'സലാറി'ന് കാത്തിരിക്കുമ്പോഴാണ് മറ്റൊരു വൻ ചിത്രത്തിന്റെ വാര്ത്തകള് വരുന്നത്.
പ്രഭാസ് നായകനാകുന്ന ഏറ്റവും പുതിയ ചിത്രം 'സലാറി'നായി ആകാംക്ഷയോടെ കാത്തിരിക്കുകയാണ് ആരാധകര്. 'കെജിഎഫ്' എന്ന ഹിറ്റ് കന്നഡ ചിത്രത്തിന് ശേഷം പ്രശാന്ത് നീല് ഒരുക്കുന്ന പ്രൊജക്റ്റ് എന്നതും ആകര്ഷണമാണ്. 'സലാറി'ന്റെ അപേറ്റുകള്ക്ക് വലിയ സ്വീകാര്യതയാണ് ഓണ്ലൈനില് ലഭിക്കുന്നത്. പ്രശാന്ത് നീലും പ്രഭാസും മറ്റൊരു ചിത്രത്തിനായും ഒന്നിക്കുന്നുവെന്നതാണ് പുതിയ വാര്ത്ത.
നിര്മാതാവ് ദില് രാജുമാണ് പ്രഭാസ് ചിത്രത്തെ കുറിച്ച് വെളിപ്പെടുത്തിയത്.ഒരു പുരാണ സിനിമയായിരിക്കും ഇതെന്നും തിരക്കഥ പ്രശാന്ത് പൂര്ത്തിയാക്കിയെന്നും വ്യക്തമാക്കിയ ദില് രാജു ജൂനിയൻ എൻടിആര് ചിത്രത്തിനു ശേഷമാകും പ്രഭാസിന്റെ പ്രൊജക്റ്റ് ആരംഭിക്കുകയെന്നും അറിയിച്ചു.'സലാര്' എന്ന ചിത്രത്തില് പൃഥ്വിരാജും ഒരു പ്രധാന വേഷത്തിലുണ്ട്.ഭുവൻ ഗൗഡ ഛായാഗ്രാഹണം നിര്വഹിക്കുന്ന ചിത്രത്തില് ശ്രുതി ഹാസനാണ് നായിക.
വിജയ് കിരംഗന്ദുറാണ് ചിത്രത്തിന്റെ നിര്മാണം. 'കെജിഎഫ്' എന്ന ചിത്രത്തിന്റെ ബാനറായ ഹൊംബാളെ ഫിലിംസ് ആണ് 'സലാറും' നിര്മിക്കുന്നത്. മധു ഗുരുസ്വാമിയാണ് ചിത്രത്തില് പ്രതിനായക വേഷത്തില് എത്തുന്നത്. രവി ബസ്രുറാണ് ചിത്രത്തിന്റെ സംഗീത സംവിധാനം നിര്വഹിക്കുന്നത്.
ഇതിഹാസ കാവ്യമായ 'രാമായണ'ത്തെ ആസ്പദമാക്കി പ്രഭാസ് നായകനാകുന്ന ചിത്രം 'ആദിപുരുഷിനാ'യും ആരാധകര് കാത്തിരിക്കുകയാണ്. ഓം റൗട്ട് ആണ് ചിത്രം സംവിധാനം ചെയ്യുന്നത്. 2023 ജൂണ് 16ന് ആണ് ചിത്രം റിലീസ് ചെയ്യുക എന്നാണ് അറിയിച്ചിരിക്കുന്നത്. 'ആദിപുരുഷി'ല് പ്രഭാസ് 'രാഘവ'യാകുമ്പോള് 'ജാനകി'യെന്ന കഥാപാത്രമായി അഭിനയിക്കുന്നത് കൃതി സനോണ് ആണ്. കാര്ത്തിക് പളനി ഛായാഗ്രാഹണം നിര്വഹിക്കുന്ന ചിത്രത്തിന്റെ ഡിജിറ്റല് റൈറ്റ്സ് നെറ്റ്ഫ്ലിക്സ് റെക്കോര്ഡ് തുകയ്ക്ക് സ്വന്തമാക്കിയെന്നാണ് റിപ്പോര്ട്ടുകള് വന്നിരുന്നത്. 250 കോടി രൂപയ്ക്കാണ് 'ആദിപുരുഷെ'ന്ന ചിത്രത്തിന്റെ ഡിജിറ്റല് റൈറ്റ്സ് നെറ്റ്ഫ്ലിക്സ് സ്വന്തമാക്കിയെന്ന് മൂവി ഹെറാള്ഡ് റിപ്പോര്ട്ട് ചെയ്യുന്നു. സെയ്ഫ് അലി ഖാനും സണ്ണി സിംഗും 'ആദിപുരുഷി'ല് വേഷമിടുന്നു.
