ഇന്ത്യൻ വനിതാ ക്രിക്കറ്റ് ടീമിനെ നയിക്കാൻ താൻ പൂർണ്ണ സജ്ജയാണെന്ന് വൈസ് ക്യാപ്റ്റൻ സ്മൃതി മന്ദാന. ഹർമൻപ്രീത് കൗറിന് കീഴിൽ വൈസ് ക്യാപ്റ്റനായി പ്രവർത്തിച്ച പരിചയസമ്പത്തും മികച്ച ക്യാപ്റ്റൻസി റെക്കോർഡും തനിക്ക് മുതൽക്കൂട്ടാണെന്നും അവർ വ്യക്തമാക്കി.
ദില്ലി: ഇന്ത്യന് വനിതാ ക്രിക്കറ്റ് ടീം ക്യാപ്റ്റന് ഹര്മന്പ്രീത് കൗറിന്റെ അഭാവത്തില് ടീമിനെ നയിക്കാന് താന് പൂര്ണ്ണ സജ്ജയാണെന്ന് വൈസ് ക്യാപ്റ്റന് സ്മൃതി മന്ദാന. 'ടൈംസ് ഓഫ് ഇന്ത്യ'യ്ക്ക് നല്കിയ അഭിമുഖത്തിലാണ് താരം തന്റെ ആത്മവിശ്വാസം വ്യക്തമാക്കിയത്. കഴിഞ്ഞ ഒരു ദശകമായി ഇന്ത്യന് ടീമിന്റെ നെടുംതൂണായ മന്ദാന, വര്ഷങ്ങളായി ഹര്മന്പ്രീതിന് കീഴില് വൈസ് ക്യാപ്റ്റനായി പ്രവര്ത്തിച്ച പരിചയസമ്പത്ത് തനിക്ക് വലിയ കരുത്താണെന്ന് കൂട്ടിച്ചേര്ത്തു.
നേരിടേണ്ടി വരുന്ന സാഹചര്യങ്ങളില് കൃത്യമായ തീരുമാനങ്ങള് എടുക്കാനും ടീമിനെ മുന്നില് നിന്ന് നയിക്കാനും തനിക്ക് സാധിക്കുമെന്ന് മന്ദാന ഇതിനകം തെളിയിച്ചിട്ടുണ്ട്. ഇന്ത്യയ്ക്ക് വേണ്ടി 18 ടി20 അന്താരാഷ്ട്ര മത്സരങ്ങളിലും 4 ഏകദിനങ്ങളിലും മന്ദാന ക്യാപ്റ്റന് കുപ്പായം അണിഞ്ഞു. ഇതില് 15 മത്സരങ്ങളിലും ടീം വിജയം കണ്ടു. താന് നയിച്ച നാല് ഏകദിന മത്സരങ്ങളിലും പരാജയമറിയാതെയാണ് ഇന്ത്യ മുന്നേറിയത്. ഹര്മന്പ്രീത് കൗറിന്റെ സ്വാഭാവിക പിന്ഗാമിയാകാന് താന് പ്രാപ്തയാണെന്നതിന്റെ തെളിവാണ് ഈ കണക്കുകള്.
ഇംഗ്ലണ്ട് പര്യടനത്തിനിടെ ലോര്ഡ്സില് നടന്ന ചരിത്രപരമായ ടെസ്റ്റ് മത്സരത്തിലെ ഇന്ത്യയുടെ ജയത്തെക്കുറിച്ച് മന്ദാന അഭിമാനത്തോടെയാണ് സംസാരിച്ചത്. 270 റണ്സിന്റെ കൂറ്റന് വിജയമാണ് ലോര്ഡ്സില് ഇന്ത്യ സ്വന്തമാക്കിയത്. ആദ്യ ഇന്നിംഗ്സില് 285 റണ്സും രണ്ടാം ഇന്നിംഗ്സില് 341 റണ്സും (7 വിക്കറ്റിന്) നേടിയ ഇന്ത്യ, ഇംഗ്ലണ്ടിനെ രണ്ട് ഇന്നിംഗ്സുകളിലായി 170, 186 റണ്സുകള്ക്ക് ഓള്ഔട്ടാക്കി ചരിത്രം കുറിച്ചു. ചരിത്ര വിജയത്തില് നിര്ണായക പങ്കാണ് മന്ദാന വഹിച്ചത്. ആദ്യ ഇന്നിംഗ്സില് 83 റണ്സ് അടിച്ചുകൂട്ടിയ താരം, രണ്ടാം ഇന്നിംഗ്സിലും അര്ധസെഞ്ചുറി നേടി മിന്നും ഫോം തുടര്ന്നു.
മന്ദാനയുടെ വാക്കുകള്... ''ആദ്യമായി ലോര്ഡ്സില് നടന്ന വനിതാ ടെസ്റ്റ് മത്സരത്തിന്റെ ഭാഗമാകാനും, അതില് വിജയിക്കാനും കഴിഞ്ഞത് വലിയൊരു സ്വപ്നസാക്ഷാത്കാരമാണ്. കുട്ടിക്കാലം മുതല്ക്കേ ടെസ്റ്റ് ക്രിക്കറ്റ് കളിക്കാന് ആഗ്രഹിച്ചിരുന്നവരാണ് ഞങ്ങള്, അതും ലോര്ഡ്സില് വെച്ച്.'' മന്ദാന ഓര്ക്കുന്നു. ടി20 ലോകകപ്പിലെയും ഇംഗ്ലണ്ടിനെതിരായ ടി20 പരമ്പരയിലെയും തിരിച്ചടികള്ക്ക് ശേഷം ലോര്ഡ്സിലെ ഈ ടെസ്റ്റ് വിജയം ഇന്ത്യന് ടീമിന് വലിയ ആത്മവിശ്വാസമാണ് നല്കിയത്.
