ഈ മഹീന്ദ്ര പ്ലാന്റില് പിറന്ന വണ്ടികളുടെ എണ്ണം കാല്ക്കോടി!
സ്കോര്പിയോയുടെ നിര്മാണം പൂര്ത്തിയാക്കിയതോടെയാണ് 25 ലക്ഷം എന്ന നാഴികക്കല്ല് പിന്നിട്ടത്.
രാജ്യത്തെ ആഭ്യന്തര വാഹന നിര്മ്മാതാക്കളില് പ്രബലരായ മഹീന്ദ്ര ആന്ഡ് മഹീന്ദ്രയുടെ നാസിക്കിലെ പ്ലാന്റില് നിര്മിക്കുന്ന വാഹനങ്ങളുടെ എണ്ണം 25 ലക്ഷം പിന്നിട്ടു. പ്ലാന്റ് സ്ഥാപിതമായി നാല് പതിറ്റാണ്ട് തികയും മുമ്പാണ് ഈ നേട്ടം.
സ്കോര്പിയോയുടെ നിര്മാണം പൂര്ത്തിയാക്കിയതോടെയാണ് 25 ലക്ഷം എന്ന നാഴികക്കല്ല് പിന്നിട്ടത്. 1981-ലാണ് മഹീന്ദ്രയുടെ നാസിക്കിലെ പ്ലാന്റ് പ്രവര്ത്തനം ആരംഭിക്കുന്നത്. പ്രതിവര്ഷം 2,10,000 യൂണിറ്റ് ഉത്പാദന ശേഷിയുള്ള നാസിക്കിലെ ഈ പ്ലാന്റ് 147 ഏക്കര് സ്ഥലത്താണ് വ്യാപിച്ച് കിടക്കുന്നത്.
എഫ്ജെ മിനി ബസാണ് ഈ പ്ലാന്റില് ആദ്യം നിര്മ്മിച്ചത്. ആദ്യ കാലങ്ങളില് പ്രതിദിനം എട്ട് വാഹനങ്ങള് നിര്മിച്ചിരുന്ന സ്ഥാനത്ത് ഇപ്പോള് ദിവസാന 700 വാഹനങ്ങളാണ് ഇവിടെ നിര്മിക്കുന്നത്.
നാസിക്കിലെ പ്ലാന്റിലെ ഒരോ ജീവനക്കാരന്റെയും അധ്വാനത്തിന്റെ ഫലമാണ് ഈ നേട്ടമെന്നും ഇത് ഓട്ടോ മൊബൈല് മേഖലയിലെ മഹീന്ദ്രയുടെ കുതിപ്പിന് വീണ്ടും കരുത്തു പകരുമെന്നും മഹീന്ദ്ര ഓട്ടോമോട്ടീവ് ഡിവിഷന് മേധാവി വിജയ് കല്റാ വ്യക്തമാക്കി.
സ്കോര്പിയോ, മരാസോ, എക്സ്യുവി 300, ബൊലേറൊ, ഇ-വെറിറ്റോ, ഥാര്, സ്പോര്പിയോ എസ്സി/ഡിസി തുടങ്ങിയ മോഡലുകളെല്ലാം ഈ പ്ലാന്റിലാണ് നിര്മിക്കുന്നത്.
മഹീന്ദ്ര ഇന്ത്യയില് നിര്മിക്കുന്ന വാഹനങ്ങള് 34-ല് അധികം രാജ്യങ്ങളിലേക്ക് കയറ്റുമതി ചെയ്യുന്നുണ്ട്. ഇതില് ഈ പ്ലാന്റില് നിര്മിക്കുന്ന വാഹനങ്ങളും ഉള്പ്പെടും.