കൂടുതൽ ഉത്തരവാദിത്തം ആർക്കെന്ന് ചിന്തിക്കണമെന്നും നിങ്ങൾ വിജയുടെ പ്രതികരണമെടുക്കൂവെന്നുമായിരുന്നു ഇതുമായി ബന്ധപ്പെട്ട മാധ്യമങ്ങളുടെ ചോദ്യങ്ങൾക്ക് ഉദയനിധി സ്റ്റാലിൻ പ്രതികരിച്ചത്.
ചെന്നൈ : കരൂർ ദുരന്തത്തിൽ വിജയ് മാത്രമല്ല ഉത്തരവാദിയെന്നും സമൂഹത്തിനും ഉത്തരവാദിത്തമുണ്ടെന്നുമുള്ള നടൻ അജിത്തിന്റെ പ്രസ്താവനയോട് പ്രതികരിച്ച് ഉപമുഖ്യമന്ത്രി ഉദയനിധി സ്റ്റാലിൻ. കൂടുതൽ ഉത്തരവാദിത്തം ആർക്കെന്ന് ചിന്തിക്കണമെന്നും നിങ്ങൾ വിജയുടെ പ്രതികരണമെടുക്കൂവെന്നുമായിരുന്നു ഇതുമായി ബന്ധപ്പെട്ട മാധ്യമങ്ങളുടെ ചോദ്യങ്ങൾക്ക് ഉദയനിധി സ്റ്റാലിൻ പ്രതികരിച്ചത്. വിജയ് മാത്രമല്ല ഉത്തരവാദിയെന്നും സമൂഹത്തിനും ഉത്തരവാദിത്തമുണ്ടെന്നും അജിത് പറഞ്ഞിരുന്നു. രാഷ്ട്രീയത്തിലിറങ്ങിയ വിജയെ ഇകഴ്ത്താൻ അജിത്തിനെ പുകഴ്ത്തുന്നതായിരുന്നു ഡിഎംകെ രീതി. എന്നാൽ അജിത്തിന്റെ പ്രതികരണം ഡിഎംകെയ്ക്ക് വലിയ ക്ഷീണമുണ്ടാക്കിയിട്ടുണ്ട്.
അജിത്തിന്റെ വാക്കുകൾ
കരൂർ ദുരന്തത്തിന്റെ പശ്ചാത്തലത്തിൽ, ജനക്കൂട്ടത്തെ അമിതമായി പ്രോത്സാഹിപ്പിക്കുന്ന പ്രവണതയെ ശക്തമായി വിമർശിച്ചായിരുന്നു അജിത്തിന്റെ പ്രതികരണം. "ആരേയും താഴ്ത്തിക്കെട്ടാനല്ല ഞാൻ ഇത് പറയുന്നത്. എന്നാൽ കരൂർ ദുരന്തത്തെ തുടർന്ന് തമിഴ്നാട്ടിൽ പലതും നടക്കുന്നുണ്ട്. ആ വ്യക്തി (വിജയ്) മാത്രമല്ല ഇതിന് ഉത്തരവാദി. സംഭവത്തിൽ നമുക്ക് എല്ലാവർക്കും ഉത്തരവാദിത്തമുണ്ട്. മാധ്യമങ്ങൾക്കും ഇതിൽ പങ്കുണ്ട്. ജനക്കൂട്ടങ്ങളെ പ്രോത്സാഹിപ്പിക്കുന്ന പ്രവണത മാധ്യമങ്ങളും അവസാനിപ്പിക്കണം. സ്വാധീനം തെളിയിക്കാൻ ആൾക്കൂട്ടത്തെ ഉപയോഗിക്കുന്നവരായി സമൂഹം മാറിയിരിക്കുന്നു. ആൾക്കൂട്ടങ്ങൾ അമിതമായി പ്രോത്സാഹിപ്പിക്കപ്പെടുന്ന ഒരു സമൂഹമായി നാം മാറിയിരിക്കുന്നു. ഈ രീതി അവസാനിക്കണം എന്നായിരുന്നു അജിത്തിന്റെ വാക്കുകൾ.
