സുരേഷ് ഗോപിയുടെ കുടുംബ ഫോട്ടോ ഏറ്റെടുത്ത് ആരാധകര്.
മലയാളത്തിന്റെ പ്രിയപ്പെട്ട താര കുടുംബമാണ് സുരേഷ് ഗോപിയുടേത്. സുരേഷ് ഗോപിയുടെ മകൻ ഗോകുല് സുരേഷും നടനെന്ന നിലയില് പ്രേക്ഷകരുടെ പ്രിയങ്കരനാണ്. ഇപ്പോഴിതാ ഗോകുല് സുരേഷ് എടുത്ത ഒരു സെല്ഫിയാണ് ഓണ്ലൈനില് തരംഗമാകുന്നത്. ഗോകുലിനൊപ്പം അച്ഛൻ സുരേഷ് ഗോപി, അമ്മ രാധിക, സഹോദരങ്ങളായ ഭാഗ്യ, ഭാവ്നി, മാധവ് എന്നിവരാണ് ചിത്രത്തിലുള്ളത്.
ജോഷി സംവിധാനം ചെയ്ത 'പാപ്പൻ' എന്ന ചിത്രമാണ് സുരേഷ് ഗോപിയുടേതായി ഏറ്റവും ഒടുവില് പ്രദര്ശനത്തിന് എത്തിയത്. ഗോകുല് സുരേഷും ചിത്രത്തില് പ്രധാനപ്പെട്ട ഒരു കഥാപാത്രത്തെ അവതരിപ്പിച്ചിരുന്നു. ഇതാദ്യമായിട്ടാണ് സുരേഷ് ഗോപിയും മകൻ ഗോകുലും ഒരു സിനിമയില് ഒന്നിച്ച് അഭിനയിക്കുന്നത്. 'പാപ്പൻ' 50 കോടി ക്ലബില് കടന്നിരുന്നു.
ഗോകുലം ഗോപാലൻ, ഡേവിഡ് കാച്ചപ്പിള്ളി, റാഫി മതിര എന്നിവർ ചേർന്നാണ് ചിത്രം നിര്മ്മിച്ചിരിക്കുന്നത്. ഗോകുലം മൂവീസും ഡ്രീം ബിഗ് ഫിലിംസും ചേർന്നാണ് ചിത്രം തീയേറ്ററുകളിൽ എത്തിച്ചത്. ക്രൈം ത്രില്ലര് വിഭാഗത്തില് പെടുന്ന ചിത്രത്തില് നീത പിള്ള, നൈല ഉഷ, ആശ ശരത്ത്, കനിഹ, ചന്ദുനാഥ്, വിജയരാഘവന്, ടിനി ടോം, സണ്ണി വെയ്ന് തുടങ്ങിയവരും മുഖ്യ വേഷങ്ങളിൽ എത്തി. ചിത്രത്തില് സുരേഷ് ഗോപിയുടെ കഥാപാത്രന്റെ മകളായ 'വിന്സി' ആയി നീത പിള്ള അഭിനയിച്ചത് ശ്രദ്ധ പിടിച്ചുപറ്റിയിരുന്നു.
പാപ്പൻ റിലീസ് ചെയ്ത് 18 ദിവസം കഴിഞ്ഞപ്പോള് തന്നെ മൊത്തം ബിസിനസിന്റെ കാര്യത്തില് 50 കോടിയിലെത്തിയിരുന്നു. തിയറ്റര് കളക്ഷന് പുറമേ , ഒടിടി, സാറ്റലൈറ്റ് അവകാശങ്ങള് വിറ്റതും ചേര്ത്തായിരുന്നു ഈ കണക്ക്. കേരളത്തില് 250 ഓളം തീയറ്ററുകളിലായിരുന്ന ചിത്രം റിലീസ് ചെയ്തത്. രണ്ടാമത്തെ ആഴ്ച കേരളത്തിന് പുറത്തും റിലീസ് ചെയ്തപ്പോള് 600 സ്ക്രീനുകളായിരുന്നു. 'സലാം കാശ്മീരി'ന് ശേഷം ജോഷി- സുരേഷ് ഗോപി കൂട്ടുകെട്ടിൽ ഇറങ്ങിയ ചിത്രം കൂടിയാണിത്. സുരേഷ് ഗോപിയുടെ കരിയറിലെ 252-ാം ചിത്രമാണ് 'പാപ്പൻ'. 'എബ്രഹാം മാത്യു മാത്തന്' എന്നായിരുന്നു സുരേഷ് ഗോപി കഥാപാത്രത്തിന്റെ പേര്.
Read More : 'സൈറണു'മായി കീര്ത്തി സുരേഷ്, ജയം രവി ചിത്രത്തിന്റെ മോഷൻ പോസ്റ്റര് വീഡിയോ
