അര്ജുന് ടെന്ഡുല്ക്കറിന് മോഹവില. അഞ്ച് ലക്ഷം രൂപയ്ക്ക് അര്ജുനെ ആകാശ് ടൈഗേര്സ് മുംബൈ സ്വന്തമാക്കി.
മുംബൈ: ടി20 മുംബൈ ലീഗില് അര്ജുന് ടെന്ഡുല്ക്കറിന് മോഹവില. അഞ്ച് ലക്ഷം രൂപയ്ക്ക് അര്ജുനെ ആകാശ് ടൈഗേര്സ് മുംബൈ സ്വന്തമാക്കി. ഓള്റൗണ്ടര് കാറ്റഗറിയില് ഒരു ലക്ഷമായിരുന്നു അര്ജുന്റെ അടിസ്ഥാന വില. ബാന്ദ്രാ ബ്ലാസ്റ്റേഴ്സ് സ്വന്തമാക്കിയ സുജിത് നായിക്കാണ് അഞ്ച് ലക്ഷം ലഭിച്ച മറ്റൊരു താരം.
ലീഗില് വിവിധ ടീമുകള് ഓള്റൗണ്ടറായ അര്ജുനെ നോട്ടമിട്ടിരുന്നു. നോര്ത്ത് മുംബൈ പാന്തേര്സുമായി ശക്തമായ മത്സരത്തിനൊടുവിലാണ് അര്ജുനെ ആകാശ് ടൈഗേര്സ് സ്വന്തമാക്കിയത്. ലേലത്തില് ഒരു താരത്തെ സ്വന്തമാക്കാന് ചിലവഴിക്കാവുന്ന ഉയര്ന്ന തുകയാണ് അഞ്ച് ലക്ഷം. ടി20 മുംബൈ ലീഗിന്റെ രണ്ടാം സീസണിനാണ് തുടക്കമാകുന്നത്.
മുംബൈക്കായി അണ്ടര് 14, 16, 19 തലങ്ങളില് അര്ജുന് ടെന്ഡുല്ക്കര് കളിച്ചിട്ടുണ്ട്. കഴിഞ്ഞ വര്ഷം അണ്ടര് 19 ഇന്ത്യന് ടീമിലുമെത്തി. ഇന്ത്യക്കായി അനൗദ്യോഗിക അണ്ടര് 19 ടെസ്റ്റ് കളിച്ചു. ഡിവൈ പാട്ടീല് ടി20 കപ്പില് മികച്ച പ്രകടനം കാഴ്ചവെച്ചാണ് അര്ജുന് ടി20 മുംബൈ ലീഗില് അരങ്ങേറാന് ഒരുങ്ങുന്നത്.
