ഐപിഎല്ലിൽ മുംബൈ ഇന്ത്യൻസ് താരമായ നമൻ ധിർ ആദ്യമായാണ് ടി20 ടീമിലെത്തുന്നത്. വെസ്റ്റ് ഇന്‍‍‍ഡീസിനെതിരായ ഏകദിന പരമ്പരക്കുള്ള ഇന്ത്യൻ ടീമിലും നമൻ ധിര്‍ ഉള്‍പ്പെട്ടിരുന്നു.
ലക്നൗ: വെസ്റ്റ് ഇൻഡീസിനെതിരായ അഞ്ച് മത്സരങ്ങളുടെ ടി20 പരമ്പരയ്ക്കുള്ള ഇന്ത്യൻ ടീമിൽ മാറ്റം. സ്പിൻ ഓൾറൗണ്ടർ വാഷിംഗ്ടൺ സുന്ദറിന് പകരം പഞ്ചാബിന്‍റെ ബാറ്റിംഗ് ഓൾറൗണ്ടറായ നമൻ ധിറിനെ ടീമിൽ ഉൾപ്പെടുത്തി. വ്യാഴാഴ്ച പുറത്തിറക്കിയ വാർത്താക്കുറിപ്പിലാണ് ബിസിസിഐ ടീമില്‍ മാറ്റം വരുത്തിയ കാര്യം ഔദ്യോഗികമായി അറിയിച്ചത്. വരാനിരിക്കുന്ന ന്യൂസിലൻഡ് പര്യടനം മുന്നിൽ കണ്ടാണ് വാഷിംഗ്ടൺ സുന്ദറിന് വിശ്രമം അനുവദിക്കാൻ സെലക്ഷൻ കമ്മിറ്റി തീരുമാനിച്ചത്. ഒക്ടോബർ 22 മുതൽ ഡിസംബർ 1 വരെ നടക്കുന്ന ന്യൂസിലൻഡ് പര്യടനത്തിൽ ഇന്ത്യ അഞ്ച് ടി20 മത്സരങ്ങളും അഞ്ച് ഏകദിനങ്ങളും രണ്ട് ടെസ്റ്റുകളും കളിക്കുന്നുണ്ട്. ടെസ്റ്റ് പരമ്പരയ്ക്ക് മുന്നോടിയായി ഒക്ടോബർ 11-ന് ആരംഭിക്കുന്ന രഞ്ജി ട്രോഫിയിൽ തമിഴ്‌നാടിനായി കളിക്കാനും റെഡ് ബോൾ ക്രിക്കറ്റിൽ കൂടുതൽ പരിശീലനം നേടാനുമാണ് സുന്ദറിനോട് നിർദ്ദേശിച്ചിരിക്കുന്നത്.
ഐപിഎല്ലിൽ മുംബൈ ഇന്ത്യൻസ് താരമായ നമൻ ധിർ ആദ്യമായാണ് ടി20 ടീമിലെത്തുന്നത്. വെസ്റ്റ് ഇന്‍‍‍ഡീസിനെതിരായ ഏകദിന പരമ്പരക്കുള്ള ഇന്ത്യൻ ടീമിലും നമൻ ധിര്‍ ഉള്‍പ്പെട്ടിരുന്നു. ഒക്ടോബർ 6-ന് ലഖ്‌നൗവിലാണ് അഞ്ച് മത്സരങ്ങളുടെ പരമ്പരയിലെ ആദ്യ പോരാട്ടം. അതേസമയം, ശനിയാഴ്ച ന്യൂ ചണ്ഡീഗഢിൽ നടക്കുന്ന വെസ്റ്റ് ഇൻഡീസിനെതിരായ മൂന്നാം ഏകദിന മത്സരത്തിൽ നിന്ന് പേസ് ബൗളർ പ്രസിദ്ധ് കൃഷ്ണയെ ഒഴിവാക്കിയതായും ബിസിസിഐ സ്ഥിരീകരിച്ചു. പരുക്കിനെ തുടർന്നാണ് പ്രസിദ്ധിന് മത്സരം നഷ്ടമായത്. പ്രസിദ്ധിന് പകരം അൻഷുൽ കംബോജിനെ ഏകദിന ടീമിൽ ഉൾപ്പെടുത്തിയിട്ടുണ്ട്.
ഇന്ത്യൻ ടി20 സ്ക്വാഡ്: ശ്രേയസ് അയ്യർ (ക്യാപ്റ്റൻ), അഭിഷേക് ശർമ്മ, വൈഭവ് സൂര്യവംശി, ഇഷാൻ കിഷൻ (വിക്കറ്റ് കീപ്പർ), സഞ്ജു സാംസൺ (വിക്കറ്റ് കീപ്പർ), തിലക് വർമ്മ (വൈസ് ക്യാപ്റ്റൻ), ശിവം ദുബെ, കുൽദീപ് യാദവ്, അക്ഷർ പട്ടേൽ, രവി ബിഷ്‌ണോയ്, നിതീഷ് കുമാർ റെഡ്ഡി, അർഷ്ദീപ് സിംഗ്, പ്രിൻസ് യാദവ്, മായങ്ക് യാദവ്, നമൻ ധിർ.
