ഇന്ത്യൻ വിപണി ലക്ഷ്യമിട്ട് ഹോണ്ട 10 പുതിയ ഇരുചക്ര വാഹനങ്ങൾ പ്രഖ്യാപിച്ചു. ഇതിൽ ഏഴ് പുതിയ മോഡലുകളും മൂന്ന് പരിഷ്കരിച്ച പതിപ്പുകളും ഉൾപ്പെടുന്നു. അഡ്വഞ്ചർ സ്കൂട്ടറായ എഡിവി160, റോഡ്സ്റ്റർ സിബി500, ക്രൂയിസർ റെബൽ സീരീസ്, ഇലക്ട്രിക് സ്കൂട്ടറായ ക്യൂസി3 എന്നിവയാണ് പ്രധാന ആകർഷണങ്ങൾ.
ഇന്ത്യൻ ഇരുചക്ര വാഹന വിപണിയിലെ സാന്നിധ്യം കൂടുതൽ ശക്തമാക്കാൻ ഒരുങ്ങി ജാപ്പനീസ് ജനപ്രിയ ടൂവീലർ ബ്രാൻഡായ ഹോണ്ട മോട്ടോർസൈക്കിൾ ആൻഡ് സ്കൂട്ടർ ഇന്ത്യ. പുതിയ ഉൽപ്പന്ന പദ്ധതികളുടെ ഭാഗമായി 10 പുതിയ ടൂവീലർ മോഡലുകളാണ് കമ്പനി പ്രഖ്യാപിച്ചിരിക്കുന്നത്. ഇതിൽ ഏഴ് പൂർണമായും പുതിയ മോഡലുകളും മൂന്ന് പരിഷ്കരിച്ച മോഡലുകളും ഉൾപ്പെടുന്നു. സ്കൂട്ടറുകൾ, റോഡ്സ്റ്ററുകൾ, ക്രൂയിസർ ബൈക്കുകൾ, അഡ്വഞ്ചർ മോട്ടോർസൈക്കിളുകൾ, ഇലക്ട്രിക് സ്കൂട്ടറുകൾ, ഫ്ലെക്സ്-ഫ്യുവൽ സാങ്കേതികവിദ്യയുള്ള വാഹനങ്ങൾ എന്നിവ ഉൾപ്പെടുന്ന വിപുലമായ നിരയിലൂടെ വിപണിയിലെ എല്ലാ പ്രധാന വിഭാഗങ്ങളിലും ശക്തമായ സാന്നിധ്യം ഉറപ്പിക്കുകയാണ് ഹോണ്ടയുടെ ലക്ഷ്യം.
ഹോണ്ട എഡിവി160
പുതിയ നിരയിലെ പ്രധാന ആകർഷണങ്ങളിലൊന്നാണ് ഹോണ്ട എഡിവി160. 160 സിസി ലിക്വിഡ് കൂൾഡ് എഞ്ചിനുമായാണ് ഈ അഡ്വഞ്ചർ സ്കൂട്ടർ എത്തുന്നത്. 27 ലിറ്റർ അണ്ടർ സീറ്റ് സ്റ്റോറേജ്, 8.1 ലിറ്റർ ഇന്ധന ടാങ്ക് എന്നിവയാണ് വാഹനത്തിന്റെ പ്രധാന സവിശേഷതകൾ. ഇ85 ഫ്ലെക്സ് ഫ്യുവൽ സാങ്കേതികവിദ്യയുമായി എത്തുന്ന ഇന്ത്യയിലെ ആദ്യ സ്കൂട്ടറാകാനുള്ള സാധ്യതയും എഡിവി160-ന് ഉണ്ടെന്നാണ് റിപ്പോർട്ടുകൾ.
ഹോണ്ട സിബി500
റോഡ്സ്റ്റർ വിഭാഗത്തിൽ ഉപഭോക്താക്കളെ ലക്ഷ്യമിട്ടാണ് ഹോണ്ട സിബി500 എത്തുന്നത്. 501 സിസി സിംഗിൾ സിലിണ്ടർ ഓയിൽ കൂൾഡ് എഞ്ചിനാണ് ബൈക്കിന് കരുത്തേകുന്നത്. റെട്രോ ശൈലിയും ആധുനിക സാങ്കേതികവിദ്യയും സമന്വയിപ്പിച്ച ഡിസൈനാണ് വാഹനത്തിന്റെ പ്രത്യേകത. വ്യത്യസ്ത ഗ്രാഫിക്സ്, വീൽ ഓപ്ഷനുകൾ എന്നിവയിലും ഈ മോഡൽ ലഭ്യമാകും.
Related Articles
ഹോണ്ട റെബൽ 300, റെബൽ 500 ക്രൂയിസർ ബൈക്ക് വിഭാഗത്തിലേക്ക് റെബൽ 300, റെബൽ 500 എന്നീ മോഡലുകളുമായി ഹോണ്ട എത്തും. റെബൽ 300-ൽ 286 സിസി ലിക്വിഡ് കൂൾഡ് എഞ്ചിനാണ് ഉപയോഗിച്ചിരിക്കുന്നത്. സ്റ്റാൻഡേർഡ്, ഇ-ക്ലച്ച് ട്രാൻസ്മിഷൻ ഓപ്ഷനുകളും ലഭിക്കും. റെബൽ 500-ൽ 471 സിസി ട്വിൻ സിലിണ്ടർ എഞ്ചിനാണ് നൽകിയിരിക്കുന്നത്. ദീർഘദൂര യാത്രകൾക്ക് അനുയോജ്യമായ ക്രൂയിസർ അനുഭവമാണ് ഈ മോഡലുകൾ ലക്ഷ്യമിടുന്നത്.
ഹോണ്ട എക്സ്ആർ300എൽ, എക്സ്ആർ300 റാലി
ഓഫ് റോഡ് യാത്രകൾക്കും അഡ്വഞ്ചർ റൈഡിംഗിനും പ്രാധാന്യം നൽകുന്ന ഉപഭോക്താക്കൾക്കായി എക്സ്ആർ300എൽ, എക്സ്ആർ300 റാലി മോഡലുകളും കമ്പനി അവതരിപ്പിക്കും. 293.5 സിസി എഞ്ചിൻ, കരുത്തുറ്റ സസ്പെൻഷൻ സംവിധാനം എന്നിവയാണ് ഈ ബൈക്കുകളുടെ പ്രധാന പ്രത്യേകതകൾ. ദീർഘദൂര യാത്രകൾക്കും മോശം റോഡ് സാഹചര്യങ്ങൾക്കും കൂടുതൽ അനുയോജ്യമായ രീതിയിലാണ് എക്സ്ആർ300 റാലി ഒരുക്കുന്നത്.
ഹോണ്ട ക്യൂസി3
ഇലക്ട്രിക് സ്കൂട്ടർ ഇലക്ട്രിക് വാഹന രംഗത്തും സാന്നിധ്യം ശക്തമാക്കാനാണ് ഹോണ്ടയുടെ നീക്കം. ഇതിനായി ക്യൂസി3 എന്ന പുതിയ ഇലക്ട്രിക് സ്കൂട്ടറും കമ്പനി അവതരിപ്പിച്ചിട്ടുണ്ട്. 3 കിലോവാട്ട് അവറിന്റെ ബാറ്ററി പാക്കാണ് വാഹനത്തിൽ ഉപയോഗിക്കുന്നത്. ഒറ്റ ചാർജിൽ 151 കിലോമീറ്റർ വരെ സഞ്ചരിക്കാൻ കഴിയുമെന്നാണ് കമ്പനിയുടെ അവകാശവാദം. 32 ലിറ്റർ അണ്ടർ സീറ്റ് സ്റ്റോറേജും കുടുംബ ഉപഭോക്താക്കളെ ലക്ഷ്യമിട്ടുള്ളതാണ്.
സിബി350 ശ്രേണിക്കും പുതിയ നിറങ്ങൾ
നിലവിൽ ജനപ്രിയമായ സിബി350, സിബി350സി, സിബി350ആർഎസ് മോഡലുകൾക്കും ഹോണ്ട പുതിയ നിറങ്ങൾ അവതരിപ്പിച്ചിട്ടുണ്ട്. എന്നാൽ ഈ മോഡലുകളിൽ മെക്കാനിക്കൽ മാറ്റങ്ങളൊന്നും വരുത്തിയിട്ടില്ല. പുതിയ കളർ ഓപ്ഷനുകൾ വഴി ഉപഭോക്താക്കൾക്ക് കൂടുതൽ തിരഞ്ഞെടുപ്പ് നൽകുകയാണ് കമ്പനിയുടെ ലക്ഷ്യം.
വിലയും ലോഞ്ചും
പിന്നീട് പുതിയ മോഡലുകളുടെ വിലയും കൃത്യമായ ലോഞ്ച് സമയക്രമവും ഹോണ്ട ഇതുവരെ പ്രഖ്യാപിച്ചിട്ടില്ല. വരും മാസങ്ങളിൽ ഘട്ടംഘട്ടമായി വാഹനങ്ങൾ ഇന്ത്യൻ വിപണിയിലെത്തുമെന്നാണ് പ്രതീക്ഷിക്കുന്നത്. പുതിയ അഡ്വഞ്ചർ ബൈക്കുകൾ, ക്രൂയിസറുകൾ, ഇലക്ട്രിക് സ്കൂട്ടറുകൾ എന്നിവയിലൂടെ ഇന്ത്യയിലെ ഇരുചക്ര വാഹന വിപണിയിൽ കൂടുതൽ ശക്തമായ മത്സരത്തിനാണ് ഹോണ്ട ഒരുങ്ങുന്നത്.
