തിരുവനന്തപുരം: പിജെ ജോസഫും മോൻസ് ജോസഫും എംഎൽഎ സ്ഥാനം രാജിവച്ചു. ഇരുവരും തങ്ങളുടെ രാജിക്കത്ത് സ്പീക്കർക്ക് നൽകി. നാമനിർദേശ പത്രിക സമർപ്പിക്കുന്നതിന് തൊട്ടുമുൻപായാണ് ഇരുവരും രാജി വച്ചത്. അയോഗ്യത പ്രശ്നം ഒഴിവാക്കുന്നതിനായിട്ടാണ് ജോസഫും മോൻസും രാജിവച്ചത് എന്നാണ് സൂചന. 

കേരള കോൺ​ഗ്രസ് എം സ്ഥാനാർത്ഥികളായി രണ്ടില ചിഹ്നത്തിലാണ് പി.ജെ.ജോസഫും മോൻസ് ജോസഫും 2016 നിയമസഭാ തെരഞ്ഞെടുപ്പിൽ മത്സരിച്ചു ജയിച്ചത്. കഴിഞ്ഞ ദിവസം പി.സി.തോമസ് നയിക്കുന്ന കേരള കോൺ​ഗ്രസിൽ പി.ജെ.ജോസഫ് വിഭാ​ഗം ലയിച്ചിരുന്നു. പുതിയ പാർട്ടിയിൽ ലയിച്ച ശേഷവും കേരള കോൺ​ഗ്രസ് എം എംഎൽഎമാരായി തുടരുന്നതിലെ നിയമപ്രശ്നം ഒഴിവാക്കാനാണ് രാജിവയ്ക്കുന്നതാണ് നല്ലത് എന്ന നിയമോപദേശത്തിൻ്റെ അടിസ്ഥാനത്തിലാണ് രണ്ട് പേരും രാജിവച്ചത്. ഇരുവരുടേയും രാജിക്കത്ത് ലഭിച്ചതായി സ്പീക്കറുടെ ഓഫീസ് അറിയിച്ചു.

അതേസമയം പാർട്ടി ചിഹ്നം സംബന്ധിച്ച് ആശയക്കുഴപ്പം തുടരുന്നതിനാൽ പി.ജെ.ജോസഫ് വിഭാ​ഗം സ്ഥാനാർത്ഥികൾ ഇതുവരെ നാമനി‍ർദേശക പത്രിക സമർപ്പിച്ചിട്ടില്ല. ഇന്ന് ഉച്ചയ്ക്ക് മൂന്ന് മണി വരെ മാത്രമേ നാമനിർദേശ പത്രിക സമർപ്പിക്കാൻ സാധിക്കൂ. നാളെ മുതൽ പത്രികകളുടെ സൂക്ഷമപരിശോധന ആരംഭിക്കുകയാണ്. കേരള കോൺ​ഗ്രസിൻ്റെ തെരഞ്ഞെടുപ്പ് ചിഹ്നം നേരത്തെ സൈക്കിളായിരുന്നു. എന്നാൽ ദേശീയ പാർട്ടിയായ എസ്.പിയുടെ തെരഞ്ഞെടുപ്പ് ചിഹ്നവും സൈക്കിളായതിനാൽ മറ്റേതെങ്കിലും ചിഹ്നമായിരിക്കും പി.ജെ.ജോസഫ് ചെയർമാനും മോൻസ് ജോസഫ് വൈസ് ചെയർമാനും പിസി തോമസ് ഡെപ്യൂട്ടി ചെയർമാനുമായ പുതിയ പാർട്ടിക്ക് ലഭിക്കുക.