ഇന്ത്യൻ വിപണിയിൽ ജൂണിൽ ഏറ്റവും കൂടുതൽ വിറ്റഴിക്കപ്പെട്ട കോംപാക്റ്റ് എസ്‌യുവികളുടെ പട്ടികയിൽ മാരുതി സുസുക്കി ബ്രെസ ഒന്നാമതെത്തി. 

ഇന്ത്യൻ വിപണിയിൽ ഏറ്റവും കൂടുതൽ വിറ്റഴിക്കപ്പെടുന്നത് കോംപാക്റ്റ് എസ്‌യുവികളാണ്. നാല് മീറ്ററിൽ താഴെ നീളമുള്ള ഈ വാഹനങ്ങളാണ് താങ്ങാനാവുന്ന വില കാരണം ആളുകൾ ഇഷ്‍ടപ്പെടുന്നത്. ജൂണിൽ ഏറ്റവും കൂടുതൽ വിറ്റഴിക്കപ്പെട്ട 4 മീറ്ററിൽ താഴെയുള്ള കോംപാക്റ്റ് എസ്‌യുവിയെക്കുറിച്ച് പരിശോധിക്കുമ്പോൾ മാരുതി സുസുക്കി ബ്രെസ വീണ്ടും ഒന്നാം സ്ഥാനത്ത് തുടർന്നു. ടാറ്റ നെക്‌സോൺ, പഞ്ച്, മഹീന്ദ്ര XUV 3XO, ഹ്യുണ്ടായി വെന്യു, കിയ സോനെറ്റ് എന്നിവയുൾപ്പെടെയുള്ള ജനപ്രിയ വാഹനങ്ങളെ ബ്രെസ പിന്നിലാക്കി. നിങ്ങൾ ഒരു പുതിയ എസ്‌യുവി വാങ്ങുന്നതിനെക്കുറിച്ച് ചിന്തിക്കുന്നുണ്ടെങ്കിൽ, കഴിഞ്ഞ മാസത്തെ മികച്ച 10 കോംപാക്റ്റ് എസ്‌യുവികളുടെ വിൽപ്പന കണക്കുകൾ പരിശോധിക്കുക.

മാരുതി സുസുക്കി ബ്രെസ

കോംപാക്റ്റ് എസ്‌യുവി വിഭാഗത്തിൽ മാരുതി സുസുക്കി ബ്രെസ വീണ്ടും ആധിപത്യം നിലനിർത്തി. 2025 ജൂണിൽ 14,507 യൂണിറ്റ് വിൽപ്പനയോടെ, കഴിഞ്ഞ വർഷത്തെ അപേക്ഷിച്ച് 10 ശതമാനം അതിശയകരമായ വളർച്ചയാണ് ഇത് രേഖപ്പെടുത്തിയത്. മാരുതി സുസുക്കി ബ്രെസയുടെ എക്‌സ്-ഷോറൂം വില 8.69 ലക്ഷം രൂപയിൽ ആരംഭിക്കുന്നു. ഇത് പെട്രോൾ, സിഎൻജി ഓപ്ഷനുകളിൽ ലഭ്യമാണ്.

ടാറ്റ നെക്സോൺ

ടാറ്റ നെക്‌സോൺ രണ്ടാം സ്ഥാനം നേടി. പക്ഷേ 2025 ജൂണിൽ വിൽപ്പനയിൽ നാല് ശതമാനം നേരിയ ഇടിവ് നേരിട്ടു. 11,602 യൂണിറ്റ് നെക്സോണുകൾ ജൂണിൽ വിൽപ്പന നടത്തി. നെക്‌സോൺ അതിന്റെ അഞ്ച് സ്റ്റാർ സുരക്ഷാ റേറ്റിംഗ്, ബോൾഡ് ഡിസൈൻ, പെട്രോൾ, ഡീസൽ, ഇലക്ട്രിക് പവർട്രെയിൻ ഓപ്ഷനുകൾ എന്നിവയ്ക്ക് പേരുകേട്ടതാണ്.

ടാറ്റ പഞ്ച്

കഴിഞ്ഞ മാസം ടാറ്റ പഞ്ച് വിൽപ്പനയിൽ വലിയ തിരിച്ചടി നേരിട്ടു. 2025 ജൂണിൽ 10,446 യൂണിറ്റുകൾ വിറ്റഴിച്ചതോടെ, കഴിഞ്ഞ വർഷം ജൂണിനെ അപേക്ഷിച്ച് 43 ശതമാനം വൻ ഇടിവാണ് രേഖപ്പെടുത്തിയത്. മൈക്രോ-എസ്‌യുവി വിഭാഗത്തിൽ ശക്തമായ തുടക്കത്തിനുശേഷം പഞ്ച് ഇപ്പോൾ കടുത്ത മത്സരം നേരിടുന്നു.

മാരുതി സുസുക്കി ഫ്രോങ്ക്സ്

മാരുതി സുസുക്കി ഫ്രോങ്ക്സ് തങ്ങളുടെ സ്ഥാനം ശക്തിപ്പെടുത്തി. 2025 ജൂണിൽ 9,815 യൂണിറ്റുകളുടെ വിൽപ്പനയോടെ ഒരു ശതമാനം നേരിയ വളർച്ച രേഖപ്പെടുത്തി. ബലേനോ അധിഷ്ഠിതമായ ഈ കൂപ്പെ-എസ്‌യുവി അതിന്റെ സ്റ്റൈലിഷ് ഡിസൈൻ, മാരുതിയുടെ വിശ്വാസ്യത, ബൂസ്റ്റർജെറ്റ് എഞ്ചിൻ ഓപ്ഷൻ തുടങ്ങിയവ ഉപഭോക്താക്കളെ ആകർഷിക്കുന്നു.

മഹീന്ദ്ര XUV 3XO

മഹീന്ദ്ര XUV 3XO യുടെ വിൽപ്പന 17 ശതമാനം ഇടിവോടെ 2025 ജൂണിൽ 7089 യൂണിറ്റുകളായി കുറഞ്ഞു. XUV300 ന്റെ ഈ അപ്‌ഡേറ്റ് ചെയ്ത മോഡൽ നിരവധി പുതിയ സവിശേഷതകളും മെച്ചപ്പെട്ട ഇന്റീരിയറുകളും ഉൾക്കൊള്ളുന്നു. എന്നാൽ വിൽപ്പനയിലെ ഇടിവ് വിപണിയിൽ സ്ഥാനം പിടിക്കാൻ കൂടുതൽ ശ്രമങ്ങൾ നടത്തേണ്ടിവരുമെന്ന് കാണിക്കുന്നു.

ഹ്യുണ്ടായി വെന്യു

കഴിഞ്ഞ മാസം ഹ്യുണ്ടായി വെന്യു വിൽപ്പനയിൽ വലിയ ഇടിവ് നേരിട്ടു. 2025 ജൂണിൽ 6,858 യൂണിറ്റുകൾ വിറ്റഴിച്ചതോടെ, കഴിഞ്ഞ വർഷത്തെ അപേക്ഷിച്ച് 31 ശതമാനം വലിയ ഇടിവാണ് രേഖപ്പെടുത്തിയത്.

കിയ സോനെറ്റ്

2025 ജൂണിൽ കിയ സോണറ്റിന് 6,658 യൂണിറ്റുകളുടെ വിൽപ്പനയുമായി 32 ശതമാനം വാർഷിക ഇടിവ് നേരിട്ടു. ആകർഷകമായ ഡിസൈൻ, പ്രീമിയം സവിശേഷതകൾ, കണക്റ്റഡ് കാർ സാങ്കേതികവിദ്യ എന്നിവയ്ക്ക് സോണറ്റ് പേരുകേട്ടതാണ്.

ഹ്യുണ്ടായ് എക്‌സ്റ്റർ

2025 ജൂണിൽ ഹ്യുണ്ടായി എക്‌സ്റ്റർ 5,873 യൂണിറ്റുകൾ വിറ്റഴിച്ചു, കഴിഞ്ഞ വർഷത്തെ അപേക്ഷിച്ച് 15 ശതമാനം ഇടിവ് രേഖപ്പെടുത്തി. ബോക്‌സി ഡിസൈൻ, സുരക്ഷാ സവിശേഷതകൾ, സൺറൂഫ് പോലുള്ള സവിശേഷതകൾ എന്നിവയാൽ ഈ മൈക്രോ-എസ്‌യുവി ഉപഭോക്താക്കളെ ആകർഷിക്കുന്നു.

സ്കോഡ കൈലാക്

2025 ജൂണിൽ 3,196 യൂണിറ്റുകൾ വിൽപ്പന നടത്തി സ്കോഡ കൈലാഖ് കോം‌പാക്റ്റ് എസ്‌യുവി വിഭാഗത്തിൽ ഒമ്പതാം സ്ഥാനത്തെത്തി. ശക്തമായ നിർമ്മാണ നിലവാരം, ഡ്രൈവിംഗ് ഡൈനാമിക്സ് എന്നിവയിലൂടെ വിപണിയിൽ കൈലാഖ് ശ്രദ്ധേയമാകുന്നു.

ടൊയോട്ട ടൈസർ

ടൊയോട്ടയുടെ താങ്ങാനാവുന്ന വിലയുള്ള എസ്‌യുവിയായ അർബൻ ക്രൂയിസർ ടൈസറിന്റെ വിൽപ്പന 24 ശതമാനം ഇടിവ് നേരിട്ടു, 2025 ജൂണിൽ 2,408 യൂണിറ്റുകൾ വിൽപ്പന നടത്തി. മാരുതി ഫ്രോങ്ക്‌സിന്റെ റീബാഡ്‍ജ് ചെയ്ത പതിപ്പാണിത്.