ദിലീപ് ആരാധകന്റെ കഥ പറയുന്ന ചിത്രം ഷിബുവിന് സംഗീതമൊരുക്കുന്നത് സച്ചിന്‍ വാര്യര്‍. ചിത്രത്തിലെ കാര്‍ത്തിക് ആലപിച്ച ആദ്യഗാനം ഉടന്‍ പുറത്തെത്തും.

ദിലീപ് ആരാധകനായ സിനിമാമോഹിയാണ് ഷിബുവിലെ നായകകഥാപാത്രം. അര്‍ജുന്‍, ഗോകുല്‍ എന്നിവര്‍ ചേര്‍ന്നാണ് സംവിധാനം. നേരത്തേ ഗോവിന്ദ് പത്മസൂര്യയും മിയയും പ്രധാന കഥാപാത്രങ്ങളെ അവതരിപ്പിച്ച '32-ാം അധ്യായം 23-ാം വാക്യം' എന്ന ചിത്രം ഒരുക്കിയിരുന്നു ഇവര്‍. 

തീയേറ്റര്‍ ജോലിക്കാരനായ അച്ഛനിലൂടെ സിനിമയെ പ്രണയിച്ച് തുടങ്ങുന്ന ചെറുപ്പക്കാരനാണ് ഷിബു. തൊണ്ണൂറുകളില്‍ പുറത്തുവന്ന സിനിമകള്‍ കണ്ടാണ് ഷിബു ഒരു കടുത്ത ദിലീപ് ആരാധകനായി മാറുന്നത്. പ്ലസ് ടു പഠനം കഴിഞ്ഞ് ദിലീപിനെ നായകനാക്കി സിനിമ ഒരുക്കണമെന്നാണ് ഈ കഥാപാത്രത്തിന്റെ ആഗ്രഹം. നിര്‍മ്മാണം കാര്‍ഗൊ സിനിമാസ്.