യമഹയുടെ പുതിയ സ്പോർട്സ് ബൈക്ക് മോഡലായ YZF-R2 ഓഗസ്റ്റിൽ ഇന്ത്യയിൽ അവതരിപ്പിക്കുമെന്ന് റിപ്പോർട്ട്. കമ്പനിയുടെ നിരയിൽ R15-നും R3-ക്കും ഇടയിൽ സ്ഥാനം പിടിക്കുന്ന ഈ ബൈക്ക്, കെടിഎം ആർസി 200-ന് നേരിട്ടുള്ള എതിരാളിയാകും. R15 വി4 അടിസ്ഥാനമാക്കിയുള്ള ഡിസൈനും വിവിഎ, ട്രാക്ഷൻ കൺട്രോൾ പോലുള്ള ആധുനിക ഫീച്ചറുകളും ഇതിൽ പ്രതീക്ഷിക്കുന്നു.
സ്പോർട്സ് ബൈക്ക് പ്രേമികൾക്ക് ഒരു സന്തോഷവാർത്ത. ജാപ്പനീസ് ജനപ്രിയ ടൂവീലർ ബ്രാൻഡായ യമഹയുടെ പുതിയ മോഡൽ YZF-R2 ഇന്ത്യയിൽ ഓഗസ്റ്റിൽ അവതരിപ്പിക്കുമെന്നാണ് റിപ്പോർട്ടുകൾ. കമ്പനിയുടെ നിരയിൽ നിലവിലുള്ള R15നും R3നും ഇടയിലുള്ള ഒഴിവ് നികത്താനാണ് പുതിയ ബൈക്കിന്റെ ലക്ഷ്യം. ചെന്നൈയിലെ യമഹ പ്ലാന്റിൽ ഈ ബൈക്ക് നിർമ്മിക്കുമെന്നാണ് പ്രതീക്ഷിക്കുന്നത്. ഇവിടെ നിർമ്മിക്കുന്ന യൂണിറ്റുകൾ ഇന്ത്യയിൽ വിൽക്കുന്നതിനൊപ്പം വിദേശ വിപണികളിലേക്കും കയറ്റുമതി ചെയ്യാൻ സാധ്യതയുണ്ട്.
പല രാജ്യങ്ങളിലും ട്രേഡ്മാർക്ക്
ആഗോള ലോഞ്ചിന് തയ്യാറെടുപ്പ് YZF-R2 എന്ന പേര് ഇന്ത്യ, ഓസ്ട്രേലിയ, ന്യൂസിലാൻഡ്, യൂറോപ്പ്, ഫിലിപ്പീൻസ് തുടങ്ങിയ രാജ്യങ്ങളിൽ ട്രേഡ്മാർക്ക് ചെയ്തിട്ടുണ്ട്. ഇതിലൂടെ യമഹ ഈ മോഡൽ പല അന്താരാഷ്ട്ര വിപണികളിലും അവതരിപ്പിക്കാനാണ് തയ്യാറെടുക്കുന്നതെന്ന് വ്യക്തമാകുന്നു.
ഓഗസ്റ്റ് 27 ഇവന്റിൽ അവതരണത്തിന് സാധ്യത
ഓഗസ്റ്റ് 27ന് നടക്കുന്ന യമഹയുടെ പ്രത്യേക പരിപാടിയിലായിരിക്കും YZF-R2 ഔദ്യോഗികമായി അവതരിപ്പിക്കപ്പെടുകയെന്ന് സൂചനയുണ്ട്. അതേ വേദിയിൽ എൻമാക്സ് 155 സ്കൂട്ടറും അവതരിപ്പിക്കാനിടയുണ്ട്. എങ്കിലും നിലവിൽ ഏറ്റവും കൂടുതൽ ചർച്ച ചെയ്യപ്പെടുന്നത് YZF-R2 തന്നെയാണ്.
Related Articles
ഡിസൈൻ R15 വി4 അടിസ്ഥാനമാക്കി
പുതിയ YZF-R2, യമഹയുടെ ആർ15 വി4 മോഡലിന്റെ അടിസ്ഥാനത്തിൽ രൂപകൽപ്പന ചെയ്യുമെന്നാണ് പ്രതീക്ഷ. ശക്തമായ ഫ്രെയിം ഘടനയും ഉയർന്ന വേഗതയിൽ മികച്ച നിയന്ത്രണവും ഇതിന്റെ പ്രത്യേകതകളാകുമെന്ന് സൂചനയുണ്ട്. ഫ്രണ്ട് ഭാഗത്ത് യുഎസ്ഡി (അപ്പ്സൈഡ് ഡൗൺ) ഫോർക്കുകളും പിൻഭാഗത്ത് മോണോഷോക്ക് സസ്പെൻഷനും ലഭിച്ചേക്കും. മുന്നിലും പിന്നിലും ഡിസ്ക് ബ്രേക്കുകളും ഡ്യുവൽ ചാനൽ എബിഎസും സുരക്ഷയ്ക്കായി ഉൾപ്പെടുത്താൻ സാധ്യതയുണ്ട്.
ആധുനിക ഫീച്ചറുകൾ
പെർഫോമൻസ് മെച്ചപ്പെടുത്തുന്ന വിവിഎ (വേരിയബിൾ വാൽവ് ആക്ചുവേഷൻ) സാങ്കേതികവിദ്യ ബൈക്കിൽ ഉൾപ്പെടുമെന്നാണ് റിപ്പോർട്ടുകൾ. കൂടാതെ ട്രാക്ഷൻ കൺട്രോൾ, ക്വിക്ക് ഷിഫ്റ്റർ, അസിസ്റ്റ് ആൻഡ് സ്ലിപ്പർ ക്ലച്ച് തുടങ്ങിയ ഫീച്ചറുകളും പ്രതീക്ഷിക്കുന്നു. സൈഡ് സ്റ്റാൻഡ് എഞ്ചിൻ കട്ട്-ഓഫ് സംവിധാനം, വീതിയേറിയ പിൻ ടയർ എന്നിവയും സുരക്ഷയും സ്ഥിരതയും വർധിപ്പിക്കാൻ സഹായിക്കും.
ആർസി 200-ന് നേരിട്ട് മത്സരം
ഇന്ത്യൻ വിപണിയിൽ ലോഞ്ച് ചെയ്യുമ്പോൾ കെടിഎം ആർസി 200 ഉൾപ്പെടെയുള്ള സ്പോർട്സ് ബൈക്കുകളുമായിരിക്കും യമഹ YZF-R2 മത്സരിക്കുക. ശക്തമായ പ്രകടനം, ആധുനിക സാങ്കേതികവിദ്യ, സ്പോർട്ടി ഡിസൈൻ എന്നിവയിലൂടെ യുവ ഉപഭോക്താക്കളെ ആകർഷിക്കുകയാണ് കമ്പനിയുടെ ലക്ഷ്യം.
