ഇന്ത്യൻ മിഡ്സൈസ് എസ്യുവി സെഗ്മെന്റിലേക്ക് ഹ്യുണ്ടായി ബയോൺ എന്ന പുതിയ മോഡൽ 2027 ഒക്ടോബറിൽ എത്തും. 9 മുതൽ 14 ലക്ഷം രൂപ വരെ വില പ്രതീക്ഷിക്കുന്ന വാഹനത്തിൽ പെട്രോൾ, സിഎൻജി ഓപ്ഷനുകൾ ലഭ്യമാകും. മികച്ച ഫീച്ചറുകളും എഡിഎഎസ് ഉൾപ്പെടെയുള്ള സുരക്ഷാ സംവിധാനങ്ങളുമായാണ് ഈ വാഹനം വിപണി കീഴടക്കാൻ ഒരുങ്ങുന്നത്.
മിഡ്സൈസ് എസ്യുവി സെഗ്മെന്റിൽ മത്സരം കടുപ്പിക്കാൻ പുതിയ മോഡലുമായി ഹ്യുണ്ടായി എത്തുന്നു. ഹ്യുണ്ടായി ബയോൺ എന്ന പേരിലുള്ള പുതിയ എസ്യുവി ഫെസ്റ്റിവൽ സീസണിനോട് അനുബന്ധിച്ച് 2027 ഒക്ടോബറിൽ ഇന്ത്യൻ വിപണിയിലെത്തുമെന്നാണ് റിപ്പോർട്ടുകൾ. 2026 ഒക്ടോബർ 12ന് നടക്കുന്ന പാരിസ് മോട്ടോർ ഷോയിൽ വാഹനത്തിന്റെ ആഗോള അരങ്ങേറ്റം നടക്കും. വാഹനത്തിന്റെ ബുക്കിങ് ഇതിനകം ആരംഭിച്ചതായും റിപ്പോർട്ടുകളുണ്ട്. 11,000 രൂപ ടോക്കൺ തുക നൽകി ഓൺലൈനിലൂടെയോ ഹ്യുണ്ടായിയുടെ അംഗീകൃത ഡീലർഷിപ്പുകളിലൂടെയോ ബയോൺ ബുക്ക് ചെയ്യാം.
വിക്ടോറിസിനേക്കാൾ നീളം കുറവ്
ഏകദേശം 4.2 മീറ്റർ നീളമായിരിക്കും പുതിയ ഹ്യുണ്ടായി ബയോണിന്. ഇതോടെ ഈ വിഭാഗത്തിലെ താരതമ്യേന ചെറിയ എസ്യുവിയായി ബയോൺ മാറും. പ്രധാന എതിരാളിയായ മാരുതി സുസുക്കി വിക്ടോറിസിന് ഏകദേശം 4.3 മീറ്റർ നീളമുണ്ട്. സ്കോഡ കുഷാക്ക്, ഫോക്സ്വാഗൺ ടൈഗൺ തുടങ്ങിയ മോഡലുകളേക്കാളും ബയോൺ വലുപ്പത്തിൽ ചെറുതായിരിക്കും. സബ്-4 മീറ്റർ എസ്യുവിയായ വെന്യുവിനും വലുപ്പം കൂടുമെന്ന് പ്രതീക്ഷിക്കുന്ന അടുത്ത തലമുറ ക്രെറ്റയ്ക്കും ഇടയിലായിരിക്കും ബയോണിന്റെ സ്ഥാനം.
വിലയിൽ ഞെട്ടിക്കാൻ ഹ്യുണ്ടായി?
വിലയുടെ കാര്യത്തിലും ഹ്യുണ്ടായി ആക്രമണാത്മക സമീപനം സ്വീകരിക്കുമെന്നാണ് പ്രതീക്ഷ. 9 ലക്ഷം രൂപ മുതൽ 14 ലക്ഷം രൂപ വരെ എക്സ്-ഷോറൂം വിലയിലാണ് ബയോൺ എത്തുകയെന്നാണ് റിപ്പോർട്ടുകൾ. ഈ വിലനിലവാരം യാഥാർഥ്യമായാൽ മാരുതി വിക്ടോറിസ് ഉൾപ്പെടെയുള്ള എതിരാളികൾക്ക് ബയോൺ ശക്തമായ മത്സരം നൽകും. മാരുതി ബ്രെസ, കിയ സൈറോസ്, മഹീന്ദ്ര XUV 3XO തുടങ്ങിയ സബ്-4 മീറ്റർ എസ്യുവികളുടെ ഉയർന്ന വേരിയന്റുകളെയും ബയോണിന്റെ വില സ്വാധീനിച്ചേക്കാം.
Related Articles
പെട്രോളിനൊപ്പം സിഎൻജിയും
1.5 ലിറ്റർ, നാല് സിലിണ്ടർ നാച്ചുറലി ആസ്പിറേറ്റഡ് പെട്രോൾ എൻജിനായിരിക്കും ബയോണിന് കരുത്തേകുക. ക്രെറ്റ, കിയ സെൽറ്റോസ്, ഹ്യുണ്ടായി വെർണ എന്നിവയിലും ഉപയോഗിക്കുന്ന ഈ എൻജിൻ 114 ബിഎച്ച്പി കരുത്തും 144 എൻഎം ടോർക്കും നൽകും. ആറ് സ്പീഡ് മാനുവൽ, സിവിടി ഓട്ടോമാറ്റിക് ഗിയർബോക്സ് ഓപ്ഷനുകൾ ലഭിക്കുമെന്നാണ് പ്രതീക്ഷ. പെട്രോൾ പതിപ്പിന് പുറമെ ഫാക്ടറി ഫിറ്റഡ് സിഎൻജി പതിപ്പും ഹ്യുണ്ടായി അവതരിപ്പിച്ചേക്കും. അണ്ടർബോഡി സിഎൻജി സജ്ജീകരണമായിരിക്കും വാഹനത്തിൽ ഉപയോഗിക്കുകയെന്നാണ് സൂചന. നാല് മീറ്ററിന് മുകളിൽ നീളമുള്ള ഹ്യുണ്ടായിയുടെ ആദ്യ ഫാക്ടറി ഫിറ്റഡ് സിഎൻജി മോഡലായും ബയോൺ മാറും.
ഫീച്ചറുകൾ ഒട്ടേറെ
12.3 ഇഞ്ച് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം, 12.3 ഇഞ്ച് ഡിജിറ്റൽ ഡ്രൈവർ ഡിസ്പ്ലേ, ഓട്ടോമാറ്റിക് ക്ലൈമറ്റ് കൺട്രോൾ, ഇലക്ട്രിക്കലി അഡ്ജസ്റ്റബിൾ ഡ്രൈവർ സീറ്റ്, വെന്റിലേറ്റഡ് ഫ്രണ്ട് സീറ്റുകൾ എന്നിവ ബയോണിൽ പ്രതീക്ഷിക്കാം. പനോരമിക് സൺറൂഫ്, ലെതറെറ്റ് സീറ്റുകൾ, മൾട്ടി-ഫങ്ഷണൽ സ്റ്റിയറിങ് വീൽ എന്നിവയും വാഹനത്തിലുണ്ടാകും.
സുരക്ഷയ്ക്കും പ്രാധാന്യം
സുരക്ഷയുടെ കാര്യത്തിലും ബയോണിൽ ഫീച്ചറുകൾക്ക് കുറവുണ്ടാകില്ല. ആറ് എയർബാഗുകൾ, ഇലക്ട്രോണിക് സ്റ്റബിലിറ്റി കൺട്രോൾ, ട്രാക്ഷൻ കൺട്രോൾ എന്നിവയ്ക്കൊപ്പം ലെവൽ 2 ADAS സംവിധാനവും വാഹനത്തിൽ ലഭിക്കുമെന്നാണ് പ്രതീക്ഷ. വ്യത്യസ്തമായ ക്രോസ്ഓവർ എസ്യുവി ഡിസൈൻ, വിശാലമായ ക്യാബിൻ, പെട്രോൾ-സിഎൻജി ഓപ്ഷനുകൾ, മത്സരാധിഷ്ഠിത വില എന്നിവയിലൂടെ നഗര ഉപഭോക്താക്കളെയാണ് ഹ്യുണ്ടായി ബയോണിലൂടെ ലക്ഷ്യമിടുന്നത്.
