പുതിയ 'വിഷ'നുമായി കൂപ്പറിന്‍റെ സ്വന്തം മിനി!
വിഷൻ അർബനോട്ട് കൺസെപ്റ്റ് എന്ന പേരിലാണ് ഈ വാഹനം എത്തുക
ബിഎംഡബ്ല്യുവിനു കീഴിലുള്ള ബ്രിട്ടീഷ് ഐക്കണിക്ക് വാഹന നിര്‍മ്മാതാക്കളായ മിനി ആഡംബരം നിറഞ്ഞ ക്യാബിനുമായി ഒരു പുതിയ വാഹനം അവതരിപ്പിക്കാന്‍ ഒരുങ്ങുന്നു. വിഷൻ അർബനോട്ട് കൺസെപ്റ്റ് എന്ന പേരിലാണ് ഈ വാഹനം എത്തുക എന്ന് ഹിന്ദുസ്ഥാന്‍ ടൈംസ് റിപ്പോര്‍ട്ട് ചെയ്യുന്നു.
യാത്രാവേളകളിൽ സുഖകരമായി വിശ്രമിക്കാനും മറ്റും കഴിയുന്ന ഒരു ക്യാബിൻ ആണ് ഈ വാഹനത്തിന്റെ പ്രത്യേകത എന്നാണ് റിപ്പോര്‍ട്ടുകള്‍. ലളിതമായ ഘട്ടങ്ങളിലൂടെ ഇന്റീരിയറിനെ പരിവർത്തനം ചെയ്യാനും വ്യക്തിഗതമാക്കാനുമുള്ള സാധ്യതയും കാര്‍ വാഗ്ദാനം ചെയ്യുന്നു. ഗതാഗതത്തിനു മാത്രമല്ല, ഒരു ലിവിംഗ് സ്‍പേസായി വാഹനത്തെ മാറ്റുകയും കമ്പനിയുടെ ലക്ഷ്യമാണ്.
കമ്പനി പറയുന്നതനുസരിച്ച്, വൈബ്, ചിൽ, വാണ്ടർ‌ലസ്റ്റ് എന്നിങ്ങനെ മൂന്ന് കസ്റ്റമൈസേഷൻ പ്രൊഫൈലുകളും വാഹനത്തിലുണ്ട്. ഓരോന്നും വ്യത്യസ്ത അന്തരീക്ഷം സൃഷ്ടിക്കുന്നു. ഇതിനായി, ഓരോ അവസരത്തിനും അനുസരിച്ച് ആംബിയന്റ് ലൈറ്റിംഗ്, സംഗീതം, സുഗന്ധങ്ങൾ, മറ്റ് വശങ്ങൾ എന്നിവ ബ്രാൻഡ് ക്രമീകരിക്കും. ഈ രീതിയിൽ യാത്രകളിൽ വ്യത്യസ്ത അനുഭവങ്ങൾ നൽകാൻ ഇത് സഹായിക്കും.
മനോഹരമായ ഒരു വാനാണ് വിഷൻ അർബനോട്ട്. 4460 മീറ്റർ നീളമുള്ള ഈ വാഹനത്തിൽ ധാരാളം ഫ്യൂച്ചറിസ്റ്റ് ബിറ്റുകൾ നിർമ്മാതാക്കൾ ഒരുക്കിയിട്ടുണ്ട്. മുന്നിൽ ഒരു മാട്രിക്സ് ഹെഡ്‌ലൈറ്റ് സജ്ജീകരണം കാണാം, അത് പ്രകാശിതമായ ഒരു ലൈറ്റ് ബാറുമായി ബന്ധിപ്പിക്കുന്നു. വാഹനം ഓണാക്കിയാൽ മാത്രമേ ഇത് ദൃശ്യമാവുകയുള്ളു. ഈ സജ്ജീകരണം പിൻ ടൈൽ‌ലൈറ്റുകളിലും പ്രയോഗിക്കുന്നു. ശ്രദ്ധേയമായ മറ്റൊരു ഘടകം, ബീറ്റ് അനുസരിച്ച് പ്രകാശം പുറപ്പെടുവിക്കുന്നതിന് ഓഡിയോ സിസ്റ്റവുമായി സമന്വയിപ്പിക്കാൻ കഴിയുന്ന ഇല്ല്യുമിനേറ്റഡ് സ്കേറ്റ്ബോർഡ്-തീംഡ് വീലുകളാണ്.
അകത്തളത്തിലേക്ക് കടക്കാൻ ഒരു വലിയ സ്ലൈഡിങ് ഡോർ ഈ വാഹനത്തിലുണ്ട്. അകത്തേക്ക് കടക്കുമ്പോൾ ക്യാബിനാണ്. യഥാർത്ഥത്തിൽ ഒരു നാല് സീറ്ററാണ് ഈ വാഹനം. അതുകൊണ്ടു തന്നെ ഉള്ളിൽ വിശാലമായ സ്ഥലം ലഭ്യമാകും. കൂടാതെ കാർ നിശ്ചലമായിരിക്കുമ്പോൾ, അതിന്റെ ഡാഷ്‌ബോർഡ് താഴ്ത്തി ഡ്രൈവറുടെ ഏരിയ ഒരു സീറ്റിംഗ് കോർണറായി മാറ്റാം. വിഷൻ അർബനോട്ട് കൺസെപ്റ്റിൽ നിങ്ങൾക്ക് ഒരു ലിവിംഗ് റൂം സജ്ജീകരിക്കാം. വ്യത്യസ്തമായ മ്യൂസിക്, ആംബിയന്റ് ലൈറ്റിംഗ്, ഇൻസ്ട്രുമെന്റ് ക്ലസ്റ്റർ ഇന്റർഫേസുകൾ എന്നിവയും നിർമ്മാതാക്കൾ നൽകുന്നു. പൂർണ്ണമായും വെർച്വൽ പ്രോട്ടോടൈപ്പ് ആയതിനാൽ മോഡലിനെക്കുറിച്ച് കൂടുതൽ വിവരങ്ങൾ ഇതുവരെ ലഭ്യമല്ല.
മിനി വിഷൻ കൺസെപ്റ്റ് ഒരു ഓൾ-ഇലക്ട്രിക് വാനാണ്. ഓട്ടോണമസ് ഡ്രൈവിംഗ് ടെക്കും ഇതിലുണ്ട്. കൂടുതൽ വിശദമായ സാങ്കേതിക സവിശേഷതകൾ കമ്പനി ഇതുവരെ വെളിപ്പെടുത്തിയിട്ടില്ല. മിനി വിഷൻ അർബനോട്ട് കൺസെപ്റ്റ് തികച്ചും ഫ്യൂച്ചറിസ്റ്റ് വാനായിരിക്കാം എന്നും റിപ്പോര്‍ട്ടുകളുണ്ട്.
