ന്യൂസിലന്‍ഡിനെതിരായ ടി20 പരമ്പര 5-0ത്തിന് തൂത്തുവാരാനാണ് ഇന്ത്യ ലക്ഷ്യമിടുന്നതെന്ന് വൈസ് ക്യാപ്റ്റന്‍ തിലക് വര്‍മ വ്യക്തമാക്കി. ക്യാപ്റ്റൻ ശ്രേയസ് അയ്യരുമായുള്ള മികച്ച കൂട്ടുകെട്ടിനെക്കുറിച്ചും പുതിയ ഫിനിഷർ റോളിലെ വെല്ലുവിളികളെക്കുറിച്ചും അദ്ദേഹം തുറന്നുപറഞ്ഞു.
ഓക്‌ലന്‍ഡ്: ന്യൂസിലന്‍ഡിനെതിരായ അഞ്ച് മത്സരങ്ങളുടെ ടി20 പരമ്പരയില്‍ ഇന്ത്യ 3-0ത്തിന് മുന്നിലെത്തിയെങ്കിലും, അവശേഷിക്കുന്ന മത്സരങ്ങളിലും വിജയം തുടരാനാണ് ടീമിന്റെ ലക്ഷ്യമെന്ന് വൈസ് ക്യാപ്റ്റന്‍ തിലക് വര്‍മ. പരമ്പരയിലെ നാലാം ടി20 മത്സരത്തിന് മുന്നോടിയായി ഈഡന്‍ പാര്‍ക്കില്‍ നടന്ന വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം. പരമ്പര 5-0ത്തിന് തൂത്തുവാരുമെന്ന് വ്യക്തമാക്കിയ തിലക്, വരാനിരിക്കുന്ന ഏകദിന, ടെസ്റ്റ് പരമ്പരകളിലേക്കും ഈ ആത്മവിശ്വാസം കൊണ്ടുപോകാനാണ് മുഖ്യ പരിശീലകന്‍ ഗൗതം ഗംഭീര്‍ ആവശ്യപ്പെട്ടിരിക്കുന്നതെന്നും വ്യക്തമാക്കി.
തുടര്‍ച്ചയായ യാത്രകളും മത്സരങ്ങളും കളിക്കാരെ തളര്‍ത്തുന്നുണ്ടോയെന്ന ചോദ്യത്തിന്, ഉയര്‍ന്ന തലത്തില്‍ കളിക്കുമ്പോള്‍ ക്ഷീണം ഒരു ഒഴിവുകഴിവല്ലെന്നായിരുന്നു തിലകിന്റെ മറുപടി. 'ഈ നിലവാരത്തില്‍ കളിക്കുമ്പോള്‍ നമുക്ക് ഒഴിവുകഴിവുകള്‍ പറയാനാകില്ല. നമ്മെ ഉറ്റുനോക്കുന്ന യുവതാരങ്ങള്‍ക്കായി നമ്മള്‍ മികച്ച മാതൃക സൃഷ്ടിക്കേണ്ടതുണ്ട്.' തിലക് വ്യക്തമാക്കി. ദീര്‍ഘകാല ലക്ഷ്യങ്ങളുടെ പ്രാധാന്യത്തെക്കുറിച്ച് ഗൗതം ഗംഭീര്‍ തങ്ങളോട് സംസാരിച്ചിരുന്നുവെന്നും അദ്ദേഹം കൂട്ടിച്ചേര്‍ത്തു.
ക്യാപ്റ്റന്‍ ശ്രേയസ് അയ്യരുമായുള്ള ബന്ധവും ഫിനിഷര്‍ റോളും
ക്യാപ്റ്റന്‍ ശ്രേയസ് അയ്യരുമായുള്ള തങ്ങളുടെ നേതൃത്വ ശൈലിയെക്കുറിച്ചും തിലക് സംസാരിച്ചു. ഗ്രൗണ്ടില്‍ എല്ലാ കാര്യങ്ങളും ഒറ്റയ്ക്ക് നിയന്ത്രിക്കുക പ്രയാസമാണ്. അതിനാല്‍ താനും അയ്യരും തമ്മില്‍ കൃത്യമായ ആശയവിനിമയമുണ്ട്. താന്‍ നല്‍കുന്ന നിര്‍ദ്ദേശങ്ങള്‍ അദ്ദേഹം സ്വീകരിക്കാറുണ്ടെന്നും ഈ കൂട്ടുകെട്ട് ടീമിന് ഗുണം ചെയ്യുന്നുണ്ടെന്നും അദ്ദേഹം പറഞ്ഞു.
കരിയറിന്റെ തുടക്കത്തില്‍ മൂന്നാം നമ്പറിലാണ് തിലക് ബാറ്റ് ചെയ്തിരുന്നതെങ്കില്‍, ഇപ്പോള്‍ അഞ്ചോ ആറോ നമ്പറുകളില്‍ ഒരു ഫിനിഷറുടെ റോളിലാണ് അദ്ദേഹം തിളങ്ങുന്നത്. ബാറ്റിംഗ് ഓര്‍ഡറിലെ ഈ മാറ്റം എളുപ്പമല്ലെങ്കിലും, തന്റെ പവര്‍ ഗെയിം ഈ പുതിയ റോളില്‍ വിജയിക്കാന്‍ തന്നെ സഹായിച്ചതായി തിലക് പറഞ്ഞു.
