ചളിക്കവട്ടത് ജ്വല്ലറിയുടെ ഷട്ടർ തകർത്ത് കവർച്ചാ ശ്രമം; ലോക്കർ തുറക്കാനാവാതെ മടങ്ങി
ചളിക്കവട്ടത് ജ്വല്ലറിയിൽ കവർച്ചാ ശ്രമം. ഇന്നലെ പുലർച്ചെയാണ് ഷട്ടറുകൾ തകർത്ത് കവർച്ച ശ്രമമുണ്ടായത്. സ്വർണ്ണാഭരണങ്ങൾ സൂക്ഷിച്ച ലോക്കർ തകർക്കാൻ കഴിയാത്തതിനാൽ സംഘം മടങ്ങുകയായിരുന്നു.
എറണാകുളം: ചളിക്കവട്ടത് ജ്വല്ലറിയിൽ കവർച്ചാ ശ്രമം. ഇന്നലെ പുലർച്ചെയാണ് ഷട്ടറുകൾ തകർത്ത് കവർച്ച ശ്രമമുണ്ടായത്. സ്വർണ്ണാഭരണങ്ങൾ സൂക്ഷിച്ച ലോക്കർ തകർക്കാൻ കഴിയാത്തതിനാൽ സംഘം മടങ്ങുകയായിരുന്നു. കവർച്ചാശ്രമം നടത്തിയവരുടെ സിസി ടിവി ദൃശ്യങ്ങളും പുറത്തുവന്നു.
ഇന്നലെ പുലർച്ചെയാണ് മൂന്നംഗ സംഘം ചളിക്കവട്ടത്തെ പാരിസ് ജ്വല്ലറിയിൽ കവർച്ചയ്ക്കായെത്തിയത്. ജ്വല്ലറിയുടെ ഷട്ടർ വാഹനത്തിൽ കെട്ടി വലിച്ച് തുറന്ന ശേഷം സംഘത്തിലെ ഒരാൾ അകത്തേക്ക് കയറി. എന്നാൽ അലമാരകളിൽ പകൽ സൂക്ഷിച്ച ആഭരണങ്ങൾ സേഫ് ലോക്കറിലേക്ക് മാറ്റിയതിനാൽ സംഘം തിരിച്ചിറങ്ങുകയായിരുന്നു.
ജ്വല്ലറിയുടെ ഷട്ടർ തകർന്ന് നിൽക്കുന്നത് കണ്ട് നാട്ടുകാർ ഉടമയെ വിവരമറിയിച്ചു. തുടർന്ന് പൊലീസ് സ്ഥലത്തെ പരിശോധന നടത്തി. ആഭരണങ്ങളൊന്നും നഷ്ടമായില്ലെന്നാണ് പൊലീസ് വ്യക്തമാക്കുന്നത്. സിസിടിവി ദൃശ്യങ്ങൾ പരിശോധിച്ച് പ്രതികളെ കണ്ടെത്താനുള്ള ശ്രമം തുടങ്ങിയതായി പാലാരവിട്ടം പൊലീസ് അറയിച്ചു.
