2025 ജൂലൈയിൽ കിയ 22,135 കാറുകൾ വിറ്റഴിച്ചു, മുൻ വർഷത്തെ അപേക്ഷിച്ച് എട്ട് ശതമാനം വർധന. കിയ കാരൻസ് ക്ലാവിസിന്റെ വരവ് ഈ വളർച്ചയ്ക്ക് കാരണമായി.
2025 ജൂലൈ മാസത്തിലെ വിൽപ്പന കണക്കുകൾ പുറത്തുവരുമ്പോൾ മികച്ച നേട്ടവുമായി ദക്ഷിണ കൊറിയൻ വാഹന ബ്രാൻഡായ കിയ ഇന്ത്യ. കഴിഞ്ഞ മാസം കമ്പനി ആകെ 22,135 കാറുകൾ വിറ്റു. ഈ കാലയളവിൽ, കിയയുടെ കാർ വിൽപ്പനയിൽ വാർഷികാടിസ്ഥാനത്തിൽ എട്ട് ശതമാനം വർധനവ് രേഖപ്പെടുത്തി. കൃത്യം ഒരു വർഷം മുമ്പ്, അതായത് 2024 ജൂലൈയിൽ, ഈ കണക്ക് 20,507 യൂണിറ്റായിരുന്നു. കിയയുടെ പുതുതായി പുറത്തിറക്കിയ കാരൻസ് ക്ലാവിസ് ലൈനപ്പ് ഈ വളർച്ചയ്ക്ക് മികച്ച സംഭാവന നൽകി എന്നാണ് റിപ്പോർട്ടുകൾ.
അടുത്തിടെയാണ് കമ്പനി തങ്ങളുടെ ജനപ്രിയ എംപിവിയായ കിയ കാരൻസ് ന്റെ പുതുക്കിയ പതിപ്പ് പുറത്തിറക്കിയത്. ഇതിന് വിപണിയിൽ കിയ കാരൻസ് ക്ലാവിസ് എന്ന് പേരിട്ടു. ഇതിനുപുറമെ, കിയ കാരൻസ് ക്ലാവിസിന്റെ ഇലക്ട്രിക് പതിപ്പും കമ്പനി വിപണിയിൽ പുറത്തിറക്കിയിട്ടുണ്ട്. കിയ കാരൻസ് ക്ലാവിസ് ഇവി ഒറ്റ ചാർജിൽ ഏകദേശം 500 കിലോമീറ്റർ റേഞ്ച് ഉപഭോക്താക്കൾക്ക് നൽകുമെന്ന് കമ്പനി അവകാശപ്പെടുന്നു.
2025 ജൂണിൽ കിയ കാരെൻസ് ക്ലാവിസ് കമ്പനിയുടെ ഏറ്റവും കൂടുതൽ വിറ്റഴിക്കപ്പെട്ട മോഡലായി മാറി. 2025 ജൂണിൽ കിയ കാരെൻസ് ക്ലാവിസ് ആകെ 7,921 യൂണിറ്റ് എംപിവി വിറ്റു. അതേസമയം 2024 ജൂണിൽ ഈ എംപിവിക്ക് 5,154 ഉപഭോക്താക്കളെ ലഭിച്ചു. ഈ കാലയളവിൽ, കിയ കാരെൻസ് ക്ലാവിസിന്റെ വിൽപ്പനയിൽ വാർഷികാടിസ്ഥാനത്തിൽ 54 ശതമാനം വർധനവ് ഉണ്ടായി.
ഇന്ത്യൻ ഉപഭോക്താക്കൾ കിയയിൽ തുടർന്നും അർപ്പിക്കുന്ന വിശ്വാസത്തെയാണ് സ്ഥിരമായ വിൽപ്പന പ്രകടനം പ്രതിഫലിപ്പിക്കുന്നതെന്ന് കിയ ഇന്ത്യയുടെ ചീഫ് സെയിൽസ് ഓഫീസർ ജൂൻസോ ചോ പറഞ്ഞു. ഉപഭോക്തൃ ആവശ്യങ്ങൾ നിറവേറ്റുന്ന ഉയർന്ന നിലവാരമുള്ളതും സവിശേഷതകളാൽ സമ്പന്നവുമായ വാഹനങ്ങൾ വിതരണം ചെയ്യുന്നതിനുള്ള കിയയുടെ പ്രതിബദ്ധതയാണ് ഈ സ്ഥിരതയെ നയിക്കുന്നതെന്നും അദ്ദേഹം വ്യക്തമാക്കി.
2017 ഏപ്രിലിൽ ആന്ധ്രാപ്രദേശ് സർക്കാരുമായി ഉണ്ടാക്കിയ ധാരണാപത്രത്തിലൂടെയാണ് കിയ ഇന്ത്യ അനന്തപൂർ ജില്ലയിൽ ഒരു പ്ലാന്റ് നിർമ്മിച്ച് നിർമ്മാണ സാന്നിദ്ധ്യം സ്ഥാപിച്ചത്. 2019 ഓഗസ്റ്റിൽ 300,000 യൂണിറ്റുകളുടെ സ്ഥാപിത വാർഷിക ഉൽപ്പാദന ശേഷിയോടെ കമ്പനി വൻതോതിൽ ഉത്പാദനം ആരംഭിച്ചു.
നൂതന ഉൽപ്പന്നങ്ങളിലൂടെയും സേവനങ്ങളിലൂടെയും അർത്ഥവത്തായ ഉപഭോക്തൃ അനുഭവങ്ങളിൽ ശ്രദ്ധ കേന്ദ്രീകരിച്ചുകൊണ്ട്, 2021 ഏപ്രിലിൽ കമ്പനി "മൂവ്മെന്റ് ദാറ്റ് ഇൻസ്പയേഴ്സ്" എന്ന ഐഡന്റിറ്റിക്ക് കീഴിൽ റീബ്രാൻഡ് ചെയ്തു. സെൽറ്റോസ്, സിറോസ്, സോണെറ്റ്, കാരൻസ്, കാർണിവൽ, ഇവി6, ഇവി9, കാരൻസ് ക്ലാവിസ്, പുതിയ കാരൻസ് ക്ലാവിസ് ഇവി തുടങ്ങിയവ ഉൾപ്പെടെ ഒമ്പത് വാഹനങ്ങളാണ് കിയ ഇന്ത്യ നിലവിൽ ഇന്ത്യൻ വിപണിയിൽ വാഗ്ദാനം ചെയ്യുന്നത്.
