നിഖില് (64), വിപുല് ശക്തി (37), മുഹമ്മദ് ആഷിഖ് (31) എന്നിവര് ബ്ലൂ ടൈഗേഴ്സിനായി തിളങ്ങി.
തിരുവനന്തപുരം: കേരള ക്രിക്കറ്റ് ലീഗ് രണ്ടാം സെമി ഫൈനലില് കൊച്ചി ബ്ലൂ ടൈഗേഴ്സിനെതിരെ, കാലിക്കറ്റ് ഗ്ലോബ് സ്റ്റാര്സിന് 187 റണ്സ് വിജയലക്ഷ്യം. കാര്യവട്ടം, ഗ്രീന്ഫീല്ഡ് സ്റ്റേഡിയത്തില് ടോസ് നഷ്ടപ്പെട്ട് ബാറ്റിംഗിനെത്തിയ ബ്ലൂ ടൈഗേഴ്സിന് വേണ്ടി നിഖിലില് (36 പന്തില് 64) മികച്ച പ്രകടനം പുറത്തെടുത്തു. വിപുല് ശക്തി (37), മുഹമ്മദ് ആഷിഖ് (10 പന്തില് 31), അജീഷ് (24) എന്നിവരുടെ സംഭാവനയും നിര്ണായകമായി. ഗ്ലോബ്സ്റ്റാര്സിന് വേണ്ടി ഹരികൃഷ്ണന്, ഇബ്നുല് അഫ്താബ്, മനു കൃഷ്ണന് എന്നിവര് രണ്ട് വിക്കറ്റ് വീതം വീഴ്ത്തി. ഇന്ന് ജയിക്കുന്നവര് ഫൈനലില് കൊല്ലം സെയ്ലേഴ്സിനെ നേരിടും. സഞ്ജു സാംസണ് ഇല്ലാതെയാണ് ബ്ലൂ ടൈഗേഴ്സ് ഇറങ്ങുന്നത്.
ഭേദപ്പെട്ട തുടക്കമായിരുന്നു ബ്ലൂ ടൈഗേഴ്സിന്. ഒന്നാം വിക്കറ്റില് വിനൂപ് മനോഹരന് (16) - വിപുല് ശക്തി (37) സഖ്യം 33 റണ്സ് ചേര്ത്തു. അഞ്ചാം ഓവറില് വിനൂപിനെ, മനു പുറത്താക്കി. തുടര്ന്നെത്തിയ മുഹമ്മദ് ഷാനുവിന് (1) തിളങ്ങാന് സാധിച്ചില്ല. ഇതോടെ രണ്ടിന് 36 എന്ന നിലയിലായി ബ്ലൂ ടൈഗേഴ്സ്. പിന്നീട് വിപുല് - നിഖില് സഖ്യ 30 റണ്സ് കൂട്ടിചേര്ത്തു. ഇരുവരും ബ്ലൂ ടൈഗേഴ്സിന് മുന്നോട്ട് നയിക്കുമെന്ന് തോന്നിക്കെ വിപുലിനെ ഹരികൃഷ്ണന് മടക്കി. പിന്നീടെത്തിയ സാലി സാംസണ് (0) നേരിട്ട ആദ്യ പന്തില് തന്നെ മടങ്ങി. ഇതോടെ നാലിന് 64 എന്ന നിലയിലായി ബ്ലൂ ടൈഗേഴ്സ്.
പിന്നീട് നിഖില് - അജീഷ് സഖ്യം 44 റണ്സ് കൂട്ടിചേര്ത്തു. എന്നാല് 15-ാം ഓവറില് കൂട്ടുകെട്ട് പൊളിഞ്ഞു. അജീഷ് മടങ്ങി. തുടര്ന്നെത്തിയ ജോബിന് ജോബിക്കും (5) തിളങ്ങാനായില്ല. തുടര്ന്ന് ആഷിഖ്, നിഖിലിനെ കൂട്ടുപിടിച്ച് നടത്തിയ പോരാട്ടമാണ് ടീമിനെ പൊരുതാവുന്ന സ്കോറിലേക്ക് നയിച്ചത്. ഇരുവരും 51 റണ്സാണ് കൂട്ടിചേര്ത്തത്. അവസാന ഓവറില് ആഷിഖ് മടങ്ങുമ്പോള് മൂന്ന് സിക്സും രണ്ട് ഫോറും നേടിയിരുന്നു. ജെറിന് പിഎസ് (1), നിഖിലിനൊപ്പം പുറത്താവാതെ നിന്നു. ഏഴ് സിക്സും ഒരു ഫോറും അടങ്ങുന്നതായിരുന്നു നിഖിലിന്റെ ഇന്നിംഗ്സ്. ഇരു ടീമുകളുടേയും പ്ലേയിംഗ് ഇലവന് അറിയാം.
കൊച്ചി ബ്ലൂ ടൈഗേഴ്സ്: വിനൂപ് മനോഹരന്, അജീഷ് കെ, മുഹമ്മദ് ഷാനു, വിപുല് ശക്തി, നിഖില് തോട്ടത്ത്, മുഹമ്മദ് ആഷിക്, സാലി സാംസണ് (ക്യാപ്റ്റന്), ജോബിന് ജോബി, ആല്ഫി ഫ്രാന്സിസ് ജോണ്, ജെറിന് പി എസ്, കെ എം ആസിഫ്.
കാലിക്കറ്റ് ഗ്ലോബ്സ്റ്റാര്സ്: അമീര്ഷ എസ് എന്, രോഹന് കുന്നുമ്മല് (ക്യാപ്റ്റന്), അഖില് സ്കറിയ, അജിനാസ്, പള്ളം മുഹമ്മദ് അന്ഫല്, സുരേഷ് സച്ചിന്, ഹരികൃഷ്ണന് എം.യു., മനു കൃഷ്ണന്, സുധേശന് മിഥുന്, ഇബ്നുല് അഫ്താബ്, അഖില് ദേവ്.
