'കോലി എല്ലാം നേരത്തെ അറിയിച്ചിരുന്നു'; ഇന്ത്യന്‍ താരത്തിന്റെ ടെസ്റ്റ് വിരമിക്കലിനെ കുറിച്ച് അഗാര്‍ക്കര്‍

വിരാട് കോലിയുടെ ടെസ്റ്റ് വിരമിക്കൽ മാസങ്ങൾക്ക് മുമ്പ് തന്നെ തീരുമാനിച്ചിരുന്നതായി സെലക്ഷൻ കമ്മിറ്റി ചെയർമാൻ അജിത് അഗാർക്കർ വെളിപ്പെടുത്തി.

മുംബൈ: ടെസ്റ്റ് ക്രിക്കറ്റില്‍ നിന്ന് അപ്രതീക്ഷിതമായിരുന്നു വിരാട് കോലിയുടെ വിരമിക്കല്‍. അടുത്ത കാലത്ത് മോശം ഫോമിലൂടെയാണ് കോലി കടന്നുപോകുന്നത്. ബോര്‍ഡര്‍ ഗവാസ്‌കര്‍ ട്രോഫിയില്‍ കോലിക്ക് തിളങ്ങാന്‍ സാധിച്ചിരുന്നില്ല. താരത്തിനെതിരെ വിമര്‍ശനങ്ങളും ഉയര്‍ന്നിരുന്നു. പിന്നാലെ ഇംഗ്ലണ്ടിനെതിരായ പര്യടനത്തിന് മുമ്പ് കോലി വിരമിക്കല്‍ പ്രഖ്യാപിക്കുകയായിരുന്നു. കോലിയുടെ വിരമിക്കലുമായി ബന്ധപ്പെട്ട് സെലക്ഷന്‍ കമ്മിറ്റിയോ ബിസിസിഐയോ ഔദ്യോഗിക പ്രസ്താവനയൊന്നും നടത്തിയിരുന്നില്ല.

ഇപ്പോള്‍ കോലിയുടെ വിരമിക്കലിനെ കുറിച്ച് സംസാരിക്കുകയാണ് സെലക്ഷന്‍ കമ്മിറ്റി ചെയര്‍മാന്‍ അജിത് അഗാര്‍ക്കര്‍. ഏപ്രില്‍ മാസം തുടക്കത്തില്‍ തന്നെ കോലി ടെസ്റ്റില്‍ നിന്ന് വിരമിക്കാന്‍ തീരുമാനിച്ചിരുന്നുവെന്ന് അഗാര്‍ക്കര്‍ വ്യക്തമാക്കി. അഗാര്‍ക്കറുടെ വാക്കുകള്‍... ''കോലിയുടേയും രോഹിത്തിനേയും പോലെയുള്ള താരങ്ങള്‍ വിരമിക്കുന്നത് വലിയ വിടവുകള്‍ സൃഷ്ടിക്കും. മാസങ്ങള്‍ക്ക് മുമ്പാണ് ആര്‍ അശ്വിന്‍ വിരമിച്ചത്. അവരെല്ലാം ഇന്ത്യന്‍ ക്രിക്കറ്റിലെ ഇതിഹാസങ്ങളാണ്. ഇവരുടെ കൊഴിഞ്ഞുപ്പോക്കുകള്‍ വിഷമമുണ്ടാക്കുന്ന കാര്യമാണ്. കഴിഞ്ഞ രണ്ട് മാസങ്ങളായി ഞാന്‍ ഇരുവരുമായും സംസാരിച്ചിരുന്നു. ഏപ്രില്‍ ആദ്യം തന്നെ വിരാട് ഞങ്ങളുമായി ബന്ധപ്പെടുകയും ടെസ്റ്റ് ക്രിക്കറ്റില്‍ നിന്ന് വിരമിക്കാന്‍ തീരുമാനിച്ചതായി പറയുകയും ചെയ്തിരുന്നു.'' അഗാര്‍ക്കര്‍ വ്യക്തമാക്കി.

ഇംഗ്ലണ്ട് പര്യടനത്തിനുള്ള ടീം പ്രഖ്യാപിക്കുന്ന വേളയിലാണ് അഗാര്‍ക്കര്‍ ഇക്കാര്യം വ്യക്തമാക്കിയത്. പര്യടനത്തിനുള്ള ഇന്ത്യന്‍ ടീമിനേയും പുതിയ ക്യാപ്റ്റനേയും ഇന്ന് പ്രഖ്യാപിച്ചിരുന്നു. ശുഭ്മാന്‍ ഗില്ലാണ് ഇനി ഇന്ത്യയെ നയിക്കുക. റിഷഭ് പന്ത് വൈസ് ക്യാപ്റ്റനാവും. 

ഇംഗ്ലണ്ട് പരമ്പരയ്ക്കുള്ള ഇന്ത്യന്‍ ടെസ്റ്റ് ടീം: ശുഭ്മാന്‍ ഗില്‍ (ക്യാപ്റ്റന്‍), റിഷഭ് പന്ത് (വൈസ് ക്യാപ്റ്റന്‍), യശസ്വി ജയ്സ്വാള്‍, കെ എല്‍ രാഹുല്‍, സായ് സുദര്‍ശന്‍, അഭിമന്യു ഈശ്വരന്‍, കരുണ്‍ നായര്‍, നിതീഷ് റെഡ്ഡി, രവീന്ദ്ര ജഡേജ, ധ്രുവ് ജുറെല്‍, വാഷിംഗ്ടണ്‍ സുന്ദര്‍, ഷാര്‍ദുല്‍ താക്കൂര്‍, മുഹമ്മദ് സിറാജ്, ജസ്പ്രീ ബുമ്ര, പ്രസിദ്ധ് കൃഷ്ണ, ആകാശ് ദീപ്, അര്‍ഷ്ദീപ് സിംഗ്, കുല്‍ദീപ് യാദവ്.

ഇന്ത്യ - ഇംഗ്ലണ്ട് ടെസ്റ്റ് മത്സരക്രമം

ഒന്നാം ടെസ്റ്റ്, 2024 ജൂണ്‍ 2025 - ഹെഡിംഗ്ലി, ലീഡ്‌സ്
രണ്ടാം ടെസ്റ്റ്, 26 ജൂലൈ 2025 - എഡ്ജ്ബാസ്റ്റണ്‍, ബര്‍മിംഗ്ഹാം
മൂന്നാം ടെസ്റ്റ്, 1014 ജൂലൈ 2025 - ലോര്‍ഡ്‌സ്, ലണ്ടന്‍
നാലാം ടെസ്റ്റ്, 2327 ജൂലൈ 2025 - ഓള്‍ഡ് ട്രാഫോര്‍ഡ്, മാഞ്ചസ്റ്റര്‍
അഞ്ചാം ടെസ്റ്റ്, 31 ജൂലൈ 2025 - ഓവല്‍, ലണ്ടന്‍