റര്‍ TGDi V-6 ടര്‍ബോ-പെട്രോള്‍ എഞ്ചിനാണ് സ്റ്റിംഗറിന്റെ ഹൃദയം. അത് ഇലക്ട്രോണിക് വേരിയബിള്‍ എക്സ്ഹോസ്റ്റ് വാല്‍വ് സിസ്റ്റത്തില്‍ വരുന്നു. ഇത് മുമ്പത്തേതിനേക്കാള്‍ 3 bhp കൂടുതല്‍ കരുത്ത് പുറപ്പെടുവിക്കുന്നു. ഇപ്പോള്‍ പരമാവധി 368 bhp -യാണ് വാഹനത്തിന്റെ കരുത്ത്. അതേസമയം 510 Nm torque അതേപടി തന്നെ തുടരുന്നു. എന്നാല്‍ 2.0 ലിറ്റര്‍ ഫോര്‍ സിലിണ്ടര്‍ ടര്‍ബോചാര്‍ജ്ഡ് പെട്രോള്‍ എഞ്ചിന്‍ നിലവിലെ എഞ്ചിന് സമാനമായി തന്നെ തുടരുന്നു. ഈ എഞ്ചിന്‍ 252 bhp കരുത്തും 353 Nm ടോര്‍ഖും ഉത്പാദിപ്പിക്കും. സ്റ്റാന്‍ഡേര്‍ഡായി 8 സ്പീഡ് ഓട്ടോമാറ്റിക് ഗിയര്‍ബോക്സാണ് ട്രാന്‍സ്മിഷന്‍. 

2020 സ്റ്റിംഗറിന്റെ കൂടുതല്‍ വിവരങ്ങളും കഴിഞ്ഞ ദിവസം കിയ വെളിപ്പെടുത്തിയിരുന്നു. ഫീച്ചറുകള്‍, എഞ്ചിന്‍ ഓപ്ഷനുകള്‍ എന്നിവയും കിയ വെളിപ്പെടുത്തി. അല്‍പം അപ്ഡേറ്റുചെയ്ത എല്‍ഇഡി ഹെഡ്‌ലാമ്പുകളും എല്‍ഇഡി ടെയില്‍ ലാമ്പുകളും രണ്ട് പുതിയ അലോയ് വീല്‍ ഡിസൈനുകളും രണ്ട് പുതിയ എക്സ്റ്റീരിയര്‍ പാക്കേജുകളും സ്‌റ്റൈലിംഗ് അപ്ഡേറ്റുകളില്‍ ഉള്‍പ്പെടുന്നു.

പുതിയ ഡാര്‍ക്ക് പാക്കേജില്‍ ഗ്ലോസ് ബ്ലാക്ക് സ്റ്റിംഗര്‍ ചിഹ്നം, ബ്ലാക്ക് ഡിഫ്യൂസര്‍ സറൗണ്ട്, ബ്ലാക്ക് മഫ്‌ലര്‍ ടിപ്പുകള്‍ എന്നിവ ഉള്‍പ്പെടുന്നു. ബ്ലാക്ക് പാക്കേജില്‍ 19 ഇഞ്ച് മാറ്റ് ബ്ലാക്ക് വീലുകള്‍, ഒരു ട്രങ്ക് ലിഡ് ലിപ് സ്പോയിലര്‍, ബ്ലാക്ക് ഔട്ട് മിറര്‍ ക്യാപ്‌സ്, സൈഡ് ഫെന്‍ഡര്‍ ട്രിം എന്നിവ ഉള്‍പ്പെടുന്നു.

കാറിന്റെ മൊത്തത്തിലുള്ള രൂപകല്‍പ്പന അതേപടി തുടരുന്നു. കൂടാതെ, പുതുക്കിയ കാറില്‍ പുതിയ ഇന്റീരിയര്‍ ട്രിം, 10.25 ഇഞ്ച് വലിയ ടച്ച്സ്‌ക്രീന്‍ ഇന്‍ഫോടെയ്ന്‍മെന്റ് സ്‌ക്രീന്‍, പൂര്‍ണ്ണ ഡിജിറ്റല്‍ എച്ച്ഡി 7 ഇഞ്ച് 'സൂപ്പര്‍വിഷന്‍' ക്ലസ്റ്റര്‍ എന്നിവ ഉള്‍പ്പെടുന്നു. കൂടാതെ, സ്റ്റിംഗറിന് ഇപ്പോള്‍ കണക്ട് ചെയ്ത കാര്‍ സാങ്കേതികവിദ്യ ലഭിക്കുന്നു, അതില്‍ വിദൂര എഞ്ചിന്‍ സ്റ്റാര്‍ട്ട് സംവിധാനം, സീറ്റ് ചൂടാക്കല്‍, വെന്റിലേഷന്‍ എന്നിവപോലുള്ള സവിശേഷതകളിലേക്കുള്ള ആക്സസ് നല്‍കുന്നു.

സേഫ് എക്‌സിറ്റ് മുന്നറിയിപ്പ്, വിശാലമായ വ്യൂവിംഗ് ആംഗിള്‍ ഉള്ള ബ്ലൈന്‍ഡ്-സ്‌പോട്ട് വ്യൂ മോണിറ്റര്‍, ലെയ്ന്‍ ഫോളോ അസിസ്റ്റ്, ഹൈവേ ഡ്രൈവിംഗ് അസിസ്റ്റ്, റിയര്‍ ഒക്യുപന്റ് അലേര്‍ട്ട് എന്നിവയുള്‍പ്പെടെ പുതിയ ഡ്രൈവര്‍ സഹായ സവിശേഷതകളും കിയ സ്റ്റിംഗറില്‍ സജ്ജീകരിച്ചിരിക്കുന്നു.

ഈ വര്‍ഷം തന്നെ കൊറിയ ഉള്‍പ്പടെ ജന്മദേശത്തെ വിപണികളില്‍ എത്തിയേക്കാവുന്ന മോഡല്‍ ഇന്ത്യ ഉള്‍പ്പെടെയുള്ള രാജ്യങ്ങളിലേക്ക് എത്തുമോ എന്ന കാര്യം വ്യക്തമല്ല.