ജയിക്കാൻ 19 പന്തിൽ 48 റൺസ് വേണമെന്ന ഘട്ടത്തിൽ നിൽക്കെയാണ് റൊമാരിയോ ഷെപ്പേർഡ് തിലകിന്‍റെ വിക്കറ്റ് വീഴ്ത്തിയത്. അതുവരെ മത്സരം ഞങ്ങളുടെ കൈകളിലായിരുന്നു
ഹൈദരാബാദ്: വെസ്റ്റ് ഇൻഡീസിനെതിരായ നാലാം ടി20യിൽ ഇന്ത്യ 24 റൺസിന് പരാജയപ്പെട്ടതിന് പിന്നാലെ പ്രതികരണവുമായി മലയാളി താരം സഞ്ജു സാംസൺ. റൺചേസിൽ തിലക് വർമ്മ പുറത്തായതാണ് മത്സരത്തിലെ പ്രധാന വഴിത്തിരിവായതെന്ന് സഞ്ജു മത്സരശേഷം വ്യക്തമാക്കി. 248 റൺസ് എന്ന കൂറ്റൻ വിജയലക്ഷ്യം പിന്തുടർന്ന ഇന്ത്യ ഒരു ഘട്ടത്തിൽ 130 റൺസിന് 5 വിക്കറ്റ് എന്ന നിലയിൽ തകർന്നിരുന്നു. എന്നാൽ തിലക് വർമ്മയും നിതീഷ് കുമാർ റെഡ്ഡിയും ചേർന്ന് നടത്തിയ പോരാട്ടമാണ് ഇന്ത്യയെ മത്സരത്തിലേക്ക് തിരികെ കൊണ്ടുവന്നത്.
ജയിക്കാൻ 19 പന്തിൽ 48 റൺസ് വേണമെന്ന ഘട്ടത്തിൽ നിൽക്കെയാണ് റൊമാരിയോ ഷെപ്പേർഡ് തിലകിന്‍റെ വിക്കറ്റ് വീഴ്ത്തിയത്. അതുവരെ മത്സരം ഞങ്ങളുടെ കൈകളിലായിരുന്നു. മത്സരശേഷമുള്ള വാര്‍ത്താ സമ്മേളനത്തിലാണ് സഞ്ജു മത്സരത്തിലെ വഴിത്തിരിവുകളെക്കുറിച്ച് തുറന്നു പറഞ്ഞത്. തിലക് വർമ്മ പുറത്തായതാണ് മത്സരത്തിലെ യഥാർത്ഥ വഴിത്തിരിവ്. ഓവറിൽ 10 മുതൽ 12 റൺസ് വരെ വളരെ സുഗമമായി ഞങ്ങൾ കണ്ടെത്തുന്നുണ്ടായിരുന്നു. സമ്മർദ്ദഘട്ടത്തിലും തിലകും റെഡ്ഡിയും മികച്ച രീതിയിലാണ് ബാറ്റ് ചെയ്തത്. ആ വിക്കറ്റ് വീഴുന്നതുവരെ മത്സരം ഞങ്ങളുടെ നിയന്ത്രണത്തിലായിരുന്നു.
അഞ്ച് വിക്കറ്റുകൾ നഷ്ടമായ ശേഷവും ഇത്തരത്തിൽ കളിയിൽ ആധിപത്യം പുലർത്താൻ കഴിഞ്ഞത് വലിയ കാര്യമാണ്. രണ്ട് യുവതാരങ്ങൾ സമ്മർദ്ദം അതിജീവിച്ച് വിൻഡീസ് ബൗളർമാർക്കെതിരെ അക്രമിച്ചു കളിക്കുകയായിരുന്നു, സഞ്ജു കൂട്ടിച്ചേർത്തു. ഇന്ത്യൻ ഇന്നിങ്സിന് തകർപ്പൻ തുടക്കം നൽകിയ സഞ്ജു സാംസൺ 23 പന്തിൽ 56 റൺസ് അടിച്ചുകൂട്ടിയിരുന്നു. എന്നാൽ ടീം തോറ്റതിൽ താൻ ഏറെ നിരാശനാണെന്ന് സഞ്ജു പറഞ്ഞു. ടീം തോൽക്കുമ്പോൾ നമ്മൾ എന്തുചെയ്താലും അതിന്‍റെ സന്തോഷം തോന്നില്ല. ഇപ്പോൾ എനിക്ക് വലിയ വിഷമമുണ്ട്. ജയിക്കുന്ന ടീമിന്‍റെ ഭാഗമാകാനാണ് ഞാൻ ആഗ്രഹിച്ചത്. ബാറ്റിങ് ഞാൻ ശരിക്കും ആസ്വദിച്ചു. ഇത്രയും വലിയ ലക്ഷ്യം പിന്തുടരുമ്പോൾ രണ്ടാമതൊന്ന് ചിന്തിക്കാൻ സമയമില്ല, നിശ്ചിത ശൈലിയിൽ ഷോട്ടുകൾ കളിക്കുകയേ നിവൃത്തിയുള്ളൂ. എന്നാൽ വിജയിക്കാൻ കഴിയാത്തതിൽ വിഷമമുണ്ട്-സഞ്ജു പറഞ്ഞു.
പ്രധാന ബൗളർ ജസ്പ്രീത് ബുംറയില്ലാത്തത് ഇന്ത്യയ്ക്ക് തിരിച്ചടിയാണോ എന്ന ചോദ്യത്തിനും സഞ്ജു മറുപടി നൽകി. ബുംറയ്ക്ക് പകരം വെയ്ക്കാൻ മറ്റൊരു ബൗളറില്ല. അപൂർവ്വമായി മാത്രം ലഭിക്കുന്ന പ്രതിഭയാണദ്ദേഹം. എന്നാൽ ടീമിൽ മറ്റ് മികച്ച യുവതാരങ്ങളുമുണ്ട്. അർഷ്ദീപ് സിങ് മികച്ച പ്രകടനമാണ് നടത്തുന്നത്. പ്രിൻസ് യാദവ് കഴിഞ്ഞ മത്സരങ്ങളിൽ പന്തെറിഞ്ഞ രീതി പ്രശംസനീയമാണ്. യുവതാരങ്ങൾക്ക് കൂടുതൽ അവസരങ്ങളും പിന്തുണയും നൽകുന്നതോടെ അവർ കൂടുതൽ കരുത്തരാകുമെന്നും സഞ്ജു പറഞ്ഞു.
മത്സരത്തിലെ അവസാന ഓവറിൽ വിൻഡീസ് പേസർ ഷമർ ജോസഫിന്‍റെ ബൗൺസർ തോളിൽ തട്ടി പരിക്കേറ്റ ഇടങ്കയ്യൻ പേസർ അർഷ്ദീപ് സിങ് റിട്ടയേർഡ് ഹർട്ടായി മടങ്ങിയിരുന്നു. അർഷ്ദീപ് തോളിൽ ഐസ് പാക്ക് വെച്ചിട്ടുണ്ട്, താരം ഉടൻ സുഖം പ്രാപിക്കുമെന്ന് പ്രതീക്ഷിക്കുന്നു, സഞ്ജു പറഞ്ഞു. നാല് മത്സരങ്ങൾ പൂർത്തിയാകുമ്പോൾ പരമ്പര 2-2 എന്ന നിലയിലാണ്. പരമ്പര വിജയികളെ നിർണയിക്കുന്ന അഞ്ചാമത്തെയും അവസാനത്തെയും ടി20 മത്സരം ശനിയാഴ്ച ബെംഗളൂരുവിൽ നടക്കും.
