ഇന്ത്യന് പ്രീമിയര് ലീഗില് ഇന്ന് ഡല്ഹി ക്യാപിറ്റല്സ് ഗുജറാത്ത് ടൈറ്റന്സിനെ നേരിടും. ആദ്യ ജയം തേടുന്ന ഗുജറാത്തിന്, മികച്ച ഫോമിലുള്ള ഡല്ഹിയെ മറികടക്കുക എളുപ്പമാകില്ല.
ദില്ലി: ഇന്ത്യന് പ്രീമിയര് ലീഗില് ഡല്ഹി ക്യാപിറ്റല്സ് ഇന്ന് ഗുജറാത്ത് ടൈറ്റന്സിനെ നേരിടും. ദില്ലിയില് വൈകിട്ട് ഏഴരയ്ക്കാണ് കളി തുടങ്ങുക. രണ്ടുകളിയും ജയിച്ച ഡല്ഹിയും രണ്ടു കളിയും തോറ്റ ഗുജറാത്തുമാണ് നേര്ക്കുനേര് വരുന്നത്. ശ്രദ്ധാകേന്ദ്രമായി ഡല്ഹിയുടെ പുതിയ ഹീറോ സമീര് റിസ്വി. ലക്നൌവിനെതിരെ 47 പന്തില് പുറത്താവാതെ 70 റണ്സെടുത്ത റിസ്വി മുംബൈയ്ക്കെതിരെ 51 പന്തില് നേടിയത് 90 റണ്സ്. തുടക്കം പിഴച്ച കെ എല് രാഹുലും നിതീഷ് റാണയും ഫോമിലേക്ക് എത്തിയാല് ഡല്ഹിക്ക് കാര്യങ്ങള് കൂടുതല് എളുപ്പം.
അനായാസം കൂറ്റന് ഷോട്ടുകള് കളിക്കുന്ന ഡേവിഡ് മില്ലറും ട്രിസ്റ്റന് സ്റ്റബ്സും ഡല്ഹിയുടെ സ്കോര് ബോര്ഡ് സുരക്ഷിതമാക്കും. അക്സര് പട്ടേല്, കുല്ദീപ് യാദവ് സ്പിന് ജോഡിക്കൊപ്പം ലുംഗി എന്ഗിഡിയും ടി നടരാജനും മുകേഷ് കുമാറുമെല്ലാം പ്രതീക്ഷയ്ക്കൊത്ത് പന്തെറിയുന്നു. ക്യാപ്റ്റന് ശുഭ്മന് ഗില് പരിക്കുമാറിയെത്തുന്നത് ഗുജറാത്തിന് ആശ്വാസം. ഗില്ലിനൊപ്പം നല്ലതുടക്കം നല്കാന് സായ് സുദര്ശന് തയ്യാര്. ജോസ് ബട്ലര്, ഗ്ലെന് ഫിലിപ്സ്, വാഷിംഗ്ടണ് സുന്ദര്, രാഹുല് തെവാത്തിയ എന്നിവരുടെ മങ്ങിയഫോമില് ആശങ്കയേറെ.
റാഷിദ് ഖാന്, കാഗിസോ റബാഡ, മുഹമ്മദ് സിറാജ്, പ്രസിദ്ധ് കൃഷ്ണ എന്നിവടങ്ങിയ ബൌളിംഗ് നിരയ്ക്ക് താളം കണ്ടെത്താനാവാത്തതും പ്രതിസന്ധി. ഇരുടീമും നേര്ക്കുനേര് ഏറ്റുമുട്ടിയത് ഏഴ് കളിയില്. മൂന്നില് ഡല്ഹിയും നാലില് ഗുജറാത്തും ജയിച്ചു. ഇരു ടീമുകളുടേയും സാധ്യതാ ഇലവന് അറിയാം.
ഡല്ഹി ക്യാപിറ്റല്സ്: കെ എല് രാഹുല് (വിക്കറ്റ് കീപ്പര്), പതും നിസ്സങ്ക, നിതീഷ് റാണ, സമീര് റിസ്വി, ഡേവിഡ് മില്ലര്, ട്രിസ്റ്റന് സ്റ്റബ്സ്, അക്സര് പട്ടേല് (ക്യാപ്റ്റന്), വിപ്രജ് നിഗം, ലുങ്കി എന്ഗിഡി, കുല്ദീപ് യാദവ്, ടി നടരാജന്, മുകേഷ് കുമാര്.
ഗുജറാത്ത് ടൈറ്റന്സ്: ശുഭ്മാന് ഗില് (ക്യാപ്റ്റന്), സായ് സുദര്ശന്, ജോസ് ബട്ട്ലര് (വിക്കറ്റ് കീപ്പര്), ഗ്ലെന് ഫിലിപ്സ്, വാഷിംഗ്ടണ് സുന്ദര്, ഷാരൂഖ് ഖാന്, രാഹുല് ടെവാട്ടിയ, റാഷിദ് ഖാന്, കാഗിസോ റബാഡ/ജെയ്സണ് ഹോള്ഡര്, അശോക് ശര്മ, മുഹമ്മദ് സിറാജ്, പ്രസിദ് കൃഷ്ണ.
