പാപ്പനില് 'എസ്പി വിന്സി എബ്രഹാം ഐപിഎസ്' ആയി എത്തി പ്രേക്ഷകരെ ത്രസിപ്പിച്ച താരമാണ് നീത പിള്ള.
മലയാള സിനിമാസ്വാദകർ ഏറെ പ്രതീക്ഷയോടെ കാത്തിരുന്ന പാപ്പൻ (Paappan) ഏതാനും ദിവസങ്ങൾക്ക് മുമ്പാണ് തിയറ്ററുകളിൽ എത്തിയത്. നീണ്ട ഇടവേളക്ക് ശേഷം സുരേഷ് ഗോപി- ജോഷി (Suresh Gopi) കൂട്ടുകെട്ട് തിരിച്ചെത്തിയപ്പോൽ അത് മലയാള സിനിമക്ക് തന്നെ മുതൽ കൂട്ടായി മാറി. ചിത്രത്തിൽ 'എസ്പി വിന്സി എബ്രഹാം ഐപിഎസ്' ആയി എത്തി പ്രേക്ഷകരെ ത്രസിപ്പിച്ച താരമാണ് നീത പിള്ള. നീതയുടെ ചിത്രത്തിലെ അഭിനയത്തെ പ്രശംസിച്ച് കൊണ്ട് നിരവധി പേരാണ് രംഗത്തെത്തിയത്. ഇപ്പോഴിതാ നടിക്കൊപ്പമുള്ള ചിത്രം പങ്കുവച്ചിരിക്കുകയാണ് നടൻ ഗോകുൽ സുരേഷ്.
'അഭിനന്ദനങ്ങൾ വിൻസിമോൾ! നിങ്ങൾ പാപ്പനെ അഭിമാനം കൊള്ളിച്ചു', എന്ന കുറിപ്പോടെയാണ് ഗോകുൽ ചിത്രം പങ്കുവച്ചിരിക്കുന്നത്. പിന്നാലെ കമന്റുകളുമായി ആരാധകരും രംഗത്തെത്തി. "വിൻസി മോൾ യഥാർത്ഥ ഐപിഎസ് ഓഫീസറെ പോലെ തോന്നുന്നു. ഗുഡ് ജോബ് വിൻസി. പപ്പൻ സിനിമ വളരെ ഇഷ്ടമായി. ഗോകുൽ ഭാവിയിൽ അച്ഛനെ പോലെ നല്ല നടനാകും. പപ്പൻ സൂപ്പർ.. ജോഷി സർ താങ്കൾ ഒരു മികച്ച ടെക്നീഷ്യൻ ആണ്, രണ്ട് പേരും മികച്ച പ്രകടനമായിരുന്നു, ഭാവിയിലെ സൂപ്പർ താരങ്ങൾ" എന്നിങ്ങനെയാണ് കമന്റുകൾ.
അതേസമയം, സുരേഷ് ഗോപിയുടെ പാപ്പനെ കുടുംബ പ്രേക്ഷകരും ഇരുകയ്യും നീട്ടി സ്വീകരിച്ചു കഴിഞ്ഞു. ഒട്ടുമിക്ക എല്ലാ തിയറ്ററുകളിലും ഹൗസ് ഫുൾ ഷോയുമായാണ് പാപ്പൻ മുന്നേറുന്നത്. ഒരിടവേളയ്ക്കു ശേഷം സുരേഷ് ഗോപി പൊലീസ് വേഷത്തില് എത്തുന്ന ചിത്രമാണിത്. എബ്രഹാം മാത്യു മാത്തന് എന്നാണ് കഥാപാത്രത്തിന്റെ പേര്. പൊറിഞ്ചു മറിയം ജോസിനു ശേഷം ജോഷിയുടെ സംവിധാനത്തില് എത്തുന്ന ചിത്രവുമാണിത്.
'റെഫറൻസ് സുരേഷ് ഗോപി കഥാപാത്രങ്ങള്', 'വിൻസി ഐപിഎസ്' ആയതിനെ കുറിച്ച് നീത പിള്ള
ഗോകുല് സുരേഷും ചിത്രത്തില് ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. സുരേഷ് ഗോപിയും മകനും ആദ്യമായി ഒന്നിച്ചെത്തിയ സിനിമ കൂടിയാണിത്. ഡേവിഡ് കാച്ചപ്പിള്ളി പ്രൊഡക്ഷന്സ് നിര്മ്മിച്ച ചിത്രം സുരേഷ് ഗോപിയുടെ കരിയറിലെ 252-ാം സിനിമയാണ്. ക്രൈം ത്രില്ലര് ചിത്രത്തില് നീത പിള്ള, നൈല ഉഷ, ആശ ശരത്ത്, കനിഹ, ചന്ദുനാഥ്, വിജയരാഘവന്, ടിനി ടോം, ഷമ്മി തിലകന്, സണ്ണി വെയ്ന് തുടങ്ങിയവരും അഭിനയിച്ചിട്ടുണ്ട്.
