പുതിയ നോട്ടുമായി നിസാന്‍
ഇ-പവർ ഹൈബ്രിഡ് സാങ്കേതികവിദ്യ വാഹനത്തില്‍ അവതരിപ്പിക്കും.
ജപ്പാനിൽ ഏറ്റവും കൂടുതൽ വിറ്റഴിക്കപ്പെടുന്ന നിസാന്‍റെ കോംപാക്റ്റ് കാറാണ് നോട്ട്. പുതിയ ഹൈബ്രിഡ് ഡ്രൈവ് സാങ്കേതികവിദ്യ ഉൾപ്പെടുത്തി ഈ വാഹനത്തിന്‍റെ പുനർരൂപകൽപ്പന പതിപ്പ് ഡിസംബറില്‍ വിപണിയിലെത്തിക്കുമെന്ന് നിസാൻ മോട്ടോർ കോ ലിമിറ്റഡ് അറിയിച്ചതായി ഹിന്ദുസ്ഥാന്‍ ടൈംസ് റിപ്പോര്‍ട്ട് ചെയ്യുന്നു. ടൊയോട്ട മോട്ടോർ കോർപ്പറേഷന്റെയും ഹോണ്ട മോട്ടോർ കോ ലിമിറ്റഡിന്റെയും വിപണി വിഹിതം പിടിച്ചെടുക്കുകയാണ് കമ്പനിയുടെ ലക്ഷ്യം.
ഇ-പവർ ഹൈബ്രിഡ് സാങ്കേതികവിദ്യ വാഹനത്തില്‍ അവതരിപ്പിക്കും. വാഹനത്തിന് കരുത്ത് പകരുന്ന ബാറ്ററി ചാർജ് ചെയ്യാൻ ഗ്യാസോലിൻ എഞ്ചിൻ ഉപയോഗിക്കുന്നു. കാറിന്റെ നാവിഗേഷൻ സിസ്റ്റത്തിൽ നിന്നുള്ള ഡാറ്റ ഉപയോഗിച്ച് വളവുകളിൽ വേഗത കുറയ്ക്കാൻ ഡ്രൈവർമാരെ പുതിയ സെല്‍ഫ് ഡ്രൈവ് പ്രവർത്തനങ്ങൾ സഹായിക്കും.
മാർച്ച് 31 വരെ 340 ബില്യൺ യെൻ (3.25 ബില്യൺ ഡോളർ) പ്രവർത്തന നഷ്ടം രേഖപ്പെടുത്തിയ നിസ്സാൻ ഉൽപാദന ശേഷിയും മോഡൽ നമ്പറുകളും അഞ്ചിലൊന്നായി കുറയ്ക്കുകയാണ്. മൂന്ന് വർഷത്തിനുള്ളിൽ പ്രവർത്തന ചെലവ് 300 ബില്യൺ യെൻ കുറയ്ക്കുകയാണ് ലക്ഷ്യമിടുന്നത്.
അതേസമയം, പരിസ്ഥിതി ബോധമുള്ള ഡ്രൈവർമാരെ ആകർഷിക്കുന്നതിനായി പുതിയ ഇലക്ട്രിക് വാഹനങ്ങൾ ഉൾപ്പെടെ ജപ്പാൻ, ചൈന, അമേരിക്ക എന്നിവിടങ്ങളിൽ നിരവധി വാഹനങ്ങൾ പുറത്തിറക്കുമെന്ന് വാഗ്ദാനം ചെയ്തിട്ടുണ്ട്.
ജപ്പാനിൽ, ഫ്രഞ്ച് സഖ്യ പങ്കാളി റെനോ എസ്‌എയ്‌ക്കൊപ്പം രൂപകൽപ്പന ചെയ്ത പ്ലാറ്റ്ഫോം ഉപയോഗിക്കുന്ന നോട്ട് ടൊയോട്ടയുടെ യാരിസ്, ഹോണ്ടയുടെ ഫിറ്റ് എന്നിവയുമായി മത്സരിക്കും. പുനർരൂപകൽപ്പന ചെയ്ത വാഹനം മറ്റ് വിപണികളിൽ വിൽക്കുന്നതിൽ തീരുമാനമെടുത്തിട്ടില്ലെന്ന് നിസാൻ വക്താവ് വ്യക്തമാക്കിയതായാണ് റിപ്പോര്‍ട്ടുകള്‍.
