ആലിയ ഭട്ട് ചിത്രത്തിന്റെ ട്രെയിലര് പുറത്തുവിട്ടു.
ആലിയ ഭട്ട് നായികയാകുന്ന ചിത്രമാണ് 'ഗംഗുഭായി കത്തിയവാഡി' (Gangubai Kathiawadi). സഞ്ജയ് ലീല ബന്സാലിയാണ് ചിത്രം സംവിധാനം ചെയ്യുന്നത്. പ്രഖ്യാപനം മുതലേ ചിത്രം വലിയ വാര്ത്തയായിരുന്നു. കാമാത്തിപുര പശ്ചാത്തലമാക്കുന്ന ചിത്രത്തിന്റെ ട്രെയിലര് പുറത്തുവിട്ടിരിക്കുകയാണ് ഇപ്പോള്.
ആലിയയുടെ കരിയറിലെ മികച്ച പ്രകടനങ്ങളിലൊന്നായിരിക്കും ഗംഗുഭായി' എന്നാണ് പ്രതീക്ഷ.'പദ്മാവതി'നു ശേഷം എത്തുന്ന സഞ്ജയ് ലീല ബന്സാലി ചിത്രമാണ് 'ഗംഗുഭായി കത്തിയവാഡി'. ഹുസൈന് സെയ്ദിയുടെ 'മാഫിയ ക്വീന്സ് ഓഫ് മുംബൈ' എന്ന പുസ്തകത്തിലെ ഗംഗുഭായ് കൊത്തേവാലി എന്ന സ്ത്രീയുടെ ജീവിതകഥയില് നിന്ന് പ്രചോദനം ഉള്ക്കൊണ്ടതാണ് ചിത്രം. 2019 അവസാനം ആദ്യ ഷെഡ്യൂള് ആരംഭിച്ച ഷൂട്ടിംഗ് കൊവിഡ് പശ്ചാത്തലത്തില് മാസങ്ങളോളം മുടങ്ങിയതിനാലാണ് പൂര്ത്തിയാകാൻ വൈകിയത്.
സഞ്ജയ് ലീല ബന്സാലിയും ഡോ. ജയന്തിലാല് ഗാഡയും ചേര്ന്നാണ് നിര്മ്മാണം. ബന്സാലി പ്രൊഡക്ഷന്സ്, പെന് സ്റ്റുഡിയോസ് എന്നിവയുടെ ബാനറിലാണ് നിര്മാണം. സഞ്ചിത് ബല്ഹാരയാണ് ചിത്രത്തിന്റെ സംഗീത സംവിധാനം. സഞ്ജയ് ലീല ബന്സാലിയാണ് ചിത്രസംയോജനം നിര്വഹിക്കുന്നതും.
അജയ് ദേവ്ഗണും ചിത്രത്തില് അതിഥി വേഷത്തിലുണ്ട്. 'കരീം ലാല'യെന്ന കഥാപാത്രമായിട്ടാണ് അജയ് ദേവ്ഗണ് എത്തുന്നത്. സുദീപ് ചാറ്റര്ജിയാണ് ചിത്രത്തിന്റെ ഛായാഗ്രാഹണം. ഫെബ്രുവരി 25നാണ് ചിത്രം പ്രദര്ശനത്തിനെത്തുക.
