നാലിന് 206 എന്ന നിലയിലാണ് കേരളം രണ്ടാം ദിനം ബാറ്റിംഗിനെത്തുന്നത്. എന്നാല് കേരളത്തെ തുടക്കത്തില് തന്നെ ഞെട്ടിച്ചാണ് ഗുജറാത്ത് തുടങ്ങിയത്.
അഹമ്മദാബാദ്: രഞ്ജി ട്രോഫി സെമി ഫൈനലില് ഗുജറാത്തിനെതിരെ പിടിമുറുക്കി കേരളം. അഹമ്മദാബാദ്, നരേന്ദ്ര മോദി സ്റ്റേഡിയത്തില് ടോസ് ബാറ്റിംഗ് തിരഞ്ഞെടുത്ത കേരളം രണ്ടാം ദിനം സ്റ്റംപെടുക്കുമ്പോള് കേരളം ഏഴ് വിക്കറ്റ് നഷ്ടത്തില് 418 റണ്സെടുത്തിട്ടുണ്ട്. സെഞ്ചുറി നേടിയ മുഹമ്മദ് അസറുദ്ദീന് (149), ആദിത്യ സര്വാതെ (10) എന്നിവരാണ് ക്രീസില്. അസറിന് പുറമെ ക്യാപ്റ്റന് സച്ചിന് ബേബി (69), സല്മാന് നിസാര് (52) എന്നിവരും മികച്ച പ്രകടനം പുറത്തെടുത്തിരുന്നു. ഗുജറാത്തിന് വേണ്ടി അര്സാന് നാഗ്വസ്വാല മൂന്ന് വിക്കറ്റ് വീഴ്ത്തി. ഒന്നാം ഇന്നിംഗ്സില് വലിയ സ്കോര് നേടി, ഗുജറാത്തിനെ പ്രതിരോധത്തിലാക്കാനായിരിക്കും കേരളത്തിന്റെ ശ്രമം. ആദ്യ ഇന്നിംഗ്സില് ലീഡ് നേടുന്നവര്ക്ക് മത്സരം സമനിലയില് അവസാനിച്ചാലും ഫൈനലിലെത്താം.
നാലിന് 206 എന്ന നിലയിലാണ് കേരളം രണ്ടാം ദിനം ബാറ്റിംഗിനെത്തുന്നത്. എന്നാല് കേരളത്തെ തുടക്കത്തില് തന്നെ ഞെട്ടിച്ചാണ് ഗുജറാത്ത് തുടങ്ങിയത്. തലേന്നത്തെ സ്കോറിനോട് ഒരു റണ് പോലും കൂട്ടിച്ചേര്ക്കാനാനാകാതെ സച്ചിന് ബേബി മടങ്ങി. നാഗ്വസ്വാലയുടെ പന്തില് ആര്യ ദേശായിക്ക് ക്യാച്ച്. 206/5 എന്ന നിലയില് പതറിയ കേരളത്തെ പിന്നീട് ചുമലിലേറ്റിയ അസറുദ്ദീന്-സല്മാന് നിസാര് സഖ്യമായിരുന്നു. ഇരുവരും കരുതലോടെ കളിച്ച് കൂടുതല് നഷ്ടങ്ങളില്ലാതെ 300 കടത്തുകയായിരുന്നു. ടീം ടോട്ടല് 350 കടന്നശേഷമാണ് സല്മാന് നിസാര് മടങ്ങിയത്. ഇരുവരും 149 റണ്സ് കൂട്ടിചേര്ത്തു. 202 പന്തില് നാലു ഫോറും ഒരു സിക്സും പറത്തി 52 റണ്സെടുത്ത സല്മാന് നിസാറിനെ വൈശാല് ജയ്സ്വാള് വിക്കറ്റിന് മുന്നില് കുടുക്കുകയായിരുന്നു.
അഞ്ച് റണ്സിനിടെ നാല് വിക്കറ്റ് നഷ്ടം! സൂര്യകുമാര് വട്ടപൂജ്യം; വിദര്ഭയ്ക്കെതിരെ മുംബൈ പതറുന്നു
ഇതിനിടെ അസര് സെഞ്ചുറി പൂര്ത്തിയാക്കി. ഇതുവരെ 303 പന്തുകള് നേരിട്ട താരം 17 ഫോറുകള് നേടിയിട്ടുണ്ട്. സച്ചിന്, സല്മാന് എന്നിവര്ക്ക് പുറമെ മുഹമ്മദ് ഇമ്രാന്റെ (24) വിക്കറ്റും കേരളത്തിന് ഇന്ന് നഷ്ടമായി. അസറിനൊപ്പം ചേര്ന്ന് 40 റണ്സ് കൂട്ടിചേര്ത്ത ശേഷമാണ് ഇമ്രാന് മടങ്ങിയത്. തുടര്ന്ന് അസര് - സര്വാതെ സഖ്യം കൂടുതല് വിക്കറ്റുകള് നഷ്ടമാവാതെ കാത്തു.
ആദ്യ ദിനം കരുതല്
നിര്ണായക ടോസ് നേടി ബാറ്റിംഗിനിറങ്ങിയ കേരളത്തിന് ഓപ്പണര്മാര് കേരളത്തിന് മികച്ച തുടക്കമാണ് നല്കിയത്. രോഹന് കുന്നുമ്മലും അക്ഷയ് ചന്ദ്രനും ചേര്ന്ന് ആദ്യ വിക്കറ്റില് 60 റണ്സ് കൂട്ടിച്ചേര്ത്തു. ഇരുവരും നിലയുറപ്പിച്ചെന്ന് തോന്നിച്ച ഘട്ടത്തിലാണ് അക്ഷയ് റണ്ണൌട്ടായത്. തൊട്ടു പിറകെ രവി ബിഷ്ണോയിയുടെ പന്തില് എല്ബിഡബ്ല്യു ആയി രോഹന് കുന്നുമ്മലും മടങ്ങി. ഇരുവരും 30 റണ്സ് വീതം നേടി. തുടര്ന്നെത്തിയ വരുണ് നായനാര്ക്കും (10) അധികം പിടിച്ചു നില്ക്കാനായില്ല. പ്രിയജിത് സിങ് ജഡേജയുടെ പന്തില് വിക്കറ്റ് കീപ്പര് ഉര്വ്വില് പട്ടേല് പിടിച്ചാണ് പത്ത് റണ്സെടുത്ത വരുണ് പുറത്തായത്.
പിന്നീടെത്തിയ ജലജ് സക്സേന ക്യാപ്റ്റന് സച്ചിന് ബേബിക്ക് മികച്ച പിന്തുണയായി. നാലാം വിക്കറ്റില് ഇരുവരും ചേര്ന്ന് നേടിയ 71 റണ്സ് കേരളത്തിന് കരുത്തായി. 30 റണ്സെടുത്ത ജലജ് സക്സേനയെ അര്സന് നാഗ്വസ്വാല ക്ലീന് ബൌള്ഡാക്കുകയായിരുന്നു.
