പുതിയ ടാറ്റ ആൾട്രോസ്; എന്തൊക്കെ മാറ്റങ്ങൾ? ഇതാ അറിയേണ്ടതെല്ലാം

ടാറ്റ മോട്ടോഴ്‌സ് പുതിയ ആൾട്രോസ് പുറത്തിറക്കി. മികച്ച ഡിസൈൻ, ആഡംബര ഇന്റീരിയർ, നൂതന സവിശേഷതകൾ എന്നിവയാൽ ശ്രദ്ധേയമാണ് ഈ കാർ. 6.89 ലക്ഷം രൂപ മുതലാണ് വില ആരംഭിക്കുന്നത്.

2025 Tata Altroz

ഇന്ത്യയിലെ മുൻനിര ഓട്ടോമൊബൈൽ നിർമ്മാതാക്കളായ ടാറ്റ മോട്ടോഴ്‌സ് കഴിഞ്ഞ ദിവസമാണ് പുതിയ ആൾട്രോസ് പുറത്തിറക്കിയത്. ശ്രദ്ധേയമായ രൂപകൽപന, ആഡംബരപൂർണ്ണമായ ഇന്റീരിയറുകൾ, നൂതന സവിശേഷതകൾ തുടങ്ങിയ മാറ്റങ്ങൾ പുതിയ ആൾട്രോസിൽ വന്നിട്ടുണ്ട്. ഈ കാറിന്റെ പ്രാരംഭ എക്സ്-ഷോറൂം വില വെറും 6.89 ലക്ഷം രൂപയായി ആയി നിശ്ചയിച്ചിരിക്കുന്നു എന്നതാണ് ശ്രദ്ധേയം. ഈ കാറിന്‍റെ ചില വിശേഷങ്ങൾ അറിയാം.

ഡിസൈൻ
പുതിയ ആൾട്രോസിന്റെ രൂപകൽപ്പനയെക്കുറിച്ച് പറയുമ്പോൾ, ടാറ്റ ആൾട്രോസിന്റെ ഡിസൈൻ കൂടുതൽ മെച്ചപ്പെടുത്തിയിട്ടുണ്ട്. പുതിയ ഫ്രണ്ട് ഗ്രിൽ, എൽഇഡി ഫോഗ് ലാമ്പുകൾ ഉള്ള ട്വിൻ പോഡ് എൽഇഡി ഹെഡ്‌ലൈറ്റുകൾ, പുതിയ ആകർഷകമായ ഫ്രണ്ട് ബമ്പർ എന്നിവ ഉപയോഗിച്ച് കമ്പനി ഇപ്പോൾ ഇതിന് കൂടുതൽ മികച്ച രൂപം നൽകിയിട്ടുണ്ട്. ഈ വിഭാഗത്തിൽ ആദ്യമായി, ടാറ്റ മോട്ടോഴ്‌സ് വ്യത്യസ്ത നിറങ്ങളിലുള്ള ഔട്ട്‌സൈഡ് റിയർവ്യൂ മിററുകൾ, ഡ്യുവൽ-ടോൺ 16 ഇഞ്ച് അലോയ് വീലുകൾ, ഫ്ലഷ് ഡോർ ഹാൻഡിലുകൾ എന്നിവ ഉപയോഗിച്ച് സ്‌പോർട്ടി സ്‍പർശം ചേർത്തിരിക്കുന്നു. പുതിയ ആൾട്രോസിൽ ഇപ്പോൾ കണക്റ്റഡ് എൽഇഡി ടെയിൽ ലൈറ്റുകൾ അല്ലെങ്കിൽ കമ്പനി ഇതിനെ ഇൻഫിനിറ്റി ലാമ്പുകൾ എന്ന് വിളിക്കുന്നു.

നാല് വേരിയന്‍റുകൾ
സ്‍മാർട്ട്, പ്യുവർ, ക്രിയേറ്റീവ്, അക്കംപ്ലിഷ്ഡ് എസ് എന്നീ നാല് വേരിയന്റുകളിലാണ് ആൾട്രോസ് പുറത്തിറക്കിയിരിക്കുന്നത്. ജൂൺ 2 മുതൽ ഈ കാറിന്റെ ബുക്കിംഗ് ആരംഭിക്കും.

പൂർണ നവീകരണം
ഏറ്റവും പ്രധാനപ്പെട്ട കാര്യം ടാറ്റ പുതിയ ആൾട്രോസിനെ പൂർണ്ണമായും നവീകരിച്ചു എന്നതാണ്. ടാറ്റയുടെ നിരവധി പ്രീമിയം സവിശേഷതകൾ ഇപ്പോൾ ഇതിലേക്ക് ചേർത്തിട്ടുണ്ട്. ഇന്ത്യൻ വിപണിയിൽ മാരുതി ബലേനോ, ഹ്യുണ്ടായി I20, ടൊയോട്ട ഗ്ലാൻസ, മാരുതി സ്വിഫ്റ്റ് എന്നിവയുമായി ഈ കാർ മത്സരിക്കുന്നു. ഇപ്പോൾ പുതിയ സവിശേഷതകൾ വരുന്നതോടെ അതിന്റെ കഴിവുകൾ കൂടുതൽ ശക്തമാകും.

സുരക്ഷ
ഈ വിഭാഗത്തിലെ ഏറ്റവും സുരക്ഷിതമായ ഹാച്ച്ബാക്കുകളിൽ ഒന്നാണ് ആൾട്രോസ്. ഗ്ലോബൽ NCAP ക്രാഷ് ടെസ്റ്റിൽ മുതിർന്നവർക്കുള്ള സുരക്ഷാ റേറ്റിംഗിൽ 5-സ്റ്റാർ റേറ്റിംഗും കുട്ടികളുടെ സുരക്ഷാ റേറ്റിംഗിൽ 4-സ്റ്റാർ റേറ്റിംഗും ലഭിച്ച ആൽഫ RC പ്ലാറ്റ്‌ഫോമിലാണ് ഇത് നിർമ്മിച്ചിരിക്കുന്നത്. 2025 ആൾട്രോസിൽ 6 എയർബാഗുകൾ, SOS എമർജൻസി കോളിംഗ്, ഉയരം ക്രമീകരിക്കാവുന്ന സീറ്റ് ബെൽറ്റുകൾ, ഇലക്ട്രോണിക് സ്റ്റെബിലിറ്റി പ്രോഗ്രാം (ESP), ക്യാമറയുള്ള റിവേഴ്‌സ് പാർക്കിംഗ് സെൻസറുകൾ, ചൈൽഡ് സീറ്റുകൾക്കുള്ള ഐസോഫിക്സ്  ആങ്കറേജുകൾ തുടങ്ങിയവ സ്റ്റാൻഡേർഡായി ലഭിക്കും.

ഫീച്ചറുകൾ
നാവിഗേഷൻ മാപ്പ് വ്യൂ ഉള്ള ഡിജിറ്റൽ ഇൻസ്ട്രുമെന്റ് ക്ലസ്റ്റർ പോലുള്ള ക്യാബിൻ സവിശേഷതകളുള്ള 10.25 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം ഇപ്പോൾ ആൾട്രോസിന് ലഭിക്കും. ഇതിന് പുതിയ രണ്ട് സ്‌പോക്ക് ഇല്യൂമിനേറ്റഡ് സ്റ്റിയറിംഗ് വീൽ ഉണ്ട്. ഇത് ഇപ്പോൾ ടാറ്റയുടെ പ്രീമിയം കാറുകളിൽ ലഭ്യമാണ്. വയർലെസ് ഫോൺ ചാർജർ, വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ, ക്ലൈമറ്റ് കൺട്രോൾ, ക്രൂയിസ് കൺട്രോൾ, കണക്റ്റഡ് ടെക്, എയർ പ്യൂരിഫയർ, റിയർ എസി വെന്റുകൾ, ഓട്ടോ-ഡിമ്മിംഗ് ഇന്റേണൽ റിയർവ്യൂ മിറർ എന്നിവയുണ്ട്. 2025 ആൾട്രോസ് ഫെയ്‌സ്‌ലിഫ്റ്റിൽ കൂടുതൽ സുഖസൗകര്യങ്ങൾക്കായി പുതുതായി രൂപകൽപ്പന ചെയ്ത സീറ്റുകളും ഉണ്ട്.

ഡീസലിൽ വരുന്ന ഒരേയൊരു ഹാച്ച്ബാക്ക്
മൂന്ന് വ്യത്യസ്‍ത എഞ്ചിൻ ഓപ്ഷനുകളിൽ ആൾട്രോസ് ഫെയ്‌സ്‌ലിഫ്റ്റ് ലഭ്യമാണ്.  1.2 ലീറ്റർ റെവോട്രോൺ പെട്രോൾ എൻജിനും 1.2 ലീറ്റർ ഐ സിഎൻ ജി എൻജിനുമുണ്ട് അൾട്രോസിൽ. കൂടാതെ 1.5 ലീറ്റർ റെവോട്രോൺ ഡീസൽ എഞ്ചിനും ഉണ്ട്. അഞ്ച് സ്‍പീഡ് മാനുവൽ, അഞ്ച് സ്‍പീഡ് എഎംടി, 6 സ്പീഡ് ഡ്യുവൽ-ക്ലച്ച് ഓട്ടോമാറ്റിക്ക് ഗിയർബോക്സുകളും ആൾട്രോസിനുണ്ട്. ഡീസൽ എൻജിനിൽ എത്തുന്ന ഏക പ്രിമീയം ഹാച്ച്ബാക്കാണ് പുത്തൻ ആൾട്രോസ്.