ഡിസംബര് 16ന് നടക്കുന്ന ഐപിഎല് താരലേലത്തിനുള്ള 350 കളിക്കാരുടെ അന്തിമ പട്ടിക പ്രസിദ്ധീകരിച്ചു. സ്റ്റീവന് സ്മിത്തും ക്വിന്റണ് ഡി കോക്കും അപ്രതീക്ഷിതമായി പട്ടികയില് ഇടംപിടിച്ചു.
മുംബൈ: ഇത്തവണ ഐപിഎല് താരലേലത്തിനുണ്ടാവുക 350 താരങ്ങള്. ഡിസംബര് 16ന് അബുദാബിയില് നടക്കാനിരിക്കുന്ന ലേലത്തില് പങ്കെടുക്കാന് 1,390 താരങ്ങളാണ് രജിസ്റ്റര് ചെയ്തിരുന്നത്. എന്നാല് അന്തിമ ലിസ്റ്റില് 350 താരങ്ങളാണുള്ളത്. ഇതില് 240 പേര് ഇന്ത്യന് താരങ്ങളാണ്. 110 വിദേശ കളിക്കാരും ലേലത്തിനുണ്ടാവും. 224 ഇന്ത്യന് താരങ്ങള് അന്താരാഷ്ട്ര മത്സരം കളിക്കാത്തവരാണ്. വിദേശ താരങ്ങളില് 14 പേര് അണ്ക്യാപ്ഡ് പ്ലെയേഴ്സ്. ലേലത്തില് പത്ത് ഫ്രാഞ്ചൈസികള്ക്കും കൂടി 77 താരങ്ങളെയാണ് വേണ്ടത്. അതില് 31 എണ്ണം വിദേശ താരങ്ങള്.
രണ്ട് കോടിയാണ് ഏറ്റവും ഉയര്ന്ന് അടിസ്ഥാന വില. ഇതില് 40 പേരാണ് ഉള്പ്പെടുന്നത്. ഇന്ത്യന് താരങ്ങളില് വെങ്കിടേഷ് അയ്യര്ക്കും രവി ബിഷ്ണോയിക്കും രണ്ട് കോടിയാണ് അടിസ്ഥാന വില. ഡിസംബര് 16ന് ഉച്ചയ്ക്ക് 2:30ന് ലേല നടപടികള് ആരംഭിക്കും. ആദ്യ പട്ടികയില് ഉള്പ്പെടാത്ത 35 താരങ്ങള് അന്തിമ പട്ടികയില് ചേര്ക്കപ്പെട്ടു. അവരില് ഒരു അപ്രതീക്ഷിത എന്ട്രി ക്വിന്റണ് ഡി കോക്കാണ്. കഴിഞ്ഞ സീസണില് കൊല്ക്കത്ത നൈറ്റ് റൈഡേഴ്സിനായാണ് വിക്കറ്റ് കീപ്പര് ബാറ്റര് കളിച്ചത്. എന്നിരുന്നാലും, മോശം സീസണിന് ശേഷം ഫ്രാഞ്ചൈസി അദ്ദേഹത്തെ വിട്ടയച്ചു, എട്ട് ഇന്നിംഗ്സുകളില് നിന്ന് വെറും 152 റണ്സ് മാത്രമാണ് അദ്ദേഹം നേടിയത്.
സ്റ്റീവ് സ്മിത്തും ജോഷ് ഇംഗ്ലിസും അന്തിമ പട്ടികയില്
കാമറൂണ് ഗ്രീന്, മാത്യു ഷോര്ട്ട്, സ്റ്റീവ് സ്മിത്ത് എന്നിവര് ലേല പട്ടികയിലുണ്ട്. ഇംഗ്ലണ്ടിന്റെ ജാമി സ്മിത്ത്, ജോണി ബെയര്സ്റ്റോ, ന്യൂസിലന്ഡ് താരങ്ങളായ രചിന് രവീന്ദ്ര, ഡാരില് മിച്ചല്, ഡെവോണ് കോണ്വേ, ശ്രീലങ്കന് താരങ്ങളായി വനിന്ദു ഹസരംഗ, മതീഷ പതിരാന എന്നിവരും ലേലത്തിലുണ്ടാവും. പത്ത് ഫ്രാഞ്ചൈസികളില്, കൊല്ക്കത്ത നൈറ്റ് റൈഡേഴ്സ് 64.30 കോടി രൂപയുമായി ലേലത്തിന് പോകും. അതേസമയം ചെന്നൈ സൂപ്പര് കിംഗ്സിന്റെ പോക്കറ്റില് 43.40 കോടിയാണുള്ളത്.
