സോണി ലിവിലൂടെ ഒടിടി റിലീസ് ആയെത്തിയ ചിത്രം
ചുരുങ്ങിയ കാലം കൊണ്ട് മലയാളത്തിലെ യുവതാരനിരയില് പ്രകടനം കൊണ്ട് തന്റേതായ സ്ഥാനം അടയാളപ്പെടുത്തിയ നടനാണ് ഷെയ്ന് നിഗം (Shane Nigam). ഓരോ ചിത്രം കൂടുന്തോറും തന്നില് ആസ്വാദകര്ക്കുള്ള പ്രതീക്ഷയും വര്ധിപ്പിക്കുകയാണ് ഷെയ്ന് നിഗം. ഡയറക്ട് ഒടിടി റിലീസ് ആയി സോണി ലിവിലൂടെ എത്തിയ ഭൂതകാലമാണ് ഷെയ്നിന്റേതായി പ്രേക്ഷകര്ക്ക് മുന്നിലെത്തിയ അവസാനത്തെ ചിത്രം. റിലീസിന്റെ സമയത്ത് സോഷ്യല് മീഡിയയില് ചിത്രം പരക്കെ സംസാരവിഷയമായിരുന്നു. ഇപ്പോഴിതാ ചിത്രത്തെക്കുറിച്ചും അതിലെ ഷെയ്നിന്റെ പ്രകടനത്തെക്കുറിച്ചും പറയുകയാണ് മുതിര്ന്ന സംവിധായകന് ഭദ്രന് (Bhadran). ഒരു അഭിനേതാവ് എന്ന നിലയില് ഷെയ്നിന് എതിരായുള്ളത് ഷെയ്ന് മാത്രമാണെന്ന് ഭദ്രന് കുറിക്കുന്നു. സോഷ്യല് മീഡിയയിലൂടെയാണ് ഭദ്രന്റെ അഭിപ്രായപ്രകടനം. നവാഗതനായ രാഹുല് സദാശിവന് സംവിധാനം ചെയ്തിരിക്കുന്ന ചിത്രത്തില് ഷെയ്നിനൊപ്പം രേവതിയും ഒരു പ്രധാന കഥാപാത്രത്തെ അവതരിപ്പിച്ചിരിക്കുന്നു. നിര്മ്മാണത്തിലും ഷെയ്നിന് പങ്കാളിത്തമുണ്ട്.
ഭദ്രന് പറയുന്നു
'ഭൂതകാലം ' ഒരു പക്ഷേ, നമ്മളോരോരുത്തരുടെയും തനിയാവർത്തനം തന്നെ. അസ്വാഭാവികതയുടെ ഒരു തരിമ്പ് പോലും പെടാത്ത ഒരു നല്ല ചലച്ചിത്രം. മാനസികവിഭ്രാന്തിയിൽ മരുന്ന് കഴിച്ചുകൊണ്ടിരിക്കുന്ന ഒരു വിധവയും അവരുടെ മകനും മുത്തശ്ശിയും അടങ്ങിയ ഒരു കൊച്ച് വീട്. എങ്ങുമെത്താതെ നിൽക്കുന്ന മകനെ കാണുമ്പോൾ ഉണ്ടാകുന്ന അമ്മയുടെ ആശങ്കകളും സംഘർഷങ്ങളും അമ്മയെന്ന വികാരത്തെ സങ്കീർണമാക്കി. മുത്തശ്ശിയുടെ മരണം മകന്റെ മനസ്സിൽ വിഹ്വല ചിത്രങ്ങളായി രൂപപ്പെടാൻ തുടങ്ങി. ദുർമരണങ്ങൾ സംഭവിച്ചിട്ടുള്ള ഒരു വീട്ടിൽ ദുർബല മനസുകൾ വന്ന് ചേക്കേറുമ്പോൾ അവിടെ അവർ കാണുന്ന കാഴ്ചകളിൽ ഒരു സത്യസന്ധത ഉണ്ടായിരുന്നു. കാണിയുടെ കാഴ്ചവട്ടത്തിൽ നിന്നും ഒരു ഫ്രെയിം പോലും അടർത്തി മാറ്റാൻ പറ്റാത്ത വിധം കോർത്ത് കോർത്ത് ഒരു ചങ്ങല പോലെ പിടിവിടാതെ രാഹുൽ സൂക്ഷ്മതയോടെ കൊണ്ടു നടന്നു. അഭിനന്ദനങ്ങള്... ഷെയ്ൻ നിഗം കുത്തൊഴുക്കിൽ വീണ് ട്രയാംഗിൾ ചുഴിയിൽ പെട്ട് പോകുമെന്ന് ആരെങ്കിലും ചിന്തിച്ചിട്ടുണ്ടെങ്കിൽ അത് വെറും തോന്നൽ മാത്രം. ഭൂതകാലത്തിലെ ഷെയ്നിന്റെ 'വിനു' കൊടിമരം പോലെ ഉയർന്നു നിന്നു, ഇളക്കം തട്ടാതെ...
ഞാൻ സ്റ്റേറ്റ് അവാർഡിൽ കണ്ട 'വെയിലി'ലെ ഇതുപോലെ പ്രകാശിപ്പിക്കാൻ കഴിയാതെ പോയ ഒരമ്മയുടെ സ്നേഹത്തിന്റെ മുൻപിൽ പതറുകയും ഇടറുകയും ചെയ്യുന്നത് കണ്ടപ്പോൾ അന്നും എന്റെ കണ്ണുകൾ ചുവന്നിരുന്നു. ഇന്നും, ഈ സിനിമ കണ്ടപ്പോഴും. "എന്റെ പ്രശ്നം എന്താണെന്ന് അമ്മക്കറിയോ? ഞാൻ സ്നേഹിക്കുന്നവർ എന്നെ മനസിലാക്കാതെ ദൂരത്ത് നിൽക്കുന്നത് കാണുമ്പോൾ..." ആ പറച്ചിൽ വെയിലിൽ നിന്നും ഒത്തിരി ഒത്തിരി മാറ്റി നിർത്തിയ ഒരു രസക്കൂട്ട് കാണിച്ചു തന്നു. ഹായ് ഷെയ്ൻ, നിനക്ക് എതിര് നീ മാത്രമേയുള്ളൂ... Keep going... രേവതിയുടെ കരിയറിലെ ' ആശ ' യെ തിളക്കം കെടാതെ സൂക്ഷിച്ചു.
