പുത്തന് ബൈക്കുമായി ട്രയംഫ്
ബ്രിട്ടീഷ് ഇരുചക്ര വാഹന നിർമാതാക്കളായ ട്രയംഫ് മോട്ടോർസൈക്കിൾസ് ട്രൈഡന്റ് എന്ന മോഡലുമായി എത്തുന്നു
ബ്രിട്ടീഷ് ഇരുചക്ര വാഹന നിർമാതാക്കളായ ട്രയംഫ് മോട്ടോർസൈക്കിൾസ് ട്രൈഡന്റ് എന്ന മോഡലുമായി എത്തുന്നതായി മോട്ടോ ഒക്ടേന് റിപ്പോര്ട്ട് ചെയ്യുന്നു.
കമ്പനിയുടെ റോഡ്സ്റ്റർ ശ്രേണിയിയിലെ ഏറ്റവും വിലക്കുറവുള്ള മോഡൽ ആയി അവതരിപ്പിച്ചിരിക്കുന്ന ട്രൈഡന്റ് 660-യ്ക്ക് റോഡ്സ്റ്റർ, സ്ട്രീറ്റ് ഫൈറ്റർ ബൈക്കുകളുടെ ഒരു സങ്കര ഡിസൈൻ ആണ്. വൃത്താകൃതിയിലുള്ള ഹെഡ്ലാംപ്, ഉയരം കൂടിയ ഹാൻഡിൽ ബാർ, എടുത്തുകാട്ടുന്ന ഫ്രെയിം, ബോഡി ഘടകങ്ങൾ കുറഞ്ഞ പിൻഭാഗം എന്നിവ ട്രയംഫ് ട്രൈഡന്റ് 660-യുടെ സ്പോർട്ടി ലുക്ക് പൂർണമാക്കുന്നു.
ട്രയംഫിന്റെ ഹിൻക്ലിയിലെ ഡിസൈൻ ടീം തയ്യാറാക്കിയ ട്രയംഫ് ട്രൈഡന്റിൽ പ്രശസ്ത ഇറ്റാലിയൻ ബൈക്ക് ഡിസൈനറായ റോഡോൾഫോ ഫ്രെസ്കോളി ആണ് അവസാനവട്ട മിനുക്കുപണികൾ നടത്തിയത്.
ഇൻലൈൻ 3 സിലിണ്ടർ 660 സിസി എൻജിനാണ് ട്രയംഫ് ട്രൈഡന്റ് 660യുടെ ഹൃദയം. 81 എച്ച്പി പവറും 64 എൻഎം ടോർക്കുമാണ് ഈ എൻജിൻ ഉത്പാദിപ്പിക്കുന്നത്. ക്വിക്ക് ഷിഫ്റ്റർ ഓപ്ഷണലായി ചേർക്കാവുന്ന 6-സ്പീഡ് ഗിയർബോക്സ് ആണ് ഈ എഞ്ചിനുമായി ബന്ധിപ്പിച്ചിരിക്കുന്നത്.
ഷോവയുടെ അപ്പ്സൈഡ് ഡൗൺ മുൻ സസ്പെൻഷനും മോണോഷോക്ക് പിൻ സസ്പെൻഷനുമാണ് ട്രൈഡന്റ് 660-യ്ക്ക്. 310 എംഎം ട്വിൻ ഡിസ്ക് മുൻപിലും സിംഗിൾ ഡിസ്ക് പുറകിലും ക്രമീകരിച്ചിട്ടുണ്ട്. ട്യൂബുലാർ സ്റ്റീൽ ഫ്രയ്മിൽ നിർമിച്ചിരിക്കുന്ന ട്രൈഡന്റ് 660-യ്ക്ക് 189 കിലോഗ്രാം മാത്രമാണ് ഭാരം.
ട്രയംഫ് ബൈക്കുകളുടെ കൂട്ടത്തിൽ ഇത്തിരിക്കുഞ്ഞൻ ആണെങ്കിലും ഫീച്ചറുകളുടെ കാര്യത്തിൽ ഒട്ടും പുറകിലല്ല ട്രൈഡന്റ് 660. റോഡ്, റൈൻ എന്നിങ്ങനെ രണ്ട് റൈഡിങ് മോഡുകൾ, ക്രമീകരിക്കാവുന്ന ട്രാക്ഷൻ കൺട്രോൾ, റൈഡ്-ബൈ-വയർ, പൂർണ്ണ-ഡിജിറ്റൽ ഇൻസ്ട്രുമെന്റ് ക്ലസ്റ്റർ എന്നിങ്ങനെയാണ് ഫീച്ചറുകളുടെ നിര. ടേൺ-ബൈ-ടേൺ നാവിഗേഷൻ, ഗോപ്രോ കണ്ട്രോൾ എന്നിവ നൽകുന്ന ബ്ലൂടൂത്ത് മൊഡ്യൂൾ ഓപ്ഷണലായി തിരഞ്ഞെടുക്കാം എന്നാണ് റിപ്പോര്ട്ടുകള്.