ടാറ്റയെ അടക്കം മലർത്തിയടിച്ച് നമ്പർ വൺ ആയി മഹീന്ദ്ര സ്കോർപിയോ, പിടിച്ചെടുത്തത് വിൽപ്പനയുടെ ഇത്രയും ശതമാനം
മിഡ്-സൈസ് എസ്യുവി സെഗ്‌മെൻ്റിലെ 2024 ഡിസംബറിലെ വിൽപ്പന കണക്കുകൾ പുറത്ത്. ടാറ്റ , എംജി മോട്ടോഴ്സ്, ഹ്യുണ്ടായ്, ജീപ്പ് തുടങ്ങിയ കമ്പനികളുടെ മോഡലുകളെ മലർത്തിയടിച്ച് മഹീന്ദ്ര സ്‌കോർപ്പിയോയും XUV700 ഉം മുന്നിൽ. ഇതാ 2024 ഡിസംബറിലെ മിഡ്-സൈസ് എസ്യുവി സെഗ്‌മെൻ്റിൻ്റെ വിൽപ്പന റിപ്പോർട്ട് നോക്കാം.
Followഇന്ത്യയിലെ മിഡ്-സൈസ് എസ്യുവി സെഗ്മെൻ്റ് പ്രീമിയം കാർ വാങ്ങുന്നവർക്കിടയിൽ ഏറ്റവും ജനപ്രിയമാണ്. 2024 ഡിസംബറിൽ ഈ സെഗ്‌മെൻ്റിൽ മൊത്തം 25,434 കാറുകൾ വിറ്റു. ഈ സെഗ്‌മെൻ്റിൽ മഹീന്ദ്ര സ്‌കോർപ്പിയോ, XUV700, ടാറ്റ ഹാരിയർ, സഫാരി, എംജി ഹെക്ടർ, ഹെക്ടർ പ്ലസ്, ഹ്യുണ്ടായ് അൽകാസർ, ഫോക്‌സ്‌വാഗൺ ടൈഗൺ, ജീപ്പ് കോമ്പസ്, ഹ്യുണ്ടായ് ട്യൂസൺ, സിട്രോൺ സി5 എയർക്രോസ് തുടങ്ങിയ എസ്‌യുവികൾ ഉൾപ്പെടുന്നു. 2024 ഡിസംബറിലെ മിഡ്-സൈസ് എസ്യുവി സെഗ്‌മെൻ്റിൻ്റെ വിൽപ്പന റിപ്പോർട്ട് നോക്കാം.
സെഗ്‌മെൻ്റിൽ മഹീന്ദ്ര സ്‌കോർപിയോയാണ് മുന്നിൽ
12,195 യൂണിറ്റ് വിൽപ്പനയുമായി മഹീന്ദ്ര സ്കോർപിയോ (ക്ലാസിക്, എൻ മോഡലുകൾ) വിഭാഗത്തിൽ ഒന്നാമതെത്തി. ഇത് മുഴുവൻ മിഡ് സൈസ് എസ്യുവി സെഗ്‌മെൻ്റിൻ്റെ 47.95% വിൽപ്പന വിഹിതം പിടിച്ചെടുത്തു. 2023 ഡിസംബറിൽ 11,355 യൂണിറ്റുകൾ വിറ്റഴിച്ച സ്കോർപിയോ പ്രതിവർഷ വിൽപ്പനയിൽ 7.4% വർധിച്ചു. എങ്കിലും 2024 നവംബറിൽ വിറ്റ 12,704 യൂണിറ്റുകളിൽ നിന്ന് 2024 ഡിസംബറിലെ വിൽപ്പനയിൽ 4.01 ശതമാനം പ്രതിമാസ ഇടിവുണ്ടായി.
മറ്റൊരു മഹീന്ദ്ര എസ്‌യുവിയായ XUV700, 2024 ഡിസംബറിൽ 7,337 യൂണിറ്റുകളുടെ വിൽപ്പന കൈവരിച്ചു. ഇത് ഈ വിഭാഗത്തിലെ വിൽപ്പനയുടെ 28.85 ശതമാനം വരും. 2023 ഡിസംബറിൽ വിറ്റ 5,881 യൂണിറ്റുകളിൽ XUV700 24.76 ശതമാനം വളർച്ച രേഖപ്പെടുത്തി. എങ്കിലും, 2024 നവംബറിലെ 9,100 യൂണിറ്റുകളിൽ നിന്ന് 19.37 ശതമാനം പ്രതിമാസ ഇടിവ് സംഭവിച്ചു.
ടാറ്റ ഹാരിയറും സഫാരിയും: മൂന്നാം സ്ഥാനം
ടാറ്റ മോട്ടോഴ്‌സിൻ്റെ ഹാരിയറും സഫാരിയും 2024 ഡിസംബറിലെ വിൽപ്പനയിൽ പിന്നിലായി. സഫാരിയുടെ 1,385 യൂണിറ്റുകളും ഹാരിയറിൻ്റെ 1,307 യൂണിറ്റുകളും വിറ്റു. മൊത്തത്തിൽ രണ്ടു മേഡലുകളുടെയും 2,692 യൂണിറ്റുകൾ വിറ്റു. ഈ രണ്ട് എസ്‌യുവികളുടെയും വിൽപ്പനയിൽ ഇടിവുണ്ടായി.
എംജി ഹെക്ടറും ഹെക്ടർ പ്ലസ്സും
എംജി മോട്ടോർ ഹെക്ടറിൻ്റെയും ഹെക്ടർ പ്ലസ്സിൻ്റെയും 1,373 യൂണിറ്റുകൾ വിറ്റു. 24.14% MoM വളർച്ച രേഖപ്പെടുത്തിയ ആദ്യത്തെ ഇടത്തരം എസ്യുവി ആയിരുന്നു ഇത്. എങ്കിലും, വാർഷികാടിസ്ഥാനത്തിൽ 37.13% ഇടിവ് രേഖപ്പെടുത്തി.
ഹ്യുണ്ടായ് അൽകാസർ വിൽപ്പന
ഹ്യുണ്ടായ് അൽകാസർ 2024 ഡിസംബറിൽ 1,342 യൂണിറ്റുകൾ വിറ്റു. ഇത് വർഷം തോറും 40.67% വളർച്ച കൈവരിച്ചു, എന്നാൽ പ്രതിമാസ വിൽപ്പന 37.11 ശതമാനം കുറഞ്ഞു.
മറ്റ് എസ്‌യുവികളുടെ വിൽപ്പന
ഫോക്‌സ്‌വാഗൺ ടൈഗൺ 195 യൂണിറ്റുകളുടെ വിൽപ്പന കൈവരിച്ചു. ഇത് 146.84 ശതമാനം പ്രതിമാസ വളർച്ച കൈവരിച്ചു. അതേസമയം, ജീപ്പ് കോംപസിന്‍റെ വിൽപ്പന കണക്കുകളെക്കുറിച്ച് പരിശോധിക്കുകയാണെങ്കിൽ, അത് 175 യൂണിറ്റുകളുടെ വിൽപ്പന കൈവരിച്ചു. എന്നാൽ ഇത് 28.86 ശതമാനം പ്രതിവർഷ ഇടിവും 6.91 ശതമാനം പ്രതിമാസ ഇടിവും രേഖപ്പെടുത്തി. 33 യൂണിറ്റുകളുടെ വിൽപ്പന മാത്രമാണ് ഹ്യൂണ്ടായി ട്യൂസണിന് ലഭിച്ചത്. സിട്രോൺ സി3 എയർക്രോസ് വെറും ഒരു യൂണിറ്റിൻ്റെ വിൽപ്പനയാണ് നേടിയത്.
മൊത്തത്തിലുള്ള സെഗ്മെൻ്റ് പ്രകടനം
2024 ഡിസംബറിൽ ഈ സെഗ്‌മെൻ്റിൽ മൊത്തം 25,434 ഇടത്തരം എസ്‌യുവികൾ വിറ്റു. ഈ വിഭാഗത്തിൽ, മഹീന്ദ്ര സ്കോർപിയോ അതിൻ്റെ സ്ഥിരതയുടെയും ജനപ്രീതിയുടെയും അടിസ്ഥാനത്തിൽ മിഡ്-സൈസ് എസ്യുവി സെഗ്‌മെൻ്റിൽ മുന്നിലെത്തി. XUV700 ടാറ്റയുടെ എസ്‌യുവികൾ കടുത്ത മത്സരം നൽകിയെങ്കിലും വിൽപ്പനയിൽ ഇടിവ് രേഖപ്പെടുത്തി.
