ന്യൂഡൽഹി: ടാറ്റയുടെ വില കുറഞ്ഞ കാര്‍ മോഡലായ നാനോ നഗരത്തിലെ ട്രാഫിക്​ വർധിപ്പിക്കുക മാത്രമാണ്​ ചെയ്​തതെന്ന കുറ്റപ്പെടുത്തലുമായി കേന്ദ്രമന്ത്രി. കേന്ദ്ര ഉപരിതല ഗതാഗത വകുപ്പ്​ ​മന്ത്രി മൻസുക്​ മൻഡാവിയയാണ് നാനോയ്ക്കെതിരെ രംഗത്തു വന്നത്. ഡൽഹിയിലെ സ്വകാര്യ ചടങ്ങിൽ വെച്ചാണ്​ മന്ത്രിയുടെ അഭിപ്രായ പ്രകടനം.

സുസ്​ഥിര നഗര ഗതാഗതത്തെ കുറിച്ചുള്ള സെമിനാറിൽ പ്രസംഗിക്കുകയായിരുന്നു മന്ത്രി. നമുക്ക്​ സുസ്​ഥിരമായ നഗര ഗതാഗത സംവിധാനമാണ്​ വേണ്ടത്. രാജ്യത്തിന്​ ഏറ്റവും അനുയോജ്യം ഇത്തരം സംവിധാനങ്ങളാണ്.

എല്ലാവരും ജൈവ ഇന്ധനത്തെ കുറിച്ചും ഇലക്​ട്രിക്​, ​ഹൈബ്രിഡ്​ വാഹനങ്ങളെക്കുറിചും നിരന്തരമായി സംസാരിക്കുന്നുണ്ട്​. പല പ്രമുഖ വ്യക്​തികളും സൈക്കിളുകൾ കൂടുതലായി ഉപയോഗിക്കുന്നതിനുള്ള പ്രചാരണം നടത്തുന്നുണ്ടെന്നും കൂടുതൽ പേർ ഈ പ്രചാരണവുമായി മുന്നോട്ട്​ വന്നാൽ അത്​ രാജ്യത്തിന്​ ഗുണകരമാവുമെന്നും മന്ത്രി പറഞ്ഞു.