വിജയ് നായകനാകുന്ന 'വാരിസി'നായി ആകാംക്ഷയോടെ കാത്ത് ആരാധകര്, റണ്ണിംഗ് ടൈം വിവരങ്ങള് പുറത്ത്
വംശി പൈഡിപ്പള്ളിയാണ് ചിത്രത്തിന്റെ സംവിധാനം.
വിജയ്യുടെ ആരാധാകര് ആകാംക്ഷയോടെ കാത്തിരിക്കുന്ന പുതിയ ചിത്രമാണ് 'വാരിസ്'. വംശി പൈഡിപ്പള്ളി ആണ് വിജയ് ചിത്രം സംവിധാനം ചെയ്യുന്നത്. 'വാരിസി'ന്റെ അപ്ഡേറ്റുകള്ക്ക് വലിയ സ്വീകാര്യതയാണ് ആരാധകരില് നിന്ന് ലഭിക്കുന്നത്. ചിത്രത്തിന്റ റണ്ണിംഗ് ടൈമിനെ കുറിച്ചുള്ള വാര്ത്തയാണ് ആരാധകര് പുതുതായി ഏറ്റെടുത്തിരിക്കുന്നത്.
'വാരിസി'ന്റെ റണ്ണിംഗ് ടൈം രണ്ട് മണിക്കൂറും 43 മിനിറ്റുമാണ് എന്നാണ് പുറത്തുവരുന്ന വിവരം. എസ് തമന്റെ സംഗീത സംവിധാനത്തിലുള്ള ചിത്രത്തിലെ 'രഞ്ജിതമേ', 'തീ ദളപതി', 'സോള് ഓഫ് വാരിസ്', 'ജിമിക്കി പൊണ്ണ്', 'വാ തലൈവാ' എന്നീ ഗാനങ്ങള് ഉള്പ്പെടുത്തിയിട്ടുള്ള ജൂക്ക്ബോക്സ് അടുത്തിടെ പുറത്തുവിട്ടിരുന്നു. കാര്ത്തിക് പളനിയാണ് ചിത്രത്തിന്റെ ഛായാഗ്രാഹണം നിര്വഹിക്കുന്നത്. പ്രവീണ് കെ എല് ചിത്രസംയോജനം നിര്വഹിക്കുന്ന ചിത്രം പൊങ്കല് റിലീസായിട്ടായിരിക്കും തിയറ്ററുകളില് എത്തുക.
മഹേഷ് ബാബു നായകനായ 'മഹര്ഷി' എന്ന ചിത്രത്തിലൂടെ മികച്ച ജനപ്രിയ ചിത്രത്തിനുള്ള 2019ലെ ദേശീയ അവാര്ഡ് നേടിയ സംവിധായകനാണ് 'വാരിശ്' ഒരുക്കുന്ന വംശി പൈഡിപ്പള്ളി. ശ്രീ വെങ്കടേശ്വര ക്രിയേഷന്സിന്റെ ബാനറില് ദില് രാജുവും ശിരീഷും ചേര്ന്നായിരിക്കും ചിത്രത്തിന്റെ നിര്മ്മാണം. ഈ നിര്മ്മാണ കമ്പനിയുടെ ആദ്യ തമിഴ് ചിത്രമാണ് ഇത്. ഫാമിലി എന്റര്ടെയ്നര് വിഭാഗത്തില് പെടുന്ന ചിത്രമാണ് ഇത്.
വിജയ്ക്ക് പുറമേ രശ്മിക മന്ദാന, ശരത് കുമാര്, പ്രകാശ് രാജ്, ശ്യാം, പ്രഭു, ജയസുധ, ശ്രീകാന്ത്, ഖുശ്ബു, സംഗീത കൃഷ്ണ തുടങ്ങിയ വൻ താരനിര തന്നെ 'വാരിസ്' എന്ന ചിത്രത്തില് അഭിനയിക്കുന്നു. കഴിഞ്ഞ വര്ഷം സെപ്റ്റംബര് 26ന് പ്രഖ്യാപിച്ച പ്രോജക്റ്റ് ആണ് 'വാരിസ്'. വിജയ്യുടെ അറുപത്തിയാറാം ചിത്രമാണ് ഇത്. തമിഴിലും തെലുങ്കിലുമായിട്ടാണ് ചിത്രം എത്തുക.
Read More: സുന്ദീപ് കിഷൻ നായകനായി 'മൈക്കിള്', ചിത്രത്തിലെ ഗാനം പുറത്ത്