എവര്‍ട്ടനെതിരായ പ്രീമിയര്‍ ലീഗ് മത്സരത്തിൽ ചെല്‍സിയുടെ അർജന്റൈൻ ഗോൾകീപ്പർ എമി മാർട്ടിനസിന് തലയ്ക്ക് ഗുരുതര പരിക്കേറ്റു. മത്സരത്തിൽ എതിരില്ലാത്ത രണ്ട് ഗോളുകൾക്ക് ചെൽസി വിജയിക്കുകയും പോയിന്റ് പട്ടികയിൽ നാലാം സ്ഥാനത്തേക്ക് ഉയരുകയും ചെയ്തു.
ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ എവര്‍ട്ടനെതിരെ മത്സരത്തില്‍ ചെല്‍സിയുടെ അര്‍ജന്റൈന്‍ ഗോള്‍ കീപ്പര്‍ എമിലിയാനോ മാര്‍ട്ടിനെസിന് പരിക്ക്. രണ്ടാം പകുതിയിലെ 60-ാം മിനിറ്റില്‍ എവര്‍ട്ടന്റെ ജാരെഡ് ബ്രെയ്ത്വെയ്റ്റുമായി കൂട്ടിയിടിച്ചതിനെ തുടര്‍ന്നാണ് മാര്‍ട്ടിനസിന്റെ തലയ്ക്ക് പരിക്കേറ്റത്. മത്സരത്തില്‍ ചെല്‍സി എതിരില്ലാത്ത രണ്ട് ഗോളിന് ജയിച്ചിരുന്നു.
എവര്‍ട്ടന്‍ ഫ്രീ-കിക്ക് എടുക്കാന്‍ തയ്യാറെടുക്കുന്നതിനിടെ, പന്തിനായി പോരാടിയ മാര്‍ട്ടിനസും ബ്രെയ്ത്വെയ്റ്റും തമ്മില്‍ തലകള്‍ തമ്മില്‍ കൂട്ടിയിടിക്കുകയായിരുന്നു. ഇരു കളിക്കാരെയും ശുശ്രൂഷിക്കാന്‍ മെഡിക്കല്‍ സംഘം ഉടന്‍ തന്നെ ഗ്രൗണ്ടിലേക്ക് എത്തിയെങ്കിലും, മാര്‍ട്ടിനസിനെ സ്‌ട്രെച്ചറിലാണ് പുറത്തേക്ക് കൊണ്ടുപോയത്. ഹില്‍ ഡിക്ക്‌സണ്‍ സ്റ്റേഡിയത്തില്‍ സ്‌ട്രെച്ചറില്‍ പുറത്തേക്ക് കൊണ്ടുപോകുമ്പോള്‍ മാര്‍ട്ടിനസ് ബോധം തെളിഞ്ഞിട്ടുണ്ടായിരുന്നുവെന്ന് മെഡിക്കല്‍ ടീം വ്യക്തമാക്കി.
മാര്‍ട്ടിനസിന്റെ അപ്രതീക്ഷിത പിന്മാറ്റം 21-കാരനായ മൈക്ക് പെന്‍ഡേഴ്‌സിന് പ്രീമിയര്‍ ലീഗില്‍ അരങ്ങേറ്റം കുറിക്കാന്‍ വഴിതുറന്നു. ജനുവരിക്ക് ശേഷമുള്ള ചെല്‍സിയുടെ ആദ്യ ലീഗ് ക്ലീന്‍ ഷീറ്റ് നേടാന്‍ ഈ യുവ ഗോള്‍കീപ്പര്‍ സഹായിച്ചു. തുടര്‍ച്ചയായ 22 മത്സരങ്ങള്‍ക്ക് ശേഷമാണ് ചെല്‍സി ഒരു ഗോള്‍ പോലും വഴങ്ങാതെ മത്സരം പൂര്‍ത്തിയാക്കുന്നത്. മാര്‍ട്ടിനസ് ബോധത്തോടെയാണ് സ്റ്റേഡിയം വിട്ടതെന്നും ആശുപത്രിയില്‍ മുന്‍കരുതല്‍ പരിശോധനകള്‍ക്ക് വിധേയനായി വരികയാണെന്നും ചെല്‍സി പരിശീലകന്‍ സാബി അലോണ്‍സോ സ്ഥിരീകരിച്ചു.
ചെല്‍സി നാലാമത്
എവര്‍ട്ടനെതിരായ മത്സരത്തിന്റെ ആദ്യ പകുതിയില്‍ തങ്ങളുടെ സ്വാഭാവികമായ ആക്രമണ ശൈലി കണ്ടെത്താന്‍ ചെല്‍സി ബുദ്ധിമുട്ടി. ഇരുടീമുകളും തമ്മില്‍ നിരന്തരം ഏറ്റുമുട്ടിയ ആദ്യ പകുതിയില്‍ അഞ്ച് മഞ്ഞക്കാര്‍ഡുകള്‍ പിറന്നു. എന്നാല്‍ രണ്ടാം പകുതിരംഗത്ത് 43 സെക്കന്‍ഡിനുള്ളില്‍ സന്ദര്‍ശകരായ ചെല്‍സി ആദ്യ ഗോള്‍ നേടി. ജോറെല്‍ ഹാറ്റോയുടെ പാസില്‍ നിന്ന് ബോക്‌സിനുള്ളില്‍ മാര്‍ക്ക് ചെയ്യപ്പെടാതെ നിന്ന നെറ്റോ പന്ത് വലയിലെത്തിക്കുകയായിരുന്നു. 90-ാം മിനിറ്റില്‍ നെറ്റോ വീണ്ടും ഗോള്‍ നേടി ചെല്‍സിയുടെ വിജയം ഉറപ്പിച്ചു. ഈ വിജയത്തോടെ ചെല്‍സി പോയിന്റ് പട്ടികയില്‍ നാലാം സ്ഥാനത്തേക്ക് ഉയര്‍ന്നു.
