സാമൂഹ്യ മാധ്യമം വഴി പരിചയപ്പെട്ട് പെണ്കുട്ടികളെ ലൈംഗികമായി ചൂഷണം ചെയ്യുന്ന സംഘം അറസ്റ്റില്
കാസര്കോട് സ്വദേശികളായ മുഹമ്മദ് നിയാസ്, മുഹമ്മദ് ഷാഹിദ്, അബു താഹിര് എന്നിവരാണ് മലപ്പുറത്ത് പിടിയിലായത്. കഴിഞ്ഞ ദിവസം രാവിലെയാണ് പ്രതികള് കുടുങ്ങിയത്
മലപ്പുറം: സാമൂഹിക മാധ്യമം വഴി പരിചയപ്പെട്ട് പ്രായപൂര്ത്തിയാകാത്ത പെണ്കുട്ടികളെ ലൈംഗികമായി ചൂഷണം ചെയ്യുന്ന സംഘത്തെ തിരൂരങ്ങാടി പൊലീസ് അറസ്റ്റ് ചെയ്തു. കാസര്കോട് സ്വദേശികളായ മുഹമ്മദ് നിയാസ്, മുഹമ്മദ് ഷാഹിദ്, അബു താഹിര്
എന്നിവരാണ് മലപ്പുറത്ത് പിടിയിലായത്. കഴിഞ്ഞ ദിവസം രാവിലെയാണ് പ്രതികള് കുടുങ്ങിയത്. സംഭവത്തെ കുറിച്ച് പൊലീസ് പറയുന്നതിങ്ങനെ:
വാഹന പരിശോധനയ്ക്കിടെ മലപ്പുറം മമ്പുറം ഭാഗത്ത് നിന്ന് ഒരു കാര് വണ്വേ തെറ്റിച്ച് വന്നു. അതില് മൂന്ന് യുവാക്കളും ഒരു പെണ്കുട്ടിയുമാണ് ഉണ്ടായിരുന്നത്. പെണ്കുട്ടി പ്ലസ് ടൂ വിദ്യാര്ത്ഥിനിയാണെന്ന് പൊലീസിനോട് പറഞ്ഞു. ഓടുന്ന കാറില് വെച്ച് മുഹമ്മദ് നിയാസ് പതിനേഴുകാരിയായ വിദ്യാര്ത്ഥിനിയെ പീഡിപ്പിച്ചതായും പൊലീസ് പറഞ്ഞു.
പ്രായപൂര്ത്തായാകാത്ത പെണ്കുട്ടിയെ ലൈംഗികമായി ചൂഷണം ചെയ്യാനാണ് കാസര്കോഡ് നിന്ന് കാറില് പ്രതികള് മലപ്പുറത്ത് എത്തിയതെന്നാണ് പൊലീസിന്റെ ചോദ്യം ചെയ്യലില് വ്യക്തമായത്. ഈ പെണ്കുട്ടി ബന്ധുവിന്റെ ഫോണില് നിന്നാണ് പ്രതിയുമായി ഇന്സ്റ്റഗ്രാമില് ബന്ധപ്പെട്ടിരുന്നത്.
അമ്മയുടെ ഫോണിലെ വാട്സ് ആപ്പിലും പെണ്കുട്ടി പ്രതിയുമായി സംസാരിക്കാറുള്ളതായി പൊലീസിന് വിവരം കിട്ടി. കേസിലെ മറ്റ് രണ്ട് പ്രതികളും ഇതുപോലെ ഷെയര് ചാറ്റ് വഴിയും ഇന്സ്റ്റഗ്രാം വഴിയും പ്രായപൂര്ത്തിയാവാത്ത പെണ്കുട്ടികളെ ചതിയില്പ്പെടുത്തിയിരുന്നതായും പൊലീസ് പറഞ്ഞു.