അടുത്ത തലമുറ ടാറ്റ ഹാരിയർ, സഫാരികള്‍ക്ക് 1.5 ലിറ്റർ ടർബോ പെട്രോൾ എഞ്ചിൻ ലഭിച്ചേക്കും
ഈ രണ്ട് എഞ്ചിനുകളും 2024 മുതൽ പുറത്തിറക്കുന്ന സിയറ, ഹാരിയർ, സഫാരി, കർവ്വ് എസ്‌യുവികൾക്ക് കരുത്ത് പകരും.
2023 ഓട്ടോ എക്‌സ്‌പോയിൽ ടാറ്റ മോട്ടോഴ്‌സ് രണ്ട് പുതിയ ടർബോ പെട്രോൾ എഞ്ചിനുകൾ അവതരിപ്പിച്ചു. ഈ രണ്ട് എഞ്ചിനുകളും 2024 മുതൽ പുറത്തിറക്കുന്ന സിയറ, ഹാരിയർ, സഫാരി, കർവ്വ് എസ്‌യുവികൾക്ക് കരുത്ത് പകരും. പവർട്രെയിനുകൾ മാത്രമല്ല, ടാറ്റ മോട്ടോഴ്‌സ് പുതിയ സിയറ, ഹാരിയർ ഇവി, കർവ്വ് കൺസെപ്‌റ്റുകളും ഓട്ടോ ഇവന്റിൽ വെളിപ്പെടുത്തിയിട്ടുണ്ട്.
പുതിയ 1.2 ലിറ്റർ 3-സിലിണ്ടർ ടർബോചാർജ്ഡ് പെട്രോൾ എഞ്ചിനും 1.5 ലിറ്റർ 4-സിലിണ്ടർ ടർബോചാർജ്ഡ് പെട്രോൾ എഞ്ചിനും ടാറ്റ മോട്ടോഴ്‌സ് വെളിപ്പെടുത്തി. ഈ എഞ്ചിനുകൾ അലൂമിനിയം ഉപയോഗിച്ചാണ് നിർമ്മിക്കുന്നത്, മെച്ചപ്പെട്ട പ്രകടനവും മികച്ച ഇന്ധനക്ഷമതയും വാഗ്ദാനം ചെയ്യുന്നുവെന്ന് അവകാശപ്പെടുന്നു. പുതിയ 1.2 എൽ ഡയറക്ട് ഇഞ്ചക്ഷൻ ടർബോ പെട്രോൾ എഞ്ചിന് 5,000 ആർപിഎമ്മിൽ 125 ബിഎച്ച്പിയും 1,700 നും 3,500 ആർപിഎമ്മിനും ഇടയിൽ 225 എൻഎം ടോർക്കും ഉത്പാദിപ്പിക്കാൻ കഴിയും.
1.5 ലിറ്റർ 4-സിലിണ്ടർ ഡയറക്ട് ഇഞ്ചക്ഷൻ ടർബോ പെട്രോൾ എഞ്ചിന് 5,000 ആർപിഎമ്മിൽ 170 ബിഎച്ച്പി കരുത്തും 2000 ആർപിഎമ്മിനും 3500 ആർപിഎമ്മിനും ഇടയിൽ 280 എൻഎം പീക്ക് ടോർക്കും ഉത്പാദിപ്പിക്കാൻ കഴിയും. രണ്ട് എഞ്ചിനുകളിലും മാനുവൽ, ഓട്ടോമാറ്റിക് ഗിയർബോക്സുകൾ നൽകും.
1.2L ടർബോ പെട്രോൾ എഞ്ചിൻ 2024-ൽ കര്‍വ്വ് എസ്‍യുവി കൂപ്പെയിൽ അരങ്ങേറും. 1.5L എഞ്ചിൻ ആദ്യം സിയറയുടെ ICE പതിപ്പിൽ വാഗ്ദാനം ചെയ്യും. പുതിയ ടാറ്റ സിയറ 2025-ൽ പുറത്തിറക്കാനാണ് പദ്ധതിയിടുന്നത്. ഹാരിയർ & സഫാരി ഫെയ്‌സ്‌ലിഫ്റ്റുകൾക്കൊപ്പം പുതിയ 1.5 എൽ എഞ്ചിനും നൽകുമെന്ന് റിപ്പോർട്ട് അവകാശപ്പെടുന്നു. അടുത്ത തലമുറ സഫാരിക്കും ഹാരിയറിനും ഈ എഞ്ചിൻ ലഭിക്കുമെന്ന് പ്രതീക്ഷിക്കുന്നു. ഈ ടർബോ പെട്രോൾ എഞ്ചിൻ കര്‍വ്വ് എസ്‍യുവി കൂപ്പെയ്‌ക്കൊപ്പം നൽകാനും സാധ്യതയുണ്ട്.
