എതിരാളികളെ പപ്പടം പോലെ പറത്തി, നിരത്തില് കുതിച്ച് ബലേനോ!
നിരത്തിലും വിപണിയിലും കുതിച്ച് മാരുതിയുടെ ജനപ്രിയ മോഡല് ബലേനോ
നിരത്തില് കുതിച്ച് മാരുതിയുടെ ജനപ്രിയ മോഡല് ബലേനോ. പുറത്തിറങ്ങി നാലു വർഷം പിന്നിടുമ്പോൾ ഈ പ്രീമിയം ഹാച്ച്ബാക്കിന്റെ ആറര ലക്ഷം യൂണിറ്റുകളാണ് നിരത്തിലെത്തിയത്.
2015 ഒക്ടോബറിലാണ് ബലേനോയെ മാരുതി അവതരിപ്പിച്ചത്. മാരുതിയുടെ പ്രീമിയം കാറുകള് വില്ക്കാനുള്ള ഡീലര്ഷിപ്പായ നെക്സയിലൂടെയാണ് ബലേനോ വിറ്റഴിച്ചത്. 2015ല് ജനീവാ മോട്ടോര് ഷോയില് ഐകെ2 കോണ്സെപ്റ്റ് കാറായി അവതരിപ്പിച്ച ബലേനോ അതേ വര്ഷം തന്നെയാണ് ഇന്ത്യന് വിപണിയിലേക്കും എത്തിയത്.
അരങ്ങേറ്റം മുതൽ നേതൃപദം സ്വന്തമാക്കിയ ചരിത്രമാണു ബലേനൊക്കെന്നും പ്രീമിയം ഹാച്ച്ബാക്ക് വിഭാഗത്തിലെ ഉപഭോക്താക്കളുടെ പ്രതീക്ഷകൾക്കൊത്ത് ഉയരാനായതാണു ബലേനൊയെ ഉജ്വല വിജയമാക്കിയതെന്നും മാരുതി സുസുക്കി ഇന്ത്യ ലിമിറ്റഡ് എക്സിക്യൂട്ടീവ് ഡയറക്ടർ(മാർക്കറ്റിങ് ആൻഡ് സെയിൽസ്) ശശാങ്ക് ശ്രീവാസ്തവ വ്യക്തമാക്കി.
വാഹനത്തിന്റെ പുതിയ പതിപ്പ് 2019 ജനുവരിയിലാണ് വിപണിയിലെത്തിയത്. നെക്സ്റ്റ് ജനറേഷന് സ്മാര്ട്ട് ഹൈബ്രിഡ് സംവിധാനത്തോടെ പുതിയ ബലേനോ മോഡലും അടുത്തിടെ മാരുതി പുറത്തിറക്കിയിരുന്നു. രാജ്യത്തെ ആദ്യ ബിഎസ് 6 പ്രീമിയം ഹാച്ച്ബാക്ക് മോഡലെന്ന ഖ്യാതിയും ഇതോടെ ബലനോയ്ക്ക് ലഭിച്ചിരുന്നു. നിലവില് എ2 പ്ലസ് സെഗ്മെന്റില് 27 ശതമാനം മാര്ക്കറ്റ് വിഹിതമുണ്ട് ബലേനോയ്ക്ക്.
83 ബിഎച്ച്പി കരുത്തേകുന്ന 1.2 ലിറ്റര് പെട്രോള് എന്ജിനും 74 ബിഎച്ച്പി കരുത്തേകുന്ന 1.3 ലിറ്റര് ഡീസല് എന്ജിനുമാണ് ബലേനോയുടെ ഹൃദയം. ഡ്യുവല് ഫ്രണ്ട് എയര്ബാഗ്, എബിഎസ്, ഇബിഡി, ബ്രേക്ക് അസിസ്റ്റ്, ഐസോഫിക്സ് ചൈല്ഡ് സീറ്റ് റെസ്ട്രിയന്റ് സിസ്റ്റം, ഫോഴ്സ് ലിമിറ്റര് സീറ്റ് ബെല്റ്റ് റിമൈന്ഡര്, സ്പീഡ് അലര്ട്ട് സിസ്റ്റം, റിയര് പാര്ക്കിങ് സെന്സര് എന്നീ സുരക്ഷാ സംവിധാനങ്ങളും പുതിയ വാഹനത്തിലുണ്ട്.
ബലേനൊയിൽ മാനുവൽ, കണ്ടിന്വസ്ലി വേരിയബ്ൾ ട്രാൻസ്മിഷൻ(സി വി ടി) ഗീയർബോക്സുകളും മാരുതി സുസുക്കി ലഭ്യമാക്കുന്നുണ്ട്. 5.58 ലക്ഷം മുതൽ 8.90 ലക്ഷം രൂപ വരെയാണ് ബലേനൊയുടെ വിവിധ വകഭേദങ്ങൾക്ക് ദില്ലി ഷോറൂം വില. ഹ്യുണ്ടായ് ഐ 20, ഫോക്സ്വാഗണ് പോളോ, ഹോണ്ട ജാസ് എന്നിവയാണ് ബലേനോയുടെ മുഖ്യ എതിരാളികള്.