തന്റെ വ്ലോഗിലൂടെയാണ് അനുമോൾ ഈ വാർത്ത ആരാധകരെ അറിയിച്ചത്.
മിനിസ്ക്രീൻ പ്രേക്ഷകരുടെ ഇഷ്ട താരങ്ങളിലൊരാളാണ് ആരാധകർ അനുക്കുട്ടി എന്നു സ്നേഹത്തോടെ വിളിക്കുന്ന അനുമോൾ. ടെലിവിഷന് പരമ്പരകളിലൂടെയാണ് അനുമോള് ശ്രദ്ധിക്കപ്പെടുന്നത്. പിന്നീട് സ്റ്റാര് മാജിക് എന്ന ടെലിവിഷൻ ഷോയിലൂടെയും പ്രശസ്തയായി. ബിഗ്ബോസ് കപ്പ് നേടിയതോടെ അനുമോളുടെ പ്രശസ്തി വീണ്ടും ഇരട്ടിച്ചു. കഴിഞ്ഞ ദിവസമായിരുന്നു തമിഴ്നാട് സ്വദേശി ഭുവനേഷുമായുള്ള അനുമോളുടെ വിവാഹം. അടുത്ത സുഹൃത്തുക്കളും ബന്ധുക്കളും മാത്രമാണ് അനുവിന്റെ താലികെട്ട് ചടങ്ങിലും പ്രീ വെഡ്ഡിങ്ങ് ഫംങ്ഷൻസിലും പങ്കെടുത്തത്. ഗുരുവായൂരിൽ വെച്ചു നടന്ന താലികെട്ടിനു മുൻപേ നടന്ന ഒരു കാര്യമാണ് അനുമോൾ സർപ്രൈസ് വീഡിയോ ആയി ഇപ്പോൾ പുറത്തു വിട്ടിരിക്കുന്നത്.
ഗുരുവായൂരിൽ വെച്ചു നടന്ന ചടങ്ങിനു മുൻപേ തന്നെ ചെന്നൈയിൽ വെച്ച് തങ്ങൾ വിവാഹിതരായ കാര്യമാണ് അനു വെളിപ്പെടുത്തിയിരിക്കുന്നത്. ജൂൺ ഏഴിന് രാവിലെ ചെന്നൈയിലെ ക്ഷേത്രത്തിൽവച്ചായിരുന്നു വിവാഹം നടന്നത്. ചെന്നൈയിലേക്ക് പോവുന്നതും വിവാഹത്തിന്റെ ദൃശ്യങ്ങളും അനുമോൾ പങ്കുവച്ചിട്ടുണ്ട്. അനുവിന്റെയും ഭുവനേഷിന്റെയും കുടുംബാംഗങ്ങൾ മാത്രമാണ് ഈ വിവാഹത്തിൽ പങ്കെടുത്തത്.
''ഇന്നത്തെ വ്ളോഗ് എനിക്ക് വളരെ സ്പെഷൽ ആണ്, എന്നെ സ്നേഹിക്കുന്ന നിങ്ങൾക്കും ഇതൊരു പ്രത്യേകതയുള്ള വീഡിയോ ആയിരിക്കും. നിങ്ങൾ ഈ വിഡിയോ കാണുമ്പോൾ എന്റെ ജീവിതത്തിൽ വലിയൊരു മാറ്റം സംഭവിച്ചിട്ടുണ്ടാകും. ഞാനും കുടുംബവും ഒരു പ്രത്യേക യാത്രയ്ക്ക് തയ്യാറെടുക്കുകയാണ്; അതെ, എന്റെ വിവാഹം തന്നെയാണ്. എന്റെ ജീവിതത്തിലെ മനോഹര നിമിഷങ്ങളിൽ നിങ്ങളുടെ പ്രാർത്ഥനയും സ്നേഹവും അനുഗ്രഹവും ഒപ്പമുണ്ടാകണം'', എന്നാണ് വീഡിയോ തുടങ്ങുമ്പോൾ അനുമോൾ പറയുന്നത്. വലിയൊരു സർപ്രൈസ് തന്റെ വ്ളോഗിലൂടെ പുറത്തു വരുമെന്ന് അനുമോൾ കഴിഞ്ഞ ദിവസം പങ്കുവെച്ച വീഡിയോയിൽ പറഞ്ഞിരുന്നു. പിന്നാലെയാണ് ചെന്നൈയിൽ വെച്ചു നടന്ന ഈ വിവാഹവാർത്ത താരം പങ്കുവെച്ചത്.
Related Articles
