ഇന്ത്യന് താരങ്ങളെ മിക്കപ്പോഴും പേരെടുത്ത് വിമര്ശിച്ചിട്ടുണ്ട് ഗംഭീര്. അതില് പ്രധാനി റിഷഭ് പന്ത് തന്നെ.
മുംബൈ: ശ്രീലങ്കന് പര്യടനത്തിനുള്ള ഇന്ത്യന് ക്രിക്കറ്റ് ടീമിനെ പ്രഖ്യാപിച്ചപ്പോള് സഞ്ജു സാംസണ് ആരാധകര്ക്ക് നിരാശയായിരുന്നു ഫലം. ലങ്കയ്ക്കെതിരെ ടി20 ഫോര്മാറ്റിനുള്ള ടീമില് മാത്രമാണ് സഞ്ജുവിനെ ഉള്പ്പെടുത്തിയത്. ദക്ഷിണാഫ്രിക്കയ്ക്കെതിരെ ഇന്ത്യയുടെ ആവസാന ഏകദിനത്തില് സഞ്ജു സെഞ്ചുറി നേടിയിരുന്നുവെന്നും ഓര്ക്കണം. എന്നാല് സീനിയര് താരങ്ങള് തിരിച്ചെത്തിയപ്പോള് സഞ്ജുവിന് സ്ഥാനം നഷ്ടപ്പെടുകയായിരുന്നു. ഗൗതം ഗംഭീര് പരിശീലകനായി വരുമ്പോള് സഞ്ജുവിന് കൂടുതല് പരിഗണന ലഭിക്കുമെന്ന് കരുതിയവര് ഏറെയാണ്.
അങ്ങനെ കരുതാനുള്ള ഗംഭീര് മുമ്പ് സഞ്ജുവിനെ കുറിച്ച് പറഞ്ഞ വാക്കുകള് തന്നെയാണ്. ടീം പ്രഖ്യാപനത്തിന് ശേഷം അത്തരം വാക്കുകള് തന്നെയാണ് സോഷ്യല് മീഡിയയില് വൈറലാകുന്നത്. ഇന്ത്യന് താരങ്ങളെ മിക്കപ്പോഴും പേരെടുത്ത് വിമര്ശിച്ചിട്ടുണ്ട് ഗംഭീര്. അതില് പ്രധാനി റിഷഭ് പന്ത് തന്നെ. പ്രത്യേകിച്ച് ടി20 ക്രിക്കറ്റില്. ടി20 ലോകകപ്പില് ഇന്ത്യയുടെ പ്രധാന വിക്കറ്റ് കീപ്പറായിരുന്ന പന്തിന്റെ റെക്കോര്ഡ് മോശമായിരുന്നു. 74 ടി20 മത്സരങ്ങളില് നിന്ന് 22.70 സ്ട്രൈക്ക് റേറ്റില് 1158 റണ്സ് മാത്രമാണ് പന്തിന്റെ സമ്പാദ്യം. 22.70 ശരാശരിയിലും 126.55 സ്ട്രൈക്ക് റേറ്റിലുണ് ഇത്രയും റണ്സ്. പന്തിനെ നിശ്ചിത ഓവര് ക്രിക്കറ്റില് നിന്ന് ഒഴിവാക്കണമെന്നും ടെസ്റ്റില് മാത്രം ശ്രദ്ധിക്കട്ടെയെന്നും ഗംഭീര് വാദിച്ചിരുന്നു. എന്നാല് പന്ത് രണ്ട് ഫോര്മാറ്റിനുള്ള ടീമിലുണ്ടുതാനും.
സഞ്ജുവിന്റെ പ്രകടനത്തെ പലപ്പോഴായി വാഴ്ത്തുക മാത്രമല്ല, ഇന്ത്യന് ഇടം നല്കാന് ആവശ്യപ്പെട്ടിട്ടുമുണ്ട് ഗംഭീര്. ടി20 ലോകകപ്പിന് മുമ്പ് പോലും ഗംഭീര് സഞ്ജുവിനെ കുറിച്ച് സംസാരിച്ചിരുന്നു. സഞ്ജു ലോകകപ്പ് കളിച്ചില്ലെങ്കില് നഷ്ടം ഇന്ത്യയുടേതെന്നാന്ന് ഗംഭീര് വ്യക്തമാക്കിയത്. 2020ല് അദ്ദേഹം സഞ്ജുവിനെ കുറിച്ച് പറഞ്ഞതിങ്ങനെ... ''ഇന്ത്യയിലെ മികച്ച വിക്കറ്റ് കീപ്പര് ബാറ്റര് മാത്രമല്ല സഞ്ജു, മികച്ച യുവ ബാറ്റര്കൂടിയാണ്.'' ഗംഭീര് അന്ന് ട്വിറ്ററില് (ഇപ്പോല് എക്സ്) കുറിച്ചിട്ടു. സഞ്ജുവിനെ കുറിച്ച് ഗംഭീര് കുറിച്ചിട്ട ചില പോസ്റ്റുകള് വായിക്കാം...
പന്തിനെ കുറിച്ചും ഗംഭീര് പറഞ്ഞിരുന്നു. ''''പന്തിന് വേണ്ടുവോളം അവസരം നിശ്ചിത ഓവര് ക്രിക്കറ്റില് ലഭിച്ചിട്ടുണ്ട്. എന്നാല് അവസരങ്ങളൊന്നും മുതലാക്കാന് അവന് സാധിച്ചില്ല. അതേസമയം, ഇഷാന് കിഷന് അതിന് കഴിഞ്ഞു. പന്ത് ടെസ്റ്റ് ക്രിക്കറ്റില് കൂടുതല് ശ്രദ്ധിക്കുന്നതാണ് നല്ലതെന്ന് തോന്നുന്നു.'' ഗംഭീര് ഒരിക്കല് വ്യക്തമാക്കി.
