Asianet News MalayalamAsianet News Malayalam

കെജിഎഫ് 2 എന്നെത്തും? ആരാധകര്‍ കാത്തിരിക്കുന്ന പ്രഖ്യാപനം ഇന്ന്

90 ശതമാനം ചിത്രീകരണവും കൊവിഡ് കാലത്തിനു മുന്‍പ് പൂര്‍ത്തിയാക്കിയിരുന്ന ചിത്രത്തിന്‍റെ അവസാന ഷെഡ്യൂള്‍ ആരംഭിച്ചത് ഓഗസ്റ്റ് 26ന് ആയിരുന്നു

kgf 2 release date today
Author
Hyderabad, First Published Jan 29, 2021, 12:08 PM IST

ഒരു കന്നഡ ചിത്രത്തിന്‍റെ രണ്ടാംഭാഗത്തിന് ഇന്ത്യയൊട്ടാകെയുള്ള ആരാധകര്‍ കാത്തിരിക്കുക! പ്രശാന്ത് നീലിന്‍റെ സംവിധാനത്തില്‍ 2018ല്‍ 'കെജിഎഫ്' എന്ന പിരീഡ് ആക്ഷന്‍ ചിത്രം തിയറ്ററുകളില്‍ എത്തുന്നതുവരെ മുകളില്‍ പറഞ്ഞത് കേട്ടാല്‍ സിനിമാപ്രേമികള്‍ ചിരിക്കുമായിരുന്നു. എന്നാല്‍ ഇന്ന് അത് യാഥാര്‍ഥ്യമാണ്. അത്ര വലിയ കാത്തിരിപ്പാണ് 'കെജിഎഫി'ന്‍റെ രണ്ടാംഭാഗത്തിന്. കൊവിഡ് ഇടവേളയ്ക്കുശേഷം രാജ്യത്തെ തിയറ്ററുകള്‍ വീണ്ടും സജീവമായിക്കൊണ്ടിരിക്കുന്ന വേളയില്‍ കെജിഎഫ് 2ന്‍റെ റിലീസ് തീയതി അണിയറപ്രവര്‍ത്തകര്‍ ഇന്ന് വൈകിട്ട് പ്രഖ്യാപിക്കും. വൈകിട്ട് 6.32നാണ് ഇതു സംബന്ധിച്ച പ്രഖ്യാപനം ഉണ്ടാവുക.

ജനുവരി 7ന് പ്രീമിയര്‍ ചെയ്ത, ചിത്രത്തിന്‍റെ ടീസറിന് റെക്കോര്‍ഡ് പ്രതികരണമാണ് യുട്യൂബില്‍ ലഭിച്ചത്. 16.3 കോടിയിലേറെ കാഴ്ചകളാണ് യുട്യൂബില്‍ ടീസറിന് ഇതുവരെ ലഭിച്ചിരിക്കുന്നത്. 90 ശതമാനം ചിത്രീകരണവും കൊവിഡ് കാലത്തിനു മുന്‍പ് പൂര്‍ത്തിയാക്കിയിരുന്ന ചിത്രത്തിന്‍റെ അവസാന ഷെഡ്യൂള്‍ ആരംഭിച്ചത് ഓഗസ്റ്റ് 26ന് ആയിരുന്നു. തുടര്‍ന്നുള്ള ദിവസങ്ങളില്‍ ചിത്രത്തിന്‍റെ നിരവധി ലൊക്കേഷന്‍ സ്റ്റില്ലുകളും അണിയറക്കാര്‍ പുറത്തുവിട്ടിരുന്നു. 

സഞ്ജയ് ദത്ത് ആണ് ചിത്രത്തിലെ അധീര എന്ന പ്രതിനായക കഥാപാത്രത്തെ അവതരിപ്പിക്കുന്നത്. കഥാപാത്രത്തിന്‍റെ ഫസ്റ്റ് ലുക്ക് അണിയറക്കാര്‍ നേരത്തേ പുറത്തുവിട്ടിരുന്നു. എന്നാല്‍ സഞ്ജയ് ദത്ത് കാന്‍സര്‍ ചികിത്സയ്ക്കായി വിദേശത്തേക്ക് പോയതോടെ അദ്ദേഹത്തിന്‍റെ രംഗങ്ങള്‍ പൂര്‍ത്തിയാക്കാനും കാത്തിരിക്കേണ്ടിവന്നു. അവശേഷിച്ച മൂന്ന് ദിവസത്തെ ചിത്രീകരണം അദ്ദേഹം പിന്നീടെത്തി പൂര്‍ത്തിയാക്കി. കേരളത്തിലും വന്‍ തിയറ്റര്‍ പ്രതികരണം പ്രതീക്ഷിക്കുന്ന 'കെജിഎഫ് 2'ന്‍റെ വിതരണാവകാശം സ്വന്തമാക്കിയിരിക്കുന്നത് പൃഥ്വിരാജ് പ്രൊഡക്ഷന്‍സ് ആണ്.

Follow Us:
Download App:
  • android
  • ios