ഗ്രാമീണ പശ്ചാത്തലത്തിൽ, കുടുംബബന്ധങ്ങളിലെ രസകരമായ നിമിഷങ്ങളും ജീവിതപാഠങ്ങളും നർമ്മത്തിൽ ചാലിച്ച് അവതരിപ്പിക്കുകയാണ് ഈ പരമ്പര
പ്രേക്ഷകരെ രസിപ്പിക്കാൻ ഏഷ്യാനെറ്റ് ഒരുക്കുന്ന പുതിയ സിറ്റ്കോം ഹാപ്പി കപ്പിൾസ് 29 മുതൽ, തിങ്കൾ മുതൽ വെള്ളി വരെ രാത്രി 10.30ന് സംപ്രേഷണം ചെയ്യുന്നു. ഇന്നത്തെ സാമൂഹ്യ സാഹചര്യത്തിൽ ഏറെ പ്രസക്തമായ ഒരു ആശയം അവതരിപ്പിക്കുകയാണ് ഈ സിരീസ് എന്ന് അണിയറക്കാര് പറയുന്നു. ചെറിയ തർക്കങ്ങളും പ്രശ്നങ്ങളും വിവാഹമോചനത്തിനുള്ള കാരണങ്ങളായി മാറുന്ന സാഹചര്യത്തിൽ സന്തോഷവും സമാധാനവും നിറഞ്ഞ ബന്ധം വളർത്തിയെടുക്കേണ്ടതിന്റെ പ്രാധാന്യം സീരിയൽ ചൂണ്ടിക്കാണിക്കുന്നുവെന്നും പിന്നണി പ്രവര്ത്തകര് പറയുന്നു. തുടർച്ചയായ ഒരു കഥയല്ല, മറിച്ച് ജീവിതത്തിലെ ചെറിയ സംഭവങ്ങളാണ് ഹാപ്പി കപ്പിൾസ് അവതരിപ്പിക്കുന്നത്.
ആധുനികമായ മാറ്റങ്ങൾ വന്നിട്ടും ഗ്രാമജീവിതത്തിന്റെ പരമ്പരാഗത മൂല്യങ്ങൾ സംരക്ഷിച്ച് നിലകൊള്ളുന്ന മുളങ്കാവിലെ ആനന്ദഭവനം എന്ന വീടാണ് കഥയുടെ പശ്ചാത്തലം. വീടുകൾ, ചായക്കട, ഗ്രാമവീഥികൾ, തപാൽ ഓഫീസുകൾ, തെങ്ങിന് തോട്ടങ്ങൾ, ഗ്രാമീണ പാതകൾ എന്നിവിടങ്ങളിലൂടെയാണ് പ്രധാന സംഭവങ്ങൾ അരങ്ങേറുന്നത്. കുടുംബബന്ധങ്ങളുടെ സൗന്ദര്യവും ഗ്രാമീണ ജീവിതത്തിന്റെ സ്നേഹവും ചേർത്ത് ഹാപ്പി കപ്പിൾസ് പ്രേക്ഷകർക്ക് ചിരിയും ജീവിതപാഠങ്ങളും നിറഞ്ഞ ഒരു പുതുമയാർന്ന അനുഭവം സമ്മാനിക്കാനൊരുങ്ങുകയാണെന്നും അണിയറക്കാര് പറയുന്നു.
