ഷാരൂഖ് ഖാന്റേതായി 'പഠാൻ' എന്ന ചിത്രമാണ് ഇനി റിലീസ് ചെയ്യാനുള്ളത്.
രാജ്യത്ത് ഏറ്റവും ആരാധകരുള്ള താരങ്ങളുള്ള താരങ്ങളില് ഒരാളാണ് ഷാരൂഖ്. സിനിമയ്ക്ക് പുറത്തെ ജീവിതത്തിലും ഷാരൂഖ് ഖാൻ ആരാധകര്ക്ക് പ്രിയപ്പെട്ട ആളാണ്. ഭാര്യക്കും കുട്ടികള്ക്കും പ്രധാന്യം നല്കുന്ന താരവുമാണ് ഷാരൂഖ് ഖാൻ. ആദ്യത്തെ ഗേള് ഫ്രണ്ട് എന്ന ചോദ്യത്തിന് ഷാരൂഖ് ഖാൻ നല്കിയ മറുപടിക്ക് ലൈക്കുകളുമായി എത്തിയിരിക്കുകയാണ് ഇപ്പോള് ആരാധകര്.
ട്വിറ്ററില് ആരാധകരുമായി സംവദിക്കാൻ ഷാരൂഖ് അടുത്തിടെ സമയം കണ്ടെത്താറുണ്ട്. അത്തരമൊരു സംവാദത്തില് മനസ് തുറന്ന മറുപടികള് ഷാരൂഖ് ഖാൻ നല്കാറുമുണ്ട്. ആദ്യത്തെ ഗേള് ഫണ്ട്ര് ആരാണ് എന്നായിരുന്നു ഒരു ആരാധകൻ ഇന്ന് ചോദിച്ചത്. എന്റെ ഭാര്യ ഗൗരി എന്ന ഷാരൂഖിന്റെ മറുപടിക്ക് കമന്റുകളുമായും ലൈക്കുകളുമായും ആരാധകര് ആഘോഷിക്കുകയാണ്.
ഷാരൂഖ് ഖാൻ നായകനായ പുതിയ ചിത്രം 'പഠാനാ'യി ആകാംക്ഷയോടെ കാത്തിരിക്കുകയാണ് ആരാധകര്. സിദ്ധാര്ഥ് ആനന്ദ് സംവിധാനം ചെയ്യുന്ന ചിത്രത്തില് ഷാരൂഖ് ഖാനൊപ്പം ദീപിക പദുക്കോണ്, ജോണ് എബ്രഹാം, ഡിംപിള് കപാഡിയ, ഷാജി ചൗധരി, ഗൗതം, അഷുതോഷ് റാണ തുടങ്ങി ഒട്ടേറെ താരങ്ങള് ചിത്രത്തിലുണ്ട്. സത്ചിത് പൗലൗസാണ് ചിത്രത്തിന്റെ ഛായാഗ്രാഹണം നിര്വഹിക്കുന്നത്. 2023 ജനുവരി 25ന് തിയറ്റര് റിലീസ് പ്രഖ്യാപിച്ചിരിക്കുന്ന ചിത്രത്തിന്റെ ഡിജിറ്റല് റൈറ്റ്സ് ആമസോണ് പ്രൈം വീഡിയോയാണ് സ്വന്തമാക്കിയിരിക്കുന്നത്.
ഷാരൂഖ് ഖാൻ നായകനാകുന്ന മറ്റൊരു പ്രധാന ചിത്രം 'ജവാനാണ്.' അറ്റ്ലി സംവിധാനം ചെയ്യുന്ന ഷാരൂഖ് ചിത്രത്തിന്റെ ഒടിടി റൈറ്റ്സ് നെറ്റ്ഫ്ലിക്സ് 120 കോടി രൂപയ്ക്ക് സ്വന്തമാക്കിയെന്ന് റിപ്പോര്ട്ടുകളുണ്ട്. സാറ്റലൈറ്റ്, ഒടിടി റൈറ്റ്സ് വിറ്റുപോയ ഇനത്തില് മാത്രമായി 'ജവാൻ' 250 കോടി സ്വന്തമാക്കിയെന്നാണ് റിപ്പോര്ട്ട്. ആക്ഷന് എന്റര്ടെയ്നര് വിഭാഗത്തില് പെടുന്ന ചിത്രത്തില് സാന്യ മല്ഹോത്രയും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. വിജയ് സേതുപതിയും ഷാരൂഖിന്റെ ചിത്രത്തിലുണ്ട്. ഒരു അന്വേഷണോദ്യോഗസ്ഥയാണ് ഷാരൂഖ് ഖാൻ ചിത്രത്തില് നായികയായ നയന്താരയുടെയും കഥാപാത്രമെന്ന റിപ്പോര്ട്ടുകളും പുറത്തുവന്നിട്ടുണ്ട്. ഹിന്ദിക്ക് പുറമെ തമിഴ്, തെലുങ്ക്, മലയാളം, കന്നഡ ഭാഷകളില് പാന് ഇന്ത്യന് റിലീസ് ആയി എത്തുന്ന 'ജവാന്റെ' റിലീസ് 2023 ജൂണ് രണ്ടിന് ആണ്.
