കന്നി സെഞ്ചുറി നേടിയ ദീപക് ഹൂഡ വിസ്മയ പ്രകടനം കാഴ്ചവെച്ചു. സഞ്ജു സാംസണിന്റേതും മഹത്തായ ഇന്നിംഗ്സാണ് എന്ന് യുവി.
ഡബ്ലിന്: അവസരം ലഭിച്ചപ്പോള് ദീപക് ഹൂഡയും(Deepak Hooda) സഞ്ജു സാംസണും(Sanju Samson) ബാറ്റുകൊണ്ട് ആനന്ദനൃത്തമാടുകയായിരുന്നു ഡബ്ലിനില് അയർലന്ഡിനെതിരെ രണ്ടാം ടി20യില്(IRE vs IND 2nd T20I). ടി20 ചരിത്രത്തില് ടീം ഇന്ത്യയുടെ എക്കാലത്തെയും മികച്ച കൂട്ടുകെട്ടാണ് ഇരുവരും പടുത്തുയർത്തിയത്. ഹൂഡ തീപ്പൊരി സെഞ്ചുറിയുമായി കളിയിലെ താരമായപ്പോള് മിന്നല് ബാറ്റിംഗും റെക്കോർഡുമായി സഞ്ജുവും ചരിത്രത്തില് ഇടംപിടിച്ചു. ഡബ്ലിനിലെ വിസ്മയ പ്രകടനത്തിന് ദീപക് ഹൂഡയ്ക്കും സഞ്ജു സാംസണും വളരെ സെന്സിബിളായ പ്രശംസയാണ് ഇന്ത്യന് ഇതിഹാസം യുവ്രാജ് സിംഗ്(Yuvraj Singh) നല്കിയത്.
'കന്നി സെഞ്ചുറി നേടിയ ദീപക് ഹൂഡ വിസ്മയ പ്രകടനം കാഴ്ചവെച്ചു. സഞ്ജു സാംസണിന്റേതും മഹത്തായ ഇന്നിംഗ്സാണ്. മൈതാനത്തിന്റെ നാലുപാടും പന്ത് പറത്തി പക്വതയാർന്ന ഇന്നിംഗ്സ്. ലഭിച്ച അവസരം നന്നായി വിനിയോഗിക്കാനായി' എന്നുമാണ് യുവിയുടെ ട്വീറ്റ്.
ദീപക് ഹൂഡയ്ക്കൊപ്പം രണ്ടാം വിക്കറ്റില് തകർത്താടുകയായിരുന്നു സഞ്ജു സാംസണ്. 12-ാം ഓവറില് ഇരുവരും ടീമിനെ 100 കടത്തി. കൃത്യമായ ഇടവേളകളില് കലക്കന് ബൗണ്ടറികളുമായി സഞ്ജു മുന്നേറി. ഇതോടെ 39 റണ്സെന്ന രാജ്യാന്തര ടി20 കരിയറിലെ തന്റെ ഉയർന്ന സ്കോർ സഞ്ജു അനായാസം ഇന്നിംഗ്സിലെ 9-ാം ഓവറില് മറികടക്കുകയായിരുന്നു. 13-ാം ഓവറിലെ നാലാം പന്തില് ബൗണ്ടറിയുമായി സഞ്ജു രാജ്യാന്തര ടി20 കരിയറില് തന്റെ കന്നി അർധ സെഞ്ചുറി തികച്ചു. 31 പന്തിലായിരുന്നു സഞ്ജുവിന്റെ ഫിഫ്റ്റി. ഫിഫ്റ്റിക്ക് പിന്നാലെ ആഞ്ഞടിച്ച സഞ്ജു 42 പന്തില് 77 റണ്സെടുത്താണ് മടങ്ങിയത്. ഒന്പത് ഫോറും നാല് സിക്സും സഞ്ജുവിന്റെ ഇന്നിംഗ്സിലുണ്ടായിരുന്നു.
17-ാം ഓവറിലെ രണ്ടാം പന്തില് പുറത്താകുമ്പോഴേക്കും രണ്ടാം വിക്കറ്റില് ദീപക് ഹൂഡയ്ക്കൊപ്പം 176 റണ്സിന്റെ റെക്കോർഡ് കൂട്ടുകെട്ട് സഞ്ജു സ്ഥാപിച്ചിരുന്നു. രാജ്യാന്തര ടി20യില് ഏതൊരു വിക്കറ്റിലേയും ഇന്ത്യയുടെ ഉയർന്ന കൂട്ടുകെട്ടാണ് സഞ്ജുവും ഹൂഡയും ചേർന്ന് ഡബ്ലിനില് പടുത്തുയർത്തിയ 176 റണ്സ്. 2017ല് ഇന്ഡോറില് ശ്രീലങ്കയ്ക്കെതിരെ രോഹിത് ശർമ്മയും കെ എല് രാഹുലും ഒന്നാം വിക്കറ്റില് ചേർത്ത 165 റണ്സിന്റെ റെക്കോർഡ് പഴങ്കഥയായി. സഞ്ജു-ഹൂഡ വെടിക്കെട്ട് കണ്ട മത്സരത്തില് 20 ഓവറില് 225/7 എന്ന സ്കോർ കെട്ടിപ്പടുത്തപ്പോള് മത്സരം നാല് റണ്സിന് ഇന്ത്യ വിജയിക്കുകയും പരമ്പര 2-0ന് തൂത്തുവാരുകയും ചെയ്തു. അയർലന്ഡിന് 20 ഓവറില് 221-5 എന്ന സ്കോറിലെത്താനെ കഴിഞ്ഞുള്ളൂ. 57 പന്തില് ഒന്പത് ഫോറും ആറ് സിക്സും സഹിതം 104 റണ്സുമായി ഹൂഡ കളിയിലെ താരമായി.
IRE vs IND : അവസരം മുതലാക്കി സഞ്ജുവിന്റെ മാസ് ഇന്നിംഗ്സ്; വാഴ്ത്തിപ്പാടി ഇർഫാന് പത്താന്
