മത്സരത്തിന്റെ 19-ാം ഓവറിൽ ജാമി ഓവർട്ടണെതിരെയാണ് ടിം ഡേവിഡ് ഈ അവിശ്വസനീയ സിക്സർ പറത്തിയത്. 106 മീറ്റർ ദൂരം പിന്നിട്ട പന്ത് സ്റ്റേഡിയത്തിന് പുറത്തുള്ള റോഡിലാണ് വീണത്.
ബംഗളൂരു: ഐപിഎല്ലിൽ ചെന്നൈ സൂപ്പർ കിംഗ്സിനെതിരെ റോയൽ ചലഞ്ചേഴ്സ് ബംഗളൂരു നേടിയ തകർപ്പൻ വിജയത്തിനിടയിൽ, ഓസ്ട്രേലിയൻ താരം ടിം ഡേവിഡിന്റെ പടുകൂറ്റൻ സിക്സർ പറന്നത് സ്റ്റേഡിയത്തിന് പുറത്തേക്കായിരുന്നു. ചിന്നസ്വാമി സ്റ്റേഡിയത്തിന്റെ മേൽക്കൂരയും കടന്ന് പുറത്തെ റോഡിൽ പതിച്ച പന്ത് ഒരു ആരാധകൻ കൈക്കലാക്കുന്ന വീഡിയോ ഇപ്പോൾ സോഷ്യൽ മീഡിയയിൽ വൈറലാണ്.
മത്സരത്തിന്റെ 19-ാം ഓവറിൽ ജാമി ഓവർട്ടണെതിരെയാണ് ടിം ഡേവിഡ് ഈ അവിശ്വസനീയ സിക്സർ പറത്തിയത്. 106 മീറ്റർ ദൂരം പിന്നിട്ട പന്ത് സ്റ്റേഡിയത്തിന് പുറത്തുള്ള റോഡിലാണ് വീണത്. പന്ത് ഗാലറിക്ക് പുറത്തേക്ക് പോകുന്നത് കണ്ട് അമ്പയർ സിഗ്നൽ നൽകുന്നതിന് മുൻപേ ടിം ഡേവിഡ് തന്നെ കൈകൾ ഉയർത്തി പന്തിന് 'ബൈ ബൈ' പറയുന്ന വീഡിയോയും വൈറലായിരുന്നു.
സ്റ്റേഡിയത്തിന് പുറത്ത് പന്ത് വീണപ്പോൾ അവിടെ കൂടിയിരുന്ന ആരാധകർ അത് കൈക്കലാക്കുകയും ആവേശത്തോടെ ആഘോഷിക്കുകയും ചെയ്യുന്ന ദൃശ്യങ്ങളാണ് പുറത്തുവന്നത്. മത്സരത്തിൽ വെറും 25 പന്തിൽ നിന്ന് 8 സിക്സറുകൾ ഉൾപ്പെടെ പുറത്താകാതെ 70 റൺസാണ് ടിം ഡേവിഡ് അടിച്ചുകൂട്ടിയത്.
ടിം ഡേവിഡിനൊപ്പം രജത് പാട്ടിദാർ (48*) കൂടി ചേർന്നതോടെ ആർസിബി നിശ്ചിത 20 ഓവറിൽ 250/3 എന്ന കൂറ്റൻ സ്കോർ പടുത്തുയർത്തി. ചെന്നൈ സൂപ്പർ കിംഗ്സിനെതിരെ ഐപിഎൽ ചരിത്രത്തിൽ ഒരു ടീം നേടുന്ന ഏറ്റവും ഉയർന്ന സ്കോറാണിത്. 251 റൺസ് വിജയലക്ഷ്യവുമായി ഇറങ്ങിയ സിഎസ്കെ 207 റൺസിന് എല്ലാവരും പുറത്തായി. ഇതോടെ 43 റൺസിന്റെ വിജയമാണ് ആർസിബി സ്വന്തമാക്കിയത്.സീസണിലെ ആദ്യ മൂന്ന് മത്സരങ്ങളിലും പരാജയപ്പെട്ട ചെന്നൈ സൂപ്പർ കിംഗ്സ് പോയിന്റ് പട്ടികയിൽ അവസാന സ്ഥാനത്താണ്. അതേസമയം, രണ്ട് വിജയങ്ങളുമായി ആർസിബി പട്ടികയിൽ ഒന്നാമതെത്തി.
