ചൈനയോട് മുട്ടാനുള്ള ടാറ്റ ഭീമന്റെ വരവ് അല്പ്പം വൈകും, കാരണം
മോഡലിന്റെ പ്രൊഡക്ഷന് പതിപ്പിന്റെ ഉള്പ്പെടെ നിരവധി തവണ വാഹനത്തിന്റെ പരീക്ഷണയോട്ടത്തിന്റെ ചിത്രങ്ങള് പുറത്തുവന്നിരുന്നു. ചൈനീസ് വാഹന നിര്മ്മാതാക്കളായ എംജിയുടെ ഹെക്ടര് പ്ലസിന്റെ മുഖ്യ എതിരാളിയായിരിക്കും ടാറ്റയുടെ ഈ വാഹനം.
ടാറ്റയുടെ ജനപ്രിയ എസ്യുവി ഹാരിയറിന്റെ ഏഴ് സീറ്റർ വകഭേദം ഗ്രാവിറ്റാസിനെ കാത്തിരിക്കുകയാണ് രാജ്യത്തെ വാഹനപ്രേമികള്. ഈ വർഷം ഉത്സവ സീസണിൽ അരങ്ങേറ്റം കുറിക്കാനായിരുന്നു ടാറ്റയുടെ പദ്ധതി. എന്നാൽ ഇതില് മാറ്റങ്ങൾ സംഭവിച്ചിരിക്കുകയാണെന്നാണ് പുതിയ റിപ്പോർട്ടുകൾ. 2021 ന്റെ തുടക്കത്തിലാകും ഗ്രാവിറ്റാസ് നിരത്തിലേക്ക് എത്തുകയെന്നാണ് സൂചന.
കൊവിഡ് 19 മൂലമുള്ള നിലവിലെ വിപണി സാഹചര്യവും സാമ്പത്തിക ബുദ്ധിമുട്ടുകളും ഉപഭോക്താക്കളെ പിന്നോട്ടുവലിക്കുന്നതിനാൽ ഒരു പുതിയ മോഡലിനെ പരിചയപ്പെടുത്താൻ ശരിയായ സമയമല്ല ഇതെന്ന വിലയിരുത്തലുകളെ തുടര്ന്നാണ് കമ്പനിയുടെ പിന്മാറ്റം എന്നാണ് റിപ്പോര്ട്ടുകള്.
മോഡലിന്റെ പ്രൊഡക്ഷന് പതിപ്പിന്റെ ഉള്പ്പെടെ നിരവധി തവണ വാഹനത്തിന്റെ പരീക്ഷണയോട്ടത്തിന്റെ ചിത്രങ്ങള് പുറത്തുവന്നിരുന്നു. ചൈനീസ് വാഹന നിര്മ്മാതാക്കളായ എംജിയുടെ ഹെക്ടര് പ്ലസിന്റെ മുഖ്യ എതിരാളിയായിരിക്കും ടാറ്റയുടെ ഈ വാഹനം.
ടാറ്റയും ജാഗ്വാര് ലാന്ഡ് റോവറും സംയുക്തമായി വികസിപ്പിച്ച ഒമേഗ പ്ലാറ്റ്ഫോമിലാണ് സെവന് സീറ്റര് എസ്യുവിയുടെയും നിര്മ്മാണം. നിലവില് അഞ്ച് സീറ്ററാണ് ഹാരിയര്. ഇതിന്റെ ഇൻറീരിയറിൽ ഒരുനിര സീറ്റ് കൂടി അധികമായി ഉൾപ്പെടുത്തിയാവും ഗ്രാവിറ്റാസ് എത്തുക.
അഞ്ച് സീറ്റര് എസ്യുവിയായ ഹാരിയറിന്റെ വിപുലീകൃത പതിപ്പാണ് പുതിയ ആറ് സീറ്റര് ഗ്രാവിറ്റാസ്. ആറ്, ഏഴ് സീറ്റ് ഘടനയില് വാഹനം വിപണിയില് ലഭ്യമാകും. ആറ് സീറ്റര് പതിപ്പിന് രണ്ടാം നിരയില് ക്യാപ്റ്റന് സീറ്റുകളും ഏഴ് സീറ്റര് മോഡലില് രണ്ടാമത്തെയും മൂന്നാമത്തെയും വരിയില് ബെഞ്ച് തരത്തിലുള്ള സീറ്റുകള് ഉണ്ടാകും.
18 ഇഞ്ച് ഡ്യുവല് ടോണ് അലോയി വീലുകള്, ഇന്റഗ്രേറ്റഡ് റൂഫ് റെയില്സ്, ഓട്ടോമാറ്റിക് ബൈ-സെനോണ് ഹെഡ്ലാമ്പുകള്, ഇലക്ട്രിക് പാര്ക്കിംഗ് ബ്രേക്ക്, 8.8 ഇഞ്ച് ടച്ച്സ്ക്രീന് ഇന്ഫോടെയ്ന്മെന്റ് സിസ്റ്റം, ഫാന് സ്പീഡ് കണ്ട്രോള് ഉള്ള എസി വെന്റുകളും മൂന്നാം നിരയില് യുഎസ്ബി ചാര്ജിംഗ് പോര്ട്ടും വാഹനത്തില് കമ്പനി ഉള്പ്പെടുത്തിയേക്കുമെന്നും റിപ്പോര്ട്ടുകളുണ്ട്.
2.0 ലിറ്റർ ഡീസൽ എൻജിനാണ് ഗ്രാവിറ്റാസിന്റെയും ഹൃദയം എന്ന് നേരത്തെ റിപ്പോര്ട്ടുകളുണ്ടായിരുന്നു. പക്ഷേ ട്യൂണിങ്ങിൽ മാറ്റം വരുത്തി കൂടുതൽ കരുത്ത് നൽകിയേക്കും എന്നും സൂചനകളുണ്ട്.
ഈ ബിഎസ് 6 എൻജിൻ 170 പിഎസ് പവറും 350 എന്എം ടോർക്കും സൃഷ്ടിക്കും. ആറ് സ്പീഡ് മാനുവലാണ് ട്രാൻസ്മിഷൻ. ഹ്യുണ്ടായിയുടെ സഹകരണത്തോടെ വികസിപ്പിച്ച ആറ് സ്പീഡ് ഓട്ടോമാറ്റിക് ട്രാൻസിഷനും വാഹനത്തിലുണ്ടാകും. പെട്രോൾ എൻജിനിലും വാഹനം എത്തിയേക്കുമെന്നും റിപ്പോർട്ടുകളുണ്ട്.
ടാറ്റ മോട്ടോർസിന്റെ പ്രീമിയം വാഹന ശ്രേണി വികസിപ്പിക്കുന്നതിന് ആറ് സീറ്റർ എസ്യുവി തീർച്ചയായും സഹായിക്കും. എംജി ഹെക്ടര് പ്ലസിനെ കൂടാതെ മഹീന്ദ്ര XUV500, ഹ്യുണ്ടായി ക്രെറ്റയുടെ ഏഴു സീറ്റര് പതിപ്പ് എന്നിവരാകും ഗ്രാവിറ്റാസിന്റെ മുഖ്യ എതിരാളികള്. 15 ലക്ഷം രൂപ മുതല് 22 ലക്ഷം രൂപ വരെ വാഹനത്തിന് വില പ്രതീക്ഷിക്കാം എന്നാണ് റിപ്പോര്ട്ടുകള്.