ചെന്നൈ: നടി തൃഷയ്ക്കെതിരായ സ്ത്രീവിരുദ്ധ പരാമർഷത്തിൽ നടൻ മൻസൂർ അലി ഖാനെതിരെ കേസെടുത്ത് ചെന്നൈ പൊലീസ്
ചെന്നൈ: നടി തൃഷയ്ക്കെതിരായ സ്ത്രീവിരുദ്ധ പരാമർഷത്തിൽ നടൻ മൻസൂർ അലി ഖാനെതിരെ കേസെടുത്ത് ചെന്നൈ പൊലീസ്. സ്ത്രീത്വത്തെ അപമാനിക്കുക, ലൈംഗിക ചുവയോടെ സംസാരിക്കുക എന്നീ വകുപ്പുകൾ ചുമതിയാണ് കേസെടുത്തത്; നടനെതിരെ കേസെടുക്കാൻ ദേശീയ വനിത കമ്മീഷൻ, തമിഴ്നാട് ഡിജിപിക്ക് നിർദേശം നൽകിയിരുന്നു. ഇന്ന് രാവിലെ ചെന്നൈയിൽ വാർത്താസമ്മേളനം നടത്തിയ മൻസൂർ, പരാമർഷത്തിൽ മാപ്പു പറയില്ലെന്ന് വ്യക്തമാക്കിയിരുന്നു. സിനിമയിലെ ബലാത്സംഗ രംഗങ്ങൾ യഥാർത്ഥം അല്ല, തൃഷയ്ക്കൊപ്പം ഇനിയും അഭിനയിക്കുമെന്നും, വിവാദത്തിലൂടെ കൂടുതൽ പ്രശസ്തൻ ആയെന്നും മൻസൂർ അവകാശപ്പെട്ടിരുന്നു.
നടൻ മന്സൂര് അലിഖാൻ തനിക്കെതിരെ നടത്തിയ മോശം പരാമർശത്തിൽ രൂക്ഷ പ്രതികരണവുമായി നടി തൃഷ രംഗത്ത് എത്തിയത് വലിയ വാര്ത്ത പ്രധാന്യമാണ് നേടിയത്. തനിക്കെതിരായുള്ള മൻസൂറിന്റെ വാക്കുകളെ ശക്തമായ രീതിയിൽ അപലപിക്കുന്നുവെന്നും നടൻ മനുഷ്യരാശിക്ക് തന്നെ അപമാനമാണെന്നും തൃഷ പറഞ്ഞത്. പിന്നാലെ സിനിമ രംഗത്തെ പ്രമുഖര് തൃഷയെ പിന്തുണച്ച് രംഗത്ത് എത്തുകയും ചെയ്തിരുന്നു.
ഇതിന് പിന്നാലെ ആയിരുന്നു തൃഷയ്ക്കെതിരായ പരാമര്ശത്തില് മാപ്പു പറയില്ലെന്നാണ് മന്സൂര് അലി ഖാന് പറഞ്ഞത്. ചെന്നൈയില് വിളിച്ചുചേര്ത്ത വാര്ത്താസമ്മേളനത്തിലാണ് മന്സൂറിന്റെ പ്രസ്താവന. തന്നോട് മാപ്പ് പറയാന് ആവശ്യപ്പെട്ട തമിഴ് താര സംഘടനയെയും മന്സൂര് വിമര്ശിച്ചു. മാപ്പു പറയാൻ തന്നോട് ആവശ്യപ്പെട്ടത് വിശദീകരണം ചോദിക്കാതെയാണെന്ന് മന്സൂര് ആരോപിച്ചു. നാല് മണിക്കൂറിനുള്ളില് തനിക്കെതിരായ നോട്ടീസ് പിന്വലിക്കണമെന്നും മന്സൂര് ആവശ്യപ്പെട്ടു. ഇല്ലെങ്കില് താന് നിയമ നപടിയിലേക്ക് കടക്കുമെന്നും നടന് പറഞ്ഞു.
Read more: 'ഇത് അംഗീകരിക്കാനാവില്ല'; ഒടുവില് മന്സൂര് അലി ഖാനെ തള്ളി ലിയോ നിര്മ്മാതാക്കളും
മാപ്പ് പറയേണ്ടുന്ന ഒരു തെറ്റും ഞാന് ചെയ്തിട്ടില്ല. നടികര് സംഘത്തിന്റെ നീക്കങ്ങള് ഹിമാലയന് മണ്ടത്തരമാണ്. തമിഴ്നാട്ടിലെ ജനങ്ങള് എനിക്കൊപ്പമാണ്. സിനിമയിലെ ബലാത്സംഗം യഥാർത്ഥമാണോ എന്നും മന്സൂര് ചോദിക്കുന്നു. സിനിമയില് കൊലകള് കാണിക്കുന്നു ആരെങ്കിലും മരിക്കുന്നുണ്ടോ എന്നും മന്സൂര് പത്ര സമ്മേളനത്തില് ചോദിച്ചു. നേരത്തെ നടി ഖുശ്ബു സുന്ദർ, സംവിധായകൻ ലോകേഷ് കനകരാജ്, കാർത്തിക് സുബ്ബരാജ്, ഗായിക ചിന്മയി ശ്രീപദ എന്നിവരുൾപ്പെടെ തമിഴ്നാട്ടിലെ നിരവധി സെലിബ്രിറ്റികൾ പിന്നാലെ മന്സൂറിനെ വിമര്ശിച്ച് രംഗത്ത് എത്തിയിരുന്നു.
ഏഷ്യാനെറ്റ് ന്യൂസ് വാർത്തകൾ തത്സമയം കാണാം
