24 മണിക്കൂർകൊണ്ട് 4000 കിലോമീറ്റർ, റെക്കോർഡിട്ട് മഹീന്ദ്ര XUV700
24 മണിക്കൂർകൊണ്ട് 4000 കിലോമീറ്റർ സഞ്ചരിച്ച് റെക്കോർഡിട്ടാണ് മഹീന്ദ്ര എക്സ് യു വി 700 ഇപ്പോള്‍ ശ്രദ്ധേയമാകുന്നതെന്ന് കാര്‍ ടോഖ് റിപ്പോര്‍ട്ട് ചെയ്യുന്നു
മഹീന്ദ്ര ആന്‍ഡ് മഹീന്ദ്രയുടെ (Mahindra And Mahindra) പുതിയ ഫ്ലാഗ്ഷിപ്പ് എസ്‍യുവിയായ എക്സ്യുവി700 (XUV700) അടുത്തിടൊണ് വിപണിയില്‍ എത്തിയത്. തുടങ്ങി വെറും 57 മിനിറ്റിനുള്ളിൽ 25,000 പ്രീ-ബുക്കിംഗുകൾ ലഭിക്കുകയും ആറ് മാസത്തിനുള്ളില്‍ പ്രതീക്ഷിച്ച ബുക്കിങ്ങുകള്‍ രണ്ട് ദിവസങ്ങളിലായി വെറും മൂന്ന് മണിക്കൂറില്‍ നേടുകയും ചെയ്‍ത വാഹനം വീണ്ടും വാര്‍ത്തകളില്‍ നിറയുകയാണ്.
24 മണിക്കൂർകൊണ്ട് 4000 കിലോമീറ്റർ സഞ്ചരിച്ച് റെക്കോർഡിട്ടാണ് മഹീന്ദ്ര എക്സ് യു വി 700 ഇപ്പോള്‍ ശ്രദ്ധേയമാകുന്നതെന്ന് കാര്‍ ടോഖ് റിപ്പോര്‍ട്ട് ചെയ്യുന്നു. ഇവോ ഇന്ത്യ സംഘടിപ്പിച്ച സ്പീഡ് എൻഡുറൻസ് ചാലഞ്ചിലാണ് ദേശീയ റെക്കോർഡ് മഹീന്ദ്ര തകർത്തത്. 2016 ൽ സ്ഥാപിതമായ 3,161 കിലോമീറ്ററിന്റെ റെക്കോർഡാണ് പഴങ്കഥയായത്. മഹീന്ദ്രയുടെ തന്നെ സ്പീഡ് ട്രാക്കിലായിരുന്നു പരീക്ഷണം. ഫെഡറേഷൻ ഓഫ് മോട്ടോർ സ്പോർട്സ് ഇൻ ഇന്ത്യ പ്രതിനിധികളാണ് റെക്കോർഡ് ഓട്ടം നിരീക്ഷിക്കാനെത്തിയത്.
നാല് എക്സ് യു വി 700 കളാണ് മത്സരത്തിൽ പങ്കെടുത്തത്. അതിൽ ഡീസൽ മാനുവൽ മോഡൽ 4,384.73 കി.മീ ദൂരം സഞ്ചരിച്ചു. ഡീസൽ ഓട്ടോമാറ്റിക് മോഡൽ 4256.12 കിലോമീറ്റർ സഞ്ചരിച്ചു. പെട്രോൾ മാനുവൽ 4232.01 കിലോമീറ്ററും ഒാേട്ടാമാറ്റിക് 4155.65 കിലോമീറ്ററും സഞ്ചരിച്ചു. ഇന്ധനം നിറക്കാനും ഡ്രൈവറെ മാറ്റാനും മാത്രമാണ് മത്സരത്തിനിടെ വാഹനങ്ങൾ നിർത്തിയത്. മണിക്കൂറിൽ 170 മുതൽ 180 കി.മീ വരെ ശരാശരി വേഗമാണ് എക്സ് യു വിക്ക് ലഭിച്ചത്. ഇതോടെ ഇന്ത്യ ബുക്സ് ഓഫ് റെക്കോർഡ്സിൽ XUV700 ഇടംപിടിച്ചെന്നാണ് റിപ്പോര്‍ട്ടുകള്‍.
മഹീന്ദ്രയുടെ W601 മോണോകോക്ക് പ്ലാറ്റ്ഫോമിലാണ് എക്സ്യുവി 700 ഒരുങ്ങിയിരിക്കുന്നത്. MX, AX3, AX5, AX7 എന്നീ നാല് വേരിയന്റുകളില്‍ ഓട്ടോമാറ്റിക്-മാനുവല്‍ ട്രാന്‍സ്‍മിഷനുകളില്‍ ഒമ്പത് മോഡലുകളായാണ് XUV700 വില്‍പ്പനയ്ക്ക് എത്തുന്നത്. മുന്‍ഗാമിയെക്കാള്‍ വലിപ്പക്കാരനാണ് ഈ വാഹനം. 4695 എം.എം. നീളം, 1890 എം.എം. വീതി, 1755 എം.എം. ഉയരം 2750 എം.എം. വീല്‍ബേസ് എന്നിങ്ങനെയാണ് എക്സ്യുവി 700-ന്റെ അളവുകള്‍. പുതിയ ഡിസൈനില്‍ ഒരുങ്ങിയിട്ടുള്ള ഗ്രില്ല്, സി ഷേപ്പ് ഡി.ആര്‍.എല്‍, എല്‍.ഇ.ഡി. ഹെഡ്ലാമ്പ്, പുതിയ ഡിസൈനിനൊപ്പം സ്പോര്‍ട്ടി ഭാവവും നല്‍കി ഒരുങ്ങിയിട്ടുള്ള 17,18 ഇഞ്ച് അലോയി വീല്‍, എല്‍.ഇ.ഡി. ടെയ്ല്‍ലൈറ്റ് എന്നിവയാണ് എക്സ്റ്റീരിയറിനെ സമ്പന്നമാക്കുന്നു.
2.0 ലിറ്റര്‍ പെട്രോള്‍, 2.2 ലിറ്റര്‍ ഡീസല്‍ എന്നീ എന്‍ജിനുകളാണ് ഈ വാഹനത്തിന്‍റെ ഹൃദയം. പെട്രോള്‍ എന്‍ജിന്‍ 197 ബി.എച്ച്.പി കരുത്തും 380 എന്‍എം ടോര്‍ക്കും സൃഷ്‍ടിക്കും. ഡീസല്‍ എന്‍ജിന്‍ 153, 182 ബി.എച്ച്.പി. പവറും 360, 420 എന്‍.എം. ടോര്‍ക്കുമാണ് ഇത് ഉത്പാദിപ്പിക്കുന്നത്. ഓട്ടോമാറ്റിക്-മാനുവല്‍ ട്രാന്‍സ്മിഷനുകളും ഇതിലുണ്ട്. കര്‍ട്ടണ്‍ എയര്‍ബാഗ്, 360 ഡിഗ്രി ക്യാമറ, ഐസോഫിക്‌സ് സീറ്റ് മൗണ്ട്, ഹില്‍ ഹോള്‍ഡ് കണ്‍ട്രോള്‍, ഹില്‍ ഡിസെന്റ് കണ്‍ട്രോള്‍, ഇലക്ട്രോണിക് പാര്‍ക്കിങ്ങ് ബ്രേക്ക്, ഡൈനാമിക് സ്റ്റെബിലിറ്റി പ്രോഗ്രാം എന്നിവയാണ് ഈ വാഹനത്തിലെ സുരക്ഷാസംവിധാനങ്ങള്‍.
അഡ്രേനോക്‌സ് കണക്ടഡ് കാര്‍ സാങ്കേതികവിദ്യ, സോണിയുടെ ത്രീഡി സൗണ്ട്, സ്മാര്‍ട്ട് ഡോര്‍ ഹാന്‍ഡില്‍, 360 ഡിഗ്രി സറൗണ്ട് വ്യൂ, ബ്ലൈന്‍ഡ് വ്യൂ മോണിറ്ററിങ്ങ്, ഇലക്ട്രോണിക് പാര്‍ക്ക് ബ്രേക്ക്, വയര്‍ലെസ് ചാര്‍ജിങ്ങ് തുടങ്ങിയ ഫീച്ചറുകളെല്ലാം ഈ ഓപ്ഷണലായി നല്‍കുന്ന ലക്ഷ്വറി പാക്കിലാണ് ഒരുക്കിയിട്ടുള്ളത്. മെമ്മറി ഫങ്ഷനുള്ള ആറ് രീതിയില്‍ ഇലക്ട്രിക്കലി അഡ്ജസ്റ്റ് ചെയ്യാവുന്ന ഡ്രൈവര്‍ സീറ്റ്, പനോരമിക് സണ്‍റൂഫ്, ഉയര്‍ന്ന വേരിയന്റില്‍ ഡ്യുവല്‍ ഡിസ്പ്ലേ 10.25 ഇഞ്ച് വലിപ്പവും താഴ്ന്ന വേരിയന്റില്‍ ഏഴ് ഇഞ്ച് വലിപ്പവുമുള്ള ഇന്‍ഫോടെയ്ന്‍മെന്റ് സ്‌ക്രീന്‍, ഡിജിറ്റല്‍ ഇന്‍സ്ട്രുമെന്റ് ക്ലെസ്റ്റര്‍, ആന്‍ട്രോയിഡ് ഓട്ടോ-ആപ്പിള്‍ കാര്‍പ്ലേ സംവിധാനങ്ങള്‍ക്കൊപ്പം 60 കണക്ടഡ് ഫീച്ചറുകള്‍, അഡ്വാന്‍സ്ഡ് ഡ്രൈവര്‍ അസിസ്റ്റന്‍സ് സംവിധാനം തുടങ്ങിയവയാണ് ഫീച്ചറുകളാണ്.
ഒക്ടോബര്‍ ഏഴാം തിയതിയാണ് XUV700-ന്റെ ബുക്കിംഗ് മഹീന്ദ്ര ആരംഭിക്കുന്നത്. ആദ്യം ബുക്കുചെയ്യുന്ന 25,000 വാഹനങ്ങള്‍ക്ക് പ്രത്യേകം വില ആയിരിക്കുമെന്ന് മഹീന്ദ്ര അറിയിച്ചിരുന്നു. വില കുറവ് ഉറപ്പുനല്‍കിയിരുന്ന 25,000 വാഹനങ്ങളുടെയും ബുക്കിങ്ങ് ബുക്കിങ്ങ് തുറന്ന് ഒരു മണിക്കൂര്‍ തികയുന്നതിന് മുമ്പ് പൂര്‍ത്തിയാകുകയായിരുന്നു. പിന്നീട് പ്രാരംഭമായി നല്‍കിയിരുന്ന ഓഫര്‍ വില അവസാനിച്ചതായി അറിയിക്കുകയും 50,000 രൂപ വരെ ഉയര്‍ത്തി പുതിയ വില പ്രഖ്യാപിക്കുകയുമായിരുന്നു.
മാത്രമല്ല, ബുക്കിങ്ങിന്റെ രണ്ടാം ദിവസം വില ഉയര്‍ന്നിട്ടും അവസ്ഥയില്‍ പ്രത്യേകം മാറ്റമുണ്ടായില്ല. ആദ്യദിനം 57 മിനിറ്റ് കൊണ്ടാണ് 25,000 ആളുകള്‍ ബുക്ക് ചെയ്തത്. എന്നാൽ, രണ്ടാം ദിനം 25,000-ത്തില്‍ എത്താന്‍ രണ്ട് മണിക്കൂര്‍ മാത്രമാണ് വേണ്ടി വന്നത്. ഇതോടെ രണ്ട് ദിവസങ്ങളിലായി 50,000 ബുക്കിങ്ങുകളാണ് XUV700-ന് ലഭിച്ചിട്ടുള്ളത്. ആറ് മാസത്തേക്കണ് 50,000 യൂണിറ്റ് വില്‍ക്കാന്‍ മഹീന്ദ്ര ഉദ്ദേശിച്ചിരുന്നത് എന്നാണ് റിപ്പോര്‍ട്ടുകള്‍.
