Johannesburg weather forecast : മോഹം വെള്ളത്തില്‍? വാണ്ടറേഴ്‌സില്‍ മഴമേഘങ്ങള്‍ കവരുമോ ഇന്ത്യന്‍ പ്രതീക്ഷകള്‍
വാണ്ടറേഴ്സിൽ ഇന്നുച്ചയ്ക്ക് 1.30നാണ് ദക്ഷിണാഫ്രിക്ക-ഇന്ത്യ രണ്ടാം ടെസ്റ്റിന് തുടക്കമാവുക
ജൊഹന്നസ്‌ബര്‍ഗ്: ദക്ഷിണാഫ്രിക്കയില്‍ കന്നി ടെസ്റ്റ് പരമ്പര തേടി ടീം ഇന്ത്യ (Team India) ഇന്നിറങ്ങുകയാണ്. ജൊഹന്നസ്‌ബര്‍ഗിലെ വാണ്ടറേഴ്‌സില്‍ (The Wanderers Stadium Johannesburg) നടക്കുന്ന രണ്ടാം ടെസ്റ്റില്‍ (South Africa vs India 2nd Test) എന്നാല്‍ ടീം ഇന്ത്യയുടെ സ്വപ്‌‌നങ്ങള്‍ക്ക് മേല്‍ മഴമേഘങ്ങള്‍ മൂടിക്കെട്ടുമോ? ജൊഹന്നസ്‌ബര്‍ഗിലെ കാലാവസ്ഥാ പ്രവചനം എങ്ങനെയെന്ന് നോക്കാം.
ആദ്യദിനമായ ഇന്ന് മഴയ്‌ക്ക് സാധ്യതയുണ്ട് എന്നാണ് കാലാവസ്ഥാ റിപ്പോര്‍ട്ട്. ജൊഹന്നസ്‌ബര്‍ഗില്‍ ഉച്ചകഴിഞ്ഞ് 50 ശതമാനം മഴയ്‌ക്കാണ് സാധ്യതകള്‍. 14-26 ഡിഗ്രി സെല്‍ഷ്യസായിരിക്കും വാണ്ടറേഴ്‌സിലെ താപനില. ടെസ്റ്റിന്‍റെ രണ്ട്, നാല് ദിവസങ്ങളിലും ഇടിമിന്നല്‍ സാധ്യതയുണ്ട്.
ചരിത്രം കുറിക്കാന്‍ ഇന്ത്യ
വാണ്ടറേഴ്സിൽ ഇന്നുച്ചയ്ക്ക് 1.30നാണ് ദക്ഷിണാഫ്രിക്ക-ഇന്ത്യ രണ്ടാം ടെസ്റ്റിന് തുടക്കമാവുക. മൂന്ന് ടെസ്റ്റുകളുടെ പരമ്പരയില്‍ സെഞ്ചൂറിയനിൽ നടന്ന ആദ്യ മത്സരത്തില്‍ 113 റണ്‍സിന് വിജയിച്ച ഇന്ത്യ പരമ്പരയിൽ 1-0ന് മുന്നിലാണ്. സെഞ്ചൂറിയനിൽ ചരിത്രത്തിലാദ്യമായാണ് ടീം ഇന്ത്യ ഒരു ടെസ്റ്റ് മത്സരം ജയിച്ചത്. കെ എല്‍ രാഹുലിന്റെ സെ‌‌ഞ്ചുറിക്കരുത്തിനൊപ്പം (123 റണ്‍സ്) ജസ്‌പ്രീത് ബുമ്ര, മുഹമ്മദ് ഷമി, മുഹമ്മദ് സിറാജ് എന്നിവരുടെ പേസ് മൂര്‍ച്ചയുമാണ് ഇന്ത്യക്ക് ആവേശ ജയം സമ്മാനിച്ചത്.
രണ്ടാം ടെസ്റ്റില്‍ ഇന്ത്യൻ ടീമിൽ കാര്യമായ മാറ്റത്തിന് സാധ്യതയില്ല. മോശം ഫോമിലുള്ള ചേതേശ്വർ പൂജാരയ്ക്ക് പകരം ഹനുമ വിഹാരിയെ ഇറക്കണമെന്ന ആവശ്യം ശക്തമാണെങ്കിലും വിജയിച്ച ടീമിനെ നിലനിർത്താനാണ് സാധ്യത. പേസ് ബൗളിംഗിന് ആനുകൂല്യം കിട്ടുന്ന വാണ്ടറേഴ്‌സിലെ പിച്ച് ഷമി, ബുമ്ര, സിറാജ് ത്രയത്തിന് കാര്യങ്ങൾ എളുപ്പമാക്കും. വാണ്ടറേഴ്സിൽ ഒരിക്കൽ പോലും തോറ്റിട്ടില്ലെന്ന കണക്ക് കോലിപ്പടയ്ക്ക് ആത്മവിശ്വാസം കൂട്ടും.
എല്ലാ നാണക്കേടും മാറ്റാന്‍ സുവര്‍ണാവസരം
ദക്ഷിണാഫ്രിക്കയില്‍ ആദ്യ ടെസ്റ്റ് പരമ്പര ജയം കൊതിച്ചാണ് ടീം ഇന്ത്യ ഇറങ്ങുന്നത്. 1992/93 സീസണ്‍ മുതലിങ്ങോട്ട് ടീം ഇന്ത്യ ഏഴ് ദക്ഷിണാഫ്രിക്കന്‍ പര്യടനം നടത്തിയപ്പോള്‍ ആറ് പരമ്പര ജയങ്ങള്‍ പ്രോട്ടീസിനൊപ്പം നിന്നു. 2010/11 സീസണില്‍ എം എസ് ധോണിക്ക് കീഴില്‍ ടെസ്റ്റ് പരമ്പര സമനിലയിലാക്കിയതാണ് ഇന്ത്യയുടെ ഇതുവരെയുള്ള മികച്ച പ്രകടനവും ഏക ആശ്വാസവും. മൂന്ന് വര്‍ഷം മുമ്പ് വിരാട് കോലിയുടെ നേതൃത്വത്തില്‍ ടീം ഇന്ത്യ ദക്ഷിണാഫ്രിക്കയിലെത്തിയപ്പോള്‍ ടെസ്റ്റ് പരമ്പരയില്‍ 1-2ന്‍റെ തോല്‍വി നേരിട്ടിരുന്നു.
