സൂര്യയുടെ കരിയറിലെ ഏറ്റവും വലിയ സിനിമകളില് ഒന്നായിരിക്കും കങ്കുവ
സിനിമാ ചിത്രീകരണത്തിനിടെ നടന് സൂര്യയ്ക്ക് പരിക്കേറ്റതായ വാര്ത്ത ഇന്നലെ ഉച്ചയോടെയാണ് എത്തിയത്. കങ്കുവ എന്ന സിനിമയുടെ ഷൂട്ടിംഗിനിടെ ചെന്നൈയിലെ സ്റ്റുഡിയോയില് ബുധനാഴ്ച രാത്രി 11 മണിയോടെയായിരുന്നു അപകടം. ചിത്രീകരണത്തിനിടെ ഒരു റോപ്പ് ക്യാം പൊട്ടി സൂര്യയുടെ തോളിലേക്ക് വീഴുകയായിരുന്നെന്നാണ് റിപ്പോര്ട്ടുകള്. എന്നാല് അദ്ദേഹത്തിന് നിസ്സാര പരിക്കുകളേ ഉള്ളൂവെന്നാണ് സൂചന. ഇതേത്തുടര്ന്ന് സിനിമയുടെ ചിത്രീകരണം താല്ക്കാലികമായി നിര്ത്തിവച്ചിരുന്നു. ഇന്നലെ വൈകുന്നേരത്തോടെ എക്സില് പ്രതികരണവുമായി സൂര്യ എത്തിയിരുന്നു.
"പ്രിയ സുഹൃത്തുക്കളേ, അഭ്യുദയകാംക്ഷികളേ, എന്റെ പ്രിയ ആരാധകരേ, ഗെറ്റ് വെല് സൂണ് മെസേജുകള്ക്ക് ഹൃദയം തൊടുന്ന നന്ദി. ഇപ്പോള് വളരെ ആശ്വാസം തോന്നുന്നു. നിങ്ങളുടെ സ്നേഹത്തിന് ഞാന് എന്നും കടപ്പെട്ടിരിക്കും", സൂര്യ കുറിച്ചു.
അതേസമയം സൂര്യയുടെ കരിയറിലെ ഏറ്റവും വലിയ സിനിമകളില് ഒന്നായിരിക്കും കങ്കുവ. പിരീഡ് ആക്ഷന് ഡ്രാമ വിഭാഗത്തില് പെടുന്ന ചിത്രത്തില് അഞ്ച് വ്യത്യസ്ത വേഷങ്ങളിലാണ് സൂര്യ എത്തുന്നത്. 350 കോടി ബജറ്റില് ചിത്രം നിര്മ്മിക്കുന്നത് സ്റ്റുഡിയോ ഗ്രീനിന്റെ ബാനറില് കെ ഇ ജ്ഞാനവേല് രാജയാണ്. 38 ഭാഷകളിലാണ് ചിത്രത്തിന്റെ ആഗോള റിലീസ് എന്ന് നിര്മ്മാതാവ് ഈയിടെ അറിയിച്ചിരുന്നു. "ചിത്രത്തിന് 3ഡി, ഐമാക്സ് പതിപ്പുകള് ഉണ്ടാവും. തമിഴ് സിനിമ ഇതുവരെ എത്തിച്ചേര്ന്നിട്ടുള്ള വിപണികളെയെല്ലാം അതിലംഘിച്ചുള്ള റീച്ച് ആണ് ഞങ്ങള് ഉദ്ദേശിക്കുന്നത്. വിചാരിക്കുന്ന രീതിയില് കാര്യങ്ങള് നടത്താല് ബോക്സ് ഓഫീസ് കണക്കുകളിലും തമിഴ് സിനിമയുടെ റീച്ചിലും ചിത്രം പുതിയ വാതിലുകള് തുറക്കും", ബിഹൈന്ഡ്വുഡ്സിന് നല്കിയ അഭിമുഖത്തില് ജ്ഞാനവേല് രാജ പറഞ്ഞിരുന്നു. ആദിനാരായണ തിരക്കഥയൊരുക്കിയിരിക്കുന്ന കങ്കുവയില് യുവി ക്രിയേഷന്സും സഹനിര്മ്മാതാക്കളാണ്. ദിഷ പഠാനിയാണ് നായിക. ബോളിവുഡ് നായികയുടെ തമിഴ് അരങ്ങേറ്റമാണ് ചിത്രം.
ALSO READ : 'മാത്യു ദേവസി'യെ കാണാന് 'കാതല്' ടീം 'ടര്ബോ' ലൊക്കേഷനില്
