Mercedes Benz : മോഡലിന്റെ കണ്ണില്‍ കുരുങ്ങി പുലിവാലുപിടിച്ച് ചൈനയിലെ മെഴ്‌സിഡസ് ബെന്‍സ്!
പരസ്യ വീഡിയോയിലെ വനിതാ മോഡലുകളില്‍ ഒരാള്‍ ഐലൈനർ ഉപയോഗിച്ച് കണ്ണുകൾ ചരിഞ്ഞതായി തോന്നിപ്പിച്ചതായിരുന്നു വിവാദത്തിനും ചർച്ചകള്‍ക്കും തുടക്കമിട്ടത്.
ജര്‍മ്മന്‍ (German) ആഡംബര വാഹന കമ്പനിയായ മെഴ്‌സിഡസ് ബെൻസിന്‍റെ (Mercedes Benz) പരസ്യം ചൈനയില്‍ (China) വിവാദമായതിനെ തുടര്‍ന്ന് പിന്‍വലിച്ചതായി റിപ്പോര്‍ട്ട്. ഏഷ്യക്കാരെക്കുറിച്ചുള്ള വംശീയാധിക്ഷേപ ആരോപണം ഉയര്‍ന്നതിന് തൊട്ടുപിന്നാലെ ചൈനയിലെ (China) വിവാദ പരസ്യം കമ്പനി പിൻവലിച്ചതായി ഇന്‍ഡിപെന്‍ഡന്‍റ് ഡോട്ട് യുകെ, ഹിന്ദുസ്ഥാന്‍ ടൈംസ് ഓട്ടോ തുടങ്ങിയ മാധ്യമങ്ങല്‍ റിപ്പോര്‍ട്ട് ചെയ്യുന്നു.
ഡിസംബർ 25 ന് ചൈനീസ് സോഷ്യൽ മീഡിയ പ്ലാറ്റ്‌ഫോമായ വെയ്‌ബോയിൽ ആദ്യമായി പ്രസിദ്ധീകരിച്ച പരസ്യമാണ് വന്‍ വിവാദമായത്. പരസ്യ വീഡിയോയിലെ വനിതാ മോഡലുകളില്‍ ഒരാള്‍ ഐലൈനർ ഉപയോഗിച്ച് കണ്ണുകൾ ചരിഞ്ഞതായി തോന്നിപ്പിച്ചതായിരുന്നു വിവാദത്തിനും ചർച്ചകള്‍ക്കും തുടക്കമിട്ടത്.
ചൈനീസ് കമ്മ്യൂണിസ്റ്റ് പാർട്ടിയുടെ പത്രമായ ഗ്ലോബൽ ടൈംസിന്റെ റിപ്പോർട്ട് അനുസരിച്ച്, ഏഷ്യക്കാരെക്കുറിച്ചുള്ള പാശ്ചാത്യ സ്റ്റീരിയോടൈപ്പിന് ഈ പരസ്യം അടിവരയിടുന്നതിനാൽ പ്രാദേശിക പ്രേക്ഷകർ മെഴ്‌സിഡസ്-ബെൻസിന്‍റെ ഈ ചിത്രീകരണത്തെ എതിർത്തു എന്ന് ഇന്‍ഡിപെന്‍ഡന്‍റ് ഡോട്ട് യുകെ റിപ്പോര്‍ട്ട് ചെയ്യുന്നു. സ്ത്രീ മോഡലിന്റെ മേക്കപ്പ് 'ചരിഞ്ഞ കണ്ണുകൾ; പോലെ കാണപ്പെടുകയും ഇത് ചൂടേറിയ ചർച്ചയ്ക്ക് കാരണമാവുകയും ചെയ്തു. ചരിഞ്ഞ കണ്ണുകളുടെയും സ്‍ത്രീയുടെയും ചിത്രം പത്തൊൻപതാം നൂറ്റാണ്ടിലെ ചൈനക്കാരെക്കുറിച്ചുള്ള പാശ്ചാത്യ സ്റ്റീരിയോടൈപ്പാണെന്ന് എന്ന് ഗ്ലോബൽ ടൈംസ് എഴുതിയതായി ഇന്‍ഡിപെന്‍ഡന്‍റ് റിപ്പോര്‍ട്ട് ചെയ്യുന്നു.
വിദഗ്ധരെ ഉദ്ധരിച്ച് ചൈനീസ് കമ്മ്യൂണിസ്റ്റ് പാർട്ടിയുടെ മുഖപത്രം പരസ്യം ഇത് വസ്‍തുനിഷ്‍ടമായ വിവരണം അല്ലെന്ന് അപലപിച്ചു. പാശ്ചാത്യ പ്രത്യയശാസ്ത്ര മേൽക്കോയ്‍മയെ അടിസ്ഥാനമാക്കിയുള്ള കിഴക്കൻ ഏഷ്യക്കാർക്കുള്ള ലേബൽ ആണ് ഈ പരസ്യമെന്ന് പത്രം പറയുന്നു.
പിന്നാലെ പരസ്യം വെയ്‌ബോയിൽ നിന്ന് മെഴ്‌സിഡസ് ബെൻസ് നീക്കം ചെയ്തു. ആഭ്യന്തര വ്യവസായത്തിൽ പോലും തങ്ങളുടെ പൗരന്മാരെ മോശമായി ചിത്രീകരിക്കുന്നതിനെതിരെ ചൈനയിലെ സോഷ്യൽ മീഡിയയിൽ രോഷം വർധിക്കുന്ന സാഹചര്യത്തിലാണ് ഇത്.
ചൈനീസ് കമ്പനിയായ ത്രീ സ്‌ക്വിറൽസ് ഇങ്ക്, മോഡലായ കായ് നിയാങ് നിയാങ്ങിന്റെ ചരിഞ്ഞ കണ്ണുകളുടെ മേക്കപ്പിന് അടുത്തിടെ ക്ഷമാപണം നടത്തിയിരുന്നു.
"ചെറിയ കണ്ണുകളോടെ ജനിച്ചതിനാൽ ഞാൻ ചൈനക്കാരന്‍ ആകരുതെന്നാണോ അതിനർത്ഥം?" മോഡൽ ചോദിച്ചു. “ഞാൻ ജനിച്ചത് അങ്ങനെയുള്ള കണ്ണുകളോടെയാണ്.. പരിഹസിക്കുന്നവരൊക്കെ യഥാർത്ഥ ജീവിതത്തിൽ ഇതിലും ചെറുതാണ്. ചെറിയ കണ്ണുകളുമായി ജനിച്ചതിനാൽ ഞാൻ മോഡലാകരുത് എന്നാണോ? ഞാൻ രാജ്യസ്‌നേഹമുള്ള ആളാണ്.. ഇത് ഒരുതരം രോഗാവസ്ഥയാണ്.." കായ് നിയാങ് നിയാങ്ങ് പറഞ്ഞതായി ഇന്‍ഡിപെന്‍ഡന്‍റ് എഴുതുന്നു.
മുമ്പും പടിഞ്ഞാറൻ രാജ്യങ്ങളിൽ നിന്നുള്ള മറ്റ് നിരവധി വിദേശ കമ്പനികള്‍ തങ്ങളുടെ പരസ്യങ്ങളിൽ കിഴക്കൻ ഏഷ്യൻ ശാരീരിക സവിശേഷതകളെ ചിത്രീകരിച്ചതിന്റെ പേരിൽ ചൈനയിൽ നിന്ന് പ്രതിഷേധം നേരിട്ടിട്ടുണ്ട്. ആഡംബര വസ്ത്രങ്ങളും സൗന്ദര്യവർദ്ധക ബ്രാൻഡുമായ ക്രിസ്റ്റ്യൻ ഡിയോർ SE കഴിഞ്ഞ മാസം അതിന്റെ ഒരു പരസ്യത്തിൽ ഏഷ്യൻ സ്ത്രീകളെ പരിഹസിച്ചതിന് പ്രതിഷേധം നേരിട്ടിരുന്നു. അതിനുശേഷം ഫോട്ടോ പ്രചാരത്തിൽ നിന്ന് നിർത്തി. ഡോള്‍സ് ആന്‍ഡ് ഗബ്ബാന, എച്ച് ആന്‍ഡ് എം പോലുള്ള മറ്റ് കമ്പനികളും ചൈനീസ് പൗരന്മാരെ പരസ്യങ്ങളിൽ ചിത്രീകരിച്ചതിന് രോഷം നേരിട്ടിട്ടുണ്ട്. വംശീയ വിദ്വേഷം എന്ന് വിളിക്കപ്പെടുന്ന പരസ്യത്തിന്റെ ആരോപണങ്ങളുടെ പേരിൽ ഒരു ബ്രാൻഡിന് ഓൺലൈൻ രോഷം നേരിടേണ്ടി വരുന്നത് ഇതാദ്യമല്ലെന്ന് ചുരുക്കം. ഇതത്തരം ഒരു കാമ്പെയ്‌നിനായി ഗുച്ചിയും ലക്ഷ്യമിട്ടിരുന്നതായി റിപ്പോര്‍ട്ടുകള്‍ ഉണ്ട്. ദലൈലാമയുടെ ഉദ്ധരണിയുള്ള ഒരു പരസ്യത്തിന് 2018 ൽ മെഴ്‌സിഡസിന് വിമർശനങ്ങൾ നേരിടേണ്ടി വന്നിരുന്നു. ഇത് വംശീയ അടിയൊഴുക്കുകളുള്ള ഒരു പ്രശ്നത്തേക്കാൾ ഒരു രാഷ്ട്രീയ വിവാദമായിരുന്നെങ്കിലും, ആ സമയത്ത് ജർമ്മൻ ബ്രാൻഡിന് മാപ്പ് പറയേണ്ടി വന്നതായും എച്ച്ടി ഓട്ടോ റിപ്പോര്‍ട്ട് ചെയ്യുന്നു.
സെഗ്‌മെന്റുകളില്‍ ഉടനീളമുള്ള ബ്രാൻഡുകളുടെ ഒരു പ്രധാന വിപണിയാണ് ചൈന. ഉയർന്ന വിൽപ്പന അളവുകൾക്കുള്ള സാധ്യതകൾ അർത്ഥമാക്കുന്നത് ആളുകൾക്കിടയിലുള്ള രോഷത്തിന് ഇരയാകാന്‍ കമ്പനികൾ മിക്കവാറും തയ്യാറല്ല എന്നാണ്.
